ដោយ អ៊ុំ រង្សី RFA 2016-07-30
អង្គភាពប្រឆាំងអំពើពុករលួយ (ACU) ឲ្យដឹងថា នៅក្នុងខែកក្កដា ឆ្នាំ២០១៦ នេះ អង្គភាពបានទទួលពាក្យបណ្ដឹងប្រមាណ ៦៤ករណី ក្នុងនោះមាន ១៧បណ្ដឹង មិនមានការពាក់ព័ន្ធនឹងករណីពុករលួយនោះទេ។ សង្គមស៊ីវិលយល់ថា ស្ថាប័ននេះនៅតែដោះស្រាយយឺតយ៉ាវ និងមិនទាន់មានយន្តការដោះស្រាយតាមផ្លូវច្បាប់ប្រសិទ្ធភាពនៅឡើយ។
សង្គមស៊ីវិលដែលធ្វើការពាក់ព័ន្ធនឹងអភិបាលកិច្ចយល់ថា ការបន្តកើនឡើងនូវពាក្យបណ្ដឹងប្ដឹងជុំវិញរឿងពុករលួយរបស់ប្រជាពលរដ្ឋមកកាន់អង្គភាពប្រឆាំងអំពើពុករលួយ ជាសញ្ញាអវិជ្ជមាននៃការអនុវត្តការងាររបស់អង្គភាពនេះ ពោលគឺមិនទាន់អាចឆ្លើយតបទៅនឹងសេចក្ដីត្រូវការរបស់ប្រជាពលរដ្ឋកម្ពុជា នៅឡើយ។
ការលើកឡើងរបស់សង្គមស៊ីវិលនៅពេលនេះ ធ្វើឡើងបន្ទាប់ពីអង្គភាពនេះចេញសេចក្ដីជូនដំណឹងស្ដីពីកិច្ចប្រជុំលើកទី១៣ អាណត្តិទី២ នៃក្រុមប្រឹក្សាជាតិ ប្រឆាំងអំពើពុករលួយ នៅថ្ងៃទី២៨ ខែកក្កដា បង្ហាញថា ក្នុងរយៈពេល ១ខែ (កក្កដា) អង្គភាពប្រឆាំងអំពើពុករលួយទទួលបានពាក្យប្ដឹងចំនួន ៦៥ករណី ដែលក្នុងនោះមានបណ្ដឹងអនាមិកចំនួន ២៣ករណី ស្មើនឹង ៣៦ភាគរយ។ សង្គមស៊ីវិលយល់ថា ចំនួននេះនៅតែមានការកើនឡើយ និងទាមទារឲ្យអង្គភាពប្រឆាំងអំពើពុករលួយ ត្រូវអនុវត្តការងារឲ្យមានប្រសិទ្ធភាពជាងនេះ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ការបន្តកើនឡើងនូវពាក្យបណ្ដឹងជុំវិញរឿងពុករលួយគឺជាសញ្ញាមិនល្អមួយ ព្រោះវាអាចបង្ហាញថា ប្រជាពលរដ្ឋនៅតែរងអំពើអយុត្តិធម៌ ពិសេសអំពើពុករលួយក្នុងសង្គមនៅតែបន្តមាននៅឡើយ។
លោក សន ជ័យ បានឲ្យដឹងទៀតថា លោកសង្កេតឃើញថា អំពើពុករលួយនៅកម្ពុជា មិនបានថយចុះនោះទេ។ ជាក់ស្ដែងដូចជារឿងទំនាស់ដីធ្លី បញ្ហាធនធានធម្មជាតិ រឿងនយោបាយ និងការដោះស្រាយសេវាសាធារណៈជូនពលរដ្ឋជាដើម។ លោកអះអាងថា មានកត្តាពីរដែលជំរុញឲ្យកើនឡើងពាក្យបណ្ដឹងជុំវិញរឿងពុករលួយរបស់ប្រជាពលរដ្ឋ គឺទី១ មានការយឺតយ៉ាវឆ្លើយតបរបស់អង្គភាពប្រឆាំងអំពើពុករលួយមកកាន់ប្រជាពលរដ្ឋ និងកត្តាទី២ មកពីយន្តការដោះស្រាយតាមផ្លូវច្បាប់មិនមានប្រសិទ្ធភាព៖ «»។
លោកចង់ឃើញអង្គភាពនេះ ដុសខាត់ពង្រឹងប្រព័ន្ធអភិបាលកិច្ចល្អឲ្យមានប្រសិទ្ធភាពជាមុនសិន ទើបអាចទប់ស្កាត់បញ្ហាពុករលួយនៅកម្ពុជា បាន៖ «»។
ប្រធានបច្ចេកទេសឃ្លាំមើលការរំលោភសិទ្ធិមនុស្សនៃអង្គការលីកាដូ (LICADHO) លោក អំ សំអាត មិនអាចសន្និដ្ឋានច្បាស់ពីការកើនឡើង ឬថយចុះពាក្យបណ្ដឹងនេះនៅឡើយ ថាតើមកពីមូលហេតុអ្វីច្បាស់នោះទេ? ប៉ុន្តែលោក អំ សំអាត នៅតែជំរុញឲ្យអង្គភាពនេះដោះស្រាយរាល់ពាក្យបណ្ដឹងឲ្យមានប្រសិទ្ធភាព និងតម្លាភាព៖ «»។
អាស៊ីសេរី មិនអាចសុំការបំភ្លឺបន្ថែមពីប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ជុំវិញការកើនឡើងនូវពាក្យបណ្ដឹងនៅក្នុងខែកក្កដា ដោយសារមូលហេតុអ្វីបានឡើយនៅថ្ងៃទី៣០ ខែកក្កដា។ ប៉ុន្តែសេចក្ដីជូនដំណឹងរបស់អង្គភាពប្រឆាំងពុករលួយដដែលបង្ហាញថា ក្នុងចំណោមពាក្យប្ដឹងទាំង ៦៤ករណី នៅក្នុងខែកក្កដា ឆ្នាំ២០១៦ នេះ អង្គភាពប្រឆាំងអំពើពុករលួយអះអាងថា មាន ១៧ ពាក្យបណ្ដឹង មិនពាក់ព័ន្ធសមត្ថភាពរបស់អង្គភាពប្រឆាំងអំពើពុករលួយ។ ក្រៅពីជូនដំណឹងអំពីពាក្យបណ្ដឹងនេះដែរ អង្គភាពប្រឆាំងអំពើពុករលួយក៏បានឲ្យដឹងពីការងារប្រកាសទ្រព្យសម្បត្តិ និងបំណុលពីអ្នកទើបនឹងតែងតាំងថ្មីចំនួន ២៦៦រូប និងលាឈប់ (ចប់អាណត្តិ) ចំនួន ១៩រូប។
យ៉ាងណាក៏ដោយ សង្គមស៊ីវិលក៏ស្នើឲ្យរដ្ឋាភិបាលកម្ពុជា កែទម្រង់អំពើពុករលួយក្នុងប្រព័ន្ធតុលាការកម្ពុជា ដើម្បីឲ្យពលរដ្ឋឈប់ភ័យខ្លាចក្នុងការរាយការណ៍ ឬដាក់ពាក្យប្ដឹងពីបញ្ហាពុករលួយ។ ជាងនេះ សង្គមស៊ីវិលនៅតែទទូចឲ្យអង្គភាពនេះស៊ើបអង្កេតរាល់ពាក្យបណ្ដឹងឲ្យបានច្បាស់ជាមុនសិន មុននឹងច្រានចោលពាក្យបណ្ដឹង ឬចាត់វិធានការលើពាក្យបណ្ដឹងនោះ៕