ទូច សុខា ភ្នំពេញប៉ុស្តិ៍ Fri, 5 August 2016
ភ្នំពេញៈ ប្រជាពលរដ្ឋជាង ៧០ នាក់តំណាងឲ្យប្រជាពលរដ្ឋជាង ១០០ គ្រួសារមកពីស្រុកចំនួនពីរក្នុងខេត្តកោះកុងកាលពីម្សិលមិញបានស្វែងរកអន្តរាគមន៍ពីស្ថាប័នរដ្ឋ និងអន្តរជាតិចំនួន ៤ នៅភ្នំពេញដើម្បីជួយដោះស្រាយជម្លោះដីធ្លីដ៏រ៉ាំរ៉ៃរបស់ពួកគាត់ជាមួយក្រុមហ៊ុនចំនួនពីរដែលពួកគាត់ថាជារបស់សមាជិកព្រឹទ្ធសភាគណបក្សប្រជាជនម្នាក់។
ប្រជាពលរដ្ឋដែលមានទំនាស់ដីធ្លីក្នុងស្រុកស្រែអំបិល និងស្រុកបទុមសាគរក្នុងខេត្តកោះកុងមានគ្នាចំនួន ៧៤ នាក់តំណាងប្រជាពលរដ្ឋ ១៤៧ គ្រួសារបានដើរដាក់ញត្តិរបស់ខ្លួនទៅកាន់រដ្ឋសភាសហភាពអឺរ៉ុបក្រសួងកសិកម្ម និងក្រសួងដែនដី។
អ្នកទាំងនោះអះអាងថាដីរបស់ពួកគេមានទំហំ ៧៨២,១៦ ហិកតាហើយមានជម្លោះជាមួយក្រុមហ៊ុនកោះកុងស៊ូហ្គ័រ និងក្រុមហ៊ុនកោះកុងផ្លែនថេសិនអ៊ិនដាស្រ្តី ខមភេនី លីមីតធីត ដែលពួកគាត់ថាជារបស់សមាជិកព្រឹទ្ធសភាលោក លី យ៉ុងផាត់ តាំងពីឆ្នាំ ២០០៦ មក។
តំណាងប្រជាពលរដ្ឋម្នាក់គឺអ្នកស្រី ផាវ ញ៉ើង ដែលបានចូលរួមដាក់ញត្តិទៅស្ថាប័នទាំងនោះបានប្រាប់អ្នកសារព័ត៌មានថាប្រជាពលរដ្ឋរបស់អ្នកស្រីបានបាត់បង់ដីស្រែចម្ការដែលធ្លាប់កាន់កាប់តាំងពីដូនតា និងខ្លះកាន់កាប់តាំងពីទសវត្សរ៍ឆ្នាំ ១៩៩០។
អ្នកស្រីឲ្យដឹងដែរថា ស្ថាប័នទាំងនោះបានទទួលយកញត្តិរបស់ពួកអ្នកស្រី និងបានសន្យាថាបញ្ជូនញត្តិនេះទៅឲ្យថ្នាក់លើបន្តទៀតដើម្បីពិនិត្យរកដំណោះស្រាយ។
អ្នកស្រីបន្ថែមថា តំណាងរបស់អ្នកស្រីបីនាក់បានជួបផ្ទាល់ជាមួយឯកអគ្គរដ្ឋទូតសហភាពអឺរ៉ុបប្រចាំកម្ពុជាលោក George Edgar និងថាឯកអគ្គរដ្ឋទូតរូបនេះសន្យាសិក្សាលើបញ្ហានេះ និងជួយជំរុញទៅកាន់រដ្ឋាភិបាលកម្ពុជាឲ្យដោះស្រាយបញ្ហានេះ។
