ដោយ ជិន ជេដ្ឋា RFA 2016-08-05
តំណាងសហគមន៍ព្រៃឈើនៅឃុំពេជ្រចង្វា ស្រុកបរិបូរណ៍ ខេត្តកំពង់ឆ្នាំង បារម្ភបាត់បង់ដីព្រៃរបស់រដ្ឋដែលអ្នកភូមិនៃឃុំនេះស្នើសុំបង្កើតជាព្រៃសហគមន៍ជាយូរមកហើយ ប៉ុន្តែមិនទាន់ឃើញមានការឆ្លើយតបពីអាជ្ញាធរមានសមត្ថកិច្ច។ អាជ្ញាធរបញ្ជាក់ថា លិខិតស្នើសុំបង្កើតសហគមន៍ព្រៃឈើរបស់ពលរដ្ឋមិនទាន់ធ្វើបានត្រឹមត្រូវតាមច្បាប់នៅឡើយ។
តំណាងសហគមន៍ព្រៃឈើឃុំពេជ្រចង្វា ឲ្យដឹងនៅថ្ងៃទី៤ ខែសីហា ថា លិខិតស្នើសុំភ្ជាប់ស្នាមមេដៃពលរដ្ឋ ៦៤១ស្នាមមេដៃ ដែលដាក់ចូលសាលាស្រុកបរិបូរណ៍ និងខណ្ឌរដ្ឋបាលព្រៃឈើកំពង់ឆ្នាំង តាំងពីខែមីនា ឆ្នាំ២០១៦ មិនទាន់ឃើញប្រធានស្ថាប័នទាំងនេះសម្រេចយ៉ាងណានៅឡើយទេ។ អ្នកភូមិដែលជាសមាជិកសហគមន៍ចង់ឲ្យអាជ្ញាធរជួយពន្លឿននីតិវិធីស្នើសុំនេះ។
តំណាងសហគមន៍លោកស្រី យិន ប៉ិច មានប្រសាសន៍ថា លោកស្រី និងពលរដ្ឋមកពី ៦ភូមិ នៃឃុំពេជ្រចង្វា រង់ចាំចម្លើយពីអភិបាលស្រុក និងនាយខណ្ឌរដ្ឋបាលព្រៃឈើកំពង់ឆ្នាំង ដើម្បីបញ្ជូនលិខិតស្នើសុំបន្តទៅអភិបាលខេត្ត និងក្រសួងកសិកម្មក្នុងការចុះបញ្ជីទទួលស្គាល់ព្រៃសហគមន៍ជាផ្លូវការ។
លោកស្រីថា បើបណ្ដែតបណ្ដោយ ឬទុកយូរទៀត ដីព្រៃអាចនឹងបាត់បង់ដោយជនឆ្លៀតឱកាស៖ «ការបង្កើតសហគមន៍ព្រៃឈើហ្នឹង ក៏មានការព្រមព្រៀងពីប្រជាពលរដ្ឋ និងអាជ្ញាធរភូម-ឃុំដែរ គឺអត់ប៉ះពាល់ដល់ដីកម្មសិទ្ធិរបស់ប្រជាពលរដ្ឋទេ ព្រោះដីហ្នឹងសេសសល់ពីក្រុមនិស្សិតវាស់វែង។ អ្វីដែលខ្ញុំសំណូមពរសូមឲ្យអភិបាលខេត្ត អភិបាលស្រុក និងនាយខណ្ឌរដ្ឋបាលព្រៃឈើ ពន្លឿនក្នុងការទទួលស្គាល់ព្រៃសហគមន៍នៅក្នុងឃុំពេជ្រចង្វា»។
លោកស្រី យិន ប៉ិច ថា អាជ្ញាធរជំនាញរដ្ឋបាលព្រៃឈើ និងសហគមន៍ គួរធ្វើបច្ចុប្បន្នភាពផ្ទៃដីដែលនៅសេសសល់ការវាស់វែងរបស់ក្រុមនិស្សិតកាលពីឆ្នាំ២០១២។ ក្រោយការវាស់វែងចប់ភ្លាមៗ ផ្ទៃដីព្រៃរបស់រដ្ឋនៅក្នុងឃុំពេជ្រចង្វា មានជិតពីរពាន់ហិកតារ (១៨០០.៨) ប៉ុន្តែមកដល់បច្ចុប្បន្នលោកស្រីមិនដឹងថា នៅសល់ទំហំប៉ុន្មានទេ ដែលជំនាញត្រូវប្រញាប់ធ្វើបច្ចុប្បន្នភាពផ្ទៃដីកុំឲ្យកាន់តែបាត់បង់។
ឆ្លើយតបបញ្ហានេះ អភិបាលស្រុកបរិបូរណ៍ លោក ឃួន សៅរុំ បញ្ជាក់យ៉ាងខ្លីថា អាជ្ញាធរស្រុកពិតជាបានទទួលលិខិតស្នើសុំនេះយូរហើយមែន ប៉ុន្តែបានប្រាប់ហេតុផលតាំងបីថ្ងៃក្រោយដាក់លិខិតភ្លាមមកម៉េ្លះ។ លោករីករាយចំពោះការបង្កើតសហគមន៍ព្រៃឈើនៅក្នុងស្រុក ប៉ុន្ដែនៅពេលលិខិតស្នើសុំមិនទាន់ពេញលក្ខណៈច្បាប់លោកមិនទាន់ហ៊ានសម្រេចយ៉ាងណានៅឡើយទេ៖ «ឯកសារគាត់ (តំណាងសហគមន៍) អត់ទាន់គ្រប់ នៅសល់ឯកសារផែនទីដែលត្រូវបង្កើតនៅចំណុចណាយកមកភ្ជាប់គ្នា ដើម្បីជំរុញទៅមេព្រៃ មិនមែនខ្ញុំមិនបានប្រាប់ទេ ខ្ញុំប្រាប់តាំងពីបីថ្ងៃក្រោយពីយកមកដាក់នឹងខ្ញុំ។ គ្មានមូលដ្ឋានអ៊ីចឹងខ្ញុំយកទៅប្រើ ឬសុំគេម៉េចកើត»។
ពលរដ្ឋនៅតាមស្រុកមួយចំនួននៃខេត្តកំពង់ឆ្នាំង តែងតែស្នើសុំបង្កើតព្រៃសហគមន៍ ឬប្រឆាំងតវ៉ាចំពោះការរំលោភបំពានព្រៃឈើរបស់រដ្ឋពីសំណាក់ជនខិលខូច និងមានលុយកាក់មួយចំនួន។ ចំណែកពលរដ្ឋចំនួន ៦ភូមិ នៃឃុំពេជ្រចង្វា ស្នើសុំចុះបញ្ជីដីសហគមន៍ជាផ្លូវការឲ្យបានឆាប់ ដើម្បីការពារឈើទុកគ្រាន់ធ្វើផ្ទះ អាស្រ័យអនុផលព្រៃឈើ និងមានកន្លែងឃ្វាលគោក្របីជាដើម៕