ដោយ អ៊ុង សេរីវុទ្ធ RFA 2016-08-03
អយ្យការអមសាលាដំបូងរាជធានីភ្នំពេញ កោះហៅប្រធានគណបក្សសង្គ្រោះជាតិ លោក សម រង្ស៊ី និងសមាជិកព្រឹទ្ធសភាគណបក្ស សម រង្ស៊ី អ្នកស្រី ថាក់ ឡានី មកឆ្លើយបំភ្លឺតាមបណ្ដឹងរបស់លោកនាយករដ្ឋមន្ត្រី ហ៊ុន សែន ជុំវិញឃាតកម្មលើបណ្ឌិត កែម ឡី។
អ្នកនាំពាក្យ និងជាព្រះរាជអាជ្ញារងសាលាដំបូងរាជធានីភ្នំពេញ លោក លី សុផាណា បញ្ជាក់ឲ្យដឹងតាមបណ្ដាញទំនាក់ទំនងតេឡេក្រាម (Telegram) នៅថ្ងៃទី៣ សីហា ថា លោកបានចេញដីកាកោះហៅលោក សម រង្ស៊ី និងអ្នកស្រី ថាក់ ឡានី តាំងពីថ្ងៃទី១ សីហា។
លោក លី សុផាណា បន្តថា ដីកាកោះហៅលោក សម រង្ស៊ី ឲ្យមកបំភ្លឺនៅតុលាការ នៅព្រឹកថ្ងៃទី១៩ សីហា ខណៈអ្នកស្រី ថាក់ ឡានី ត្រូវមកបំភ្លឺនៅរសៀលថ្ងៃទី៨ សីហា។ ដោយឡែក លោកមេធាវី គី តិច ក៏នឹងត្រូវមកបំភ្លឺ នៅព្រឹកថ្ងៃទី៥ សីហា។
កាលពីថ្ងៃទី១ សីហា លោក ហ៊ុន សែន បានដាក់ពាក្យបណ្ដឹងពីរដាច់ដោយឡែកពីគ្នា ប្ដឹងប្រធានគណបក្សសង្គ្រោះជាតិ លោក សម រង្ស៊ី និងសមាជិកព្រឹទ្ធសភាគណបក្ស សម រង្ស៊ី អ្នកស្រី ថាក់ ឡានី ទាក់ទងនឹងការចោទថា រូបលោក និងរដ្ឋាភិបាលជាអ្នកនៅពីក្រោយខ្នងនៃឃាតកម្មលើលោកបណ្ឌិត កែម ឡី។ លោក ហ៊ុន សែន តំណាងដោយមេធាវីរដ្ឋាភិបាល លោក គី តិច ប្ដឹងសុំឲ្យតុលាការផ្ដន្ទាទោសលោក សម រង្ស៊ី និងអ្នកស្រី ថាក់ ឡានី តាមផ្លូវច្បាប់ និងទាមទារសំណងជំងឺចិត្តក្នុងម្នាក់ចំនួន ១០០រៀល។
ចំពោះករណីអ្នកស្រី ថាក់ ឡានី កាលពីថ្ងៃទី២ សីហា លោក ហ៊ុន សែន បានព្រមានចាប់ខ្លួនសមាជិកព្រឹទ្ធសភាបក្សប្រឆាំងរូបនេះ បើសិនជាអ្នកស្រីហ៊ានឆ្លងដែនទៅក្រៅប្រទេស ដោយលោកប្រកាសថា អ្នកស្រី ថាក់ ឡានី ត្រូវតទល់ជាមួយលោកតាមផ្លូវច្បាប់។
រហូតមកដល់ពេលនេះ សមាជិកព្រឹទ្ធសភា និងរដ្ឋសភាពីខាងគណបក្សប្រឆាំងចំនួន ២រូបហើយដែលកំពុងជាប់ឃុំក្នុងពន្ធនាគារព្រៃស គឺលោក ហុង សុខហ៊ួរ លោក អ៊ុំ សំអាន។ ចំណែកមេបក្សគឺ លោក សម រង្ស៊ី នៅមិនហ៊ានចូលស្រុក ត្បិតលោកកំពុងជាប់បណ្ដឹងក្នុងតុលាការជាច្រើនករណី។ ឯប្រធានស្ដីទី លោក កឹម សុខា វិញ ក៏បន្តឃុំខ្លួនឯងក្នុងទីស្នាក់ការកណ្ដាល មិនហ៊ានចេញក្រៅ។ ដោយឡែកតំណាងរាស្ត្របក្សប្រឆាំងពីររូបទៀត គឺលោក តុ វ៉ាន់ចាន់ និងលោក ពិន រតនា ក៏កំពុងជាប់បណ្ដឹងនៅតុលាការ ក្នុងករណីជាមួយលោក កឹម សុខា ដែរ។
សូមរង់ចាំអាន និងស្ដាប់ព័ត៌មានពិស្ដារ...