អ្នកស្រីបន្ថែមថា៖ «គាត់ (ខាងសហភាពអឺរ៉ុប) នឹងព្យាយាមចុះទៅ (ទីតាំងជម្លោះ) ប៉ុន្តែគាត់អត់ប្រាប់ថាទៅពេលណាទេគាត់នឹងចុះទៅស៊ើបអង្កេតខ្លួនគាត់ហើយទៅមើលឲ្យដឹង និងពិនិត្យផ្ទាល់ប៉ុន្តែការដោះស្រាយនោះគាត់អត់សន្យាទេគាត់អត់មានឥទ្ធិពលទេមានតែរដ្ឋាភិបាលទេមានសិទ្ធិដោះស្រាយបើរដ្ឋាភិបាលដោះ (ស្រាយ) បានដោះបើអត់គឺអត់ហើយ»។
ពលរដ្ឋមានជម្លោះដីធ្លីម្នាក់ទៀតគឺអ្នកស្រី ណុំ វណ្ណារី បានថ្លែងថាសព្វថ្ងៃប្រជាពលរដ្ឋកំពុងជួបបញ្ហាជីវភាពដោយថាមិនមានដីធ្វើស្រែចម្ការ និងកំពុងរងការគំរាមកំហែងបណ្តេញចេញពីដីផ្ទះដែលកំពុងរស់នៅសព្វថ្ងៃទៀតផង។
អ្នកស្រីបន្ថែមថា៖ «ពួកយើងដេកនៅភ្នំពេញស៊ីអត់ស៊ីឃ្លានដេកឲ្យមូសខាំដើម្បីទាមទាររកដំណោះស្រាយយកដីនេះមកចិញ្ចឹមកូនចៅជំនាន់ក្រោយទៀតចង់ដឹងថាប្រទេសជាតិយើងមានការគោរពសិទ្ធិមនុស្សកុំឲ្យបណ្តេញពួកយើងខ្ញុំចេញដោយគ្មានមូលហេតុអ្វីទាំងអស់ថាអភិវឌ្ឍសេដ្ឋកិច្ចឲ្យរីកចម្រើនប៉ុន្តែមកអារកពួកខ្ញុំទាំងរស់អយុត្តិធម៌ណាស់»។
អ្នកតំណាងលោក លី យ៉ុងផាត់ គឺលោក ស៊ិន សត្ថា បានប្រាប់ភ្នំពេញប៉ុស្តិ៍តាមទូរស័ព្ទកាលពីម្សិលមិញថាលោក លី យ៉ុងផាត់ មិនជាប់ពាក់ព័ន្ធនឹងដីទំនាស់ក្នុងខេត្តកោះកុងនោះទេដោយលោកថាលោក លី យ៉ុងផាត់ មិនមានក្រុមហ៊ុនស្ករអំពៅនៅទីនោះឡើយ។
លោកបន្តថាលោក លី យ៉ុងផាត់ មានតែក្រុមហ៊ុនភ្នំពេញស៊ូហ្គ័រ និងកំពង់ស្ពឺស៊ូហ្គ័រដែលមានទីតាំងនៅក្នុងខេត្តកំពង់ស្ពឺប៉ុណ្ណោះ។
លោកបន្ថែមថា៖ «និយាយឲ្យចំទៅប្រជាពលរដ្ឋអត់ដឹងរឿងការងាររបស់គាត់ទេអ៊ីចឹងរឿងស្ករអំពៅនៅកោះកុងហ្នឹងអត់មានពាក់ព័ន្ធជាមួយឧកញ៉ា (លី យ៉ុងផាត់) សោះហ្មងបើប្រជាជននៅប្រើ (ឈ្មោះ) ក៏ប្រើចុះព្រោះគាត់អត់ដឹងខ្ញុំអត់ដឹងសោះហ្មងរឿងពាក់ព័ន្ធនឹងកោះកុងអ្វីក៏ខ្ញុំអត់ដឹងដែរគ្រាន់តែចង់ (បញ្ជាក់) ថាឈ្មោះរបស់គាត់អត់មានពាក់ព័ន្ធទេ»។
អភិបាលខេត្តកោះកុងលោក ប៊ុន លើត បានថ្លែងថាបញ្ហាទំនាស់ដីធ្លីនេះបានផុតពីសមត្ថកិច្ចរបស់អាជ្ញាធរខេត្តហើយ ហើយអាជ្ញាធរខេត្តក៏កំពុងរង់ចាំការសម្រេច ឬនីតិវិធីបន្ទាប់ពីគណៈកម្មការអន្តរក្រសួងដែលទទួលបន្ទុកដោះស្រាយទំនាស់នេះផងដែរ។
