ដោយ ហ៊ុំ ចំរើន RFA 2016-08-04
ប្រជាពលរដ្ឋមានទំនាស់ដីធ្លីនៅក្រុងប៉ោយប៉ែត និងខេត្តបន្ទាយមានជ័យ ប្រមាណ ១៥នាក់តំណាងឲ្យពលរដ្ឋ ២៧គ្រួសារ នៅព្រឹកថ្ងៃទី៤ សីហា នាំគ្នារារាំងអាជ្ញាធរភូមិ និងបក្ខពួកដែលបានចុះទៅវាស់វែង និងបោះបង្គោលព្រំដីទំនាស់យកទៅលក់ឲ្យអ្នកមានលុយ ដោយពុំមានការឯកភាពពីពួកគាត់។ អ្នកភូមិហៅសកម្មភាពរបស់អាជ្ញាធរនេះ ថាជាអំពើអយុត្តិធម៌មកលើពួកគាត់ដែលមិនអាចទទួលយកបាន។
ពលរដ្ឋមានទំនាស់ដីនៅក្រុងប៉ោយប៉ែត លើកឡើងថា ពួកគាត់មិនព្រមចាកចេញពីដីរបស់ខ្លួនឡើយ បើទោះជាអាជ្ញាធរចុះបោះបង្គោលនៅលើព្រំដី ហាក់បង្ខំឲ្យពួកគាត់ចាកចេញពីដីលំនៅឋានក៏ដោយ។
ពលរដ្ឋមួយចំនួនរស់នៅភូមិចាន់គីរី សង្កាត់ប៉ោយប៉ែត ប្រាប់អាស៊ីសេរី នៅថ្ងៃទី៤ សីហា ថា មេភូមិចាន់គីរី មន្ត្រីការិយាល័យច្រកចេញចូលតែមួយក្រុងប៉ោយប៉ែត និងបក្ខពួកមួយចំនួនទៀតសរុបប្រមាណ ១០នាក់ បានចុះទៅដកបង្គោលព្រំដីរបស់ពួកគាត់គ្មានសល់ ដើម្បីយកដីប្រគល់ទៅឲ្យពលរដ្ឋអ្នកទិញ ដែលចុះទៅទទួលដីដល់ទីកន្លែង។ អ្នកភូមិអះអាងថា ពួកគាត់រស់នៅទីនោះជាង ១០ឆ្នាំមកហើយ។
អ្នកភូមិហៅសកម្មភាពរបស់អាជ្ញាធរមូលដ្ឋាននេះ ថាជាការប្រើអំណាចប្លន់យកដីពីពួកគាត់ទៅលក់ ដោយមិនគិតពីទុក្ខលំបាករបស់ប្រជាពលរដ្ឋក្រីក្រឡើយ៖ «ខ្ញុំហាមថាដីមានបញ្ហាកុំអាលធ្វើអី ហើយគេថាធ្វើទៅកុំខ្លាចកុំអី! ដោយដកសសរស៊ីម៉ងត៍របស់ខ្ញុំ រួចគេដាក់សសរឈើជំនួសវិញ។ ពួកខ្ញុំក្រីក្រគ្មានដីសម្រាប់សង់ផ្ទះស្នាក់នៅក្រៅអំពីដីនេះទេ។ កន្លងមក ខ្ញុំយំគ្មានទឹកភ្នែកទេ ដោយសារស្ដាយដើមឈើដែលគេឈូសឆាយបំផ្លាញតាមចិត្ត»។
អាស៊ីសេរី ពុំអាចទាក់ទងចៅសង្កាត់ប៉ោយប៉ែត លោក តាំង គីហេង និងអភិបាលរងក្រុងប៉ោយប៉ែត ទទួលបន្ទុកដោះស្រាយវិវាទដីធ្លី លោក ម៉ែន សុភ័ណ ដើម្បីឆ្លើយតបនឹងការចោទប្រកាន់នេះបានទេ នៅថ្ងៃទី៤ សីហា ដោយទូរស័ព្ទចូលជាច្រើនលើក តែពុំមានអ្នកទទួល។
រីឯមេភូមិចាន់គីរី លោក សេង ចាន់ឌី ពុំមានប្រតិកម្មអ្វីជុំវិញបញ្ហានេះនៅឡើយ ប៉ុន្តែអ្នកភូមិអះអាងថា អាជ្ញាធរដែលចុះទៅដល់ទីកន្លែងនោះ ប្រាប់ពួកគាត់ថា អាជ្ញាធរមករៀបចំវាស់វែងដីប្រគល់ទៅម្ចាស់ដីពិតប្រាកដដែលមានប័ណ្ណកម្មសិទ្ធិស្របច្បាប់ និងចោទពួកគាត់ថារស់នៅលើដីខុសច្បាប់។
ទោះជាយ៉ាងនេះក្ដី មន្ត្រីសម្របសម្រួលអង្គការលីកាដូ (LICADHO) ខេត្តបន្ទាយមានជ័យ លោក ភុន ឈិន មានប្រសាសន៍ថា អាជ្ញាធរទៅបណ្ដេញប្រជាពលរដ្ឋទាំងកម្រោលបែបនេះ គឺខុសច្បាប់ និងជាការប្រើអំពើហិង្សាពាក់ព័ន្ធនឹងការគ្រប់គ្រងអចលនទ្រព្យទៅលើពលរដ្ឋ ពីព្រោះរឿងទំនាស់នេះដោះស្រាយមិនទាន់ចប់នៅឡើយ៖ «ដីនោះពួកគាត់កំពុងតែកាន់កាប់។ អ៊ីចឹងបើសិនអាជ្ញាធររកឃើញថា ពួកគាត់មានកំហុសនឹងការកាន់កាប់នោះ គួរតែធ្វើទៅតាមផ្លូវច្បាប់ គឺមិនត្រូវធ្វើបែបនេះដាក់ពួកគាត់ឡើយ»។
ដីទំនាស់នោះជាលក្ខណៈដីលំនៅឋាន ដែលពលរដ្ឋចំនួន ២៧គ្រួសារបានកាន់កាប់ ដោយគ្រួសារខ្លះសង់ផ្ទះ និងរោងស្នាក់នៅលើដីទំហំទទឹង ១០ម៉ែត្រ និងខ្លះទៀត ១៥ម៉ែត្រ និងបណ្ដោយ ២០ម៉ែត្រ។
កន្លងទៅ ប្រជាពលរដ្ឋធ្លាប់តវ៉ានៅពេលអាជ្ញាធរឈូសឆាយដីធ្វើផ្លូវ និងចុះវាស់វែងបែងចែកដីនោះជាបន្តបន្ទាប់ ដើម្បីឲ្យអាជ្ញាធរពាក់ព័ន្ធបញ្ឈប់សកម្មភាពនោះ ហើយធ្វើប័ណ្ណកម្មសិទ្ធិស្របច្បាប់ជូនពួកគាត់។ នៅរសៀលថ្ងៃទី៤ សីហា ដដែល ក្រុមអ្នកតវ៉ាបន្តឈ្លោះប្រកែកគ្នាជាមួយអាជ្ញាធរ និងអ្នកទិញដី ដោយមិនព្រមចាកចេញពីផ្ទះរបស់ពួកគាត់ឡើយ៕