អ្នកនាំពាក្យក្រសួងដែនដីលោក ជៀម សុផលមករា បានឲ្យដឹងកាលពីម្សិលមិញថាក្រោយពីបានទទួលញត្តិរបស់ប្រជាពលរដ្ឋក្រសួងនឹងពិនិត្យមូលហេតុដែលនាំឲ្យមានទំនាស់ និងថាក្រសួងនឹងផ្តល់ដំណឹងទៅពលរដ្ឋវិញក្នុងរយៈពេលមួយសប្តាហ៍ក្រោយថ្ងៃទទួលញត្តិ។
លោកបន្តថា៖ «រាល់ទំនាស់ពាក់ព័ន្ធវិស័យដីធ្លីទាំងអស់ត្រូវតែមានការដោះស្រាយតាមរយៈយន្តការដែលបង្កើតនៅពេលថ្មីៗនេះតាមក្រុមការងារដោះស្រាយទំានាស់ដីធ្លីចុះដល់គោលដៅតែម្តង...ពេលទទួលញត្តិភ្លាមយើងមិនមែនចុះទៅគោលដៅតែម្តងទេយើងសិក្សាពីដើមចមនៃទំនាស់ និងវិភាគលើកអង្គហេតុអង្គច្បាប់ជាមុនសិន»។
ក្រុមហ៊ុនកោះកុងស៊ូហ្គ័រ និងក្រុមហ៊ុនកោះកុងផ្លែនថេសិន អ៊ីនដាស្រ្តី ខមភេនី លីមីតធីត មិនអាចទាក់ទងសុំការឆ្លើយតបបានទេកាលពីម្សិលមិញ។
ទោះយ៉ាងណាបើតាមព័ត៌មាននៅលើវេបសាយរបស់ក្រុមហ៊ុនឲ្យដឹងថាក្រុមហ៊ុនទាំងពីរនេះបានចូលហ៊ុនជាមួយក្រុមហ៊ុន Khon Kaen Sugar Industry Public Company Limited របស់ថៃដែលមានភាគហ៊ុន ៨០ ភាគរយ និង ២០ ភាគរយជាហ៊ុនរបស់ក្រុមហ៊ុនភេសជ្ជៈតៃវ៉ាន់ឈ្មោះ Ve Vong Corporation។
មន្ត្រីស៊ើបអង្កេតជាន់ខ្ពស់ផ្នែកសិទ្ធិមនុស្សរបស់សមាគមអាដហុកលោក ស៊ឹង សែនករុណា ដែលបានតាមដានពីការដាក់ញត្តិនេះបានជំរុញឲ្យអាជ្ញាធរពាក់ព័ន្ធពន្លឿនការដោះស្រាយបញ្ហាទំនាស់នេះជូនប្រជាពលរដ្ឋទាំងនោះឲ្យបានឆាប់ដោយថាដើម្បីចៀសវាងកុំឲ្យអ្នកទាំងនោះប្រឈមបញ្ហាជីវភាពកាន់តែខ្លាំងជាងនេះទៀត។
ប្រជាពលរដ្ឋដែលឡើងមករកអន្តរាគមន៍នេះបានដេកស្នាក់នៅក្នុងវត្តសាមគ្គីរង្ស៊ីចាប់តាំងពីថ្ងៃពុធ និងបាននិយាយថាពួកគេនឹងសុំព្រះសង្ឃស្នាក់នៅក្នុងវត្តនោះបន្តទៀតដើម្បីស្វែងរកដំណោះស្រាយក្នុងរឿងទំនាស់ដីធ្លីរបស់ពួកគាត់ឲ្យទាល់តែបាន៕