ដោយ ប្រាជ្ញ ចេវ RFA 2016-08-06
មេធាវីការពារក្ដីឲ្យលោក សម រង្ស៊ី ស្វាគមន៍ការសម្រេចប្ដឹងទាស់របស់លោក ហេង សំរិន ដែលមិនពេញចិត្តការសម្រេចរបស់សាលាដំបូងរាជធានីភ្នំពេញ។ ចំណែកលោក សម រង្ស៊ី បន្តចោទប្រកាន់លោក ហេង សំរិន រឿងប្រៀបធៀបព្រះបរមរតនកោដ្ឋ សម្ដេច នរោត្ដម សីហនុ ទៅនឹងប៉ុល ពត ដែលត្រូវបានគេកាត់ទោសប្រហារជីវិតកំបាំងមុខ។
មេធាវីការពារក្ដីឲ្យលោក សម រង្ស៊ី គឺ លោក សំ សុគង់ យល់ថា ការប្ដឹងនេះ ជាការបើកឱកាសឲ្យលោក នឹងមេធាវីរបស់លោក ហេង សំរិន ជួបជជែកគ្នាទាក់ទងផ្លូវច្បាប់បន្ថែម។ លោកយល់ថា ការទាមទារសំណងបន្ថែម ជាសិទ្ធិរបស់ដើម្បីបណ្ដឹង ប៉ុន្តែអ្វីដែលសំខាន់ថា ការទាមទារនោះស៊ីសង្វាក់គ្នានឹងការប៉ះពាល់ឬយ៉ាងណា។ «»
ក្រោយពីមេធាវី របស់ លោក ហេង សំរិន ប្ដឹងឧទ្ធរណ៍ជំទាស់នឹងសេចក្ដីសម្រេចរបស់សាលាដំបូងរាជធានីភ្នំពេញ ដែលមិនបានពិន័យលោក សម រង្ស៊ី ទៅតាមការទាមទាររបស់លោក ហេង សំរិន។ ប្រធានគណបក្សសង្រ្គោះជាតិ លោក សម រង្ស៊ី បានបង្ហាញប្រតិកម្មរបស់ខ្លួន តាមរយៈឃ្លីបវីដេអូដែលមានរយៈពេលជិតមួយនាទី ដែលត្រូវបានបង្ហោះនៅហ្វេសប៊ុក (Facebook) របស់លោក កាលពីថ្ងៃទី០៥ ខែសីហា។
សន្ទរកថា របស់លោក ហេង សំរិន ដែលទំនងជាថ្លែងក្នុងអំឡុងឆ្នាំ ១៩៧៩ លោក ហេង សំរិន បានថ្កោលទោសមិនបញ្ចេញឈ្នោះជំនួសដោយពាក្យវា។ លោកបន្តថា វានោះ បានប្រមែប្រមូល ប៉ុល ពត អៀង សារី លន់ ណុល អ៊ិន តាំ និងសម្ដេច សីហនុ ជាដើម សំដៅ បង្កើតរដ្ឋអំណាចមួយ និងប៉ុនប៉ងបង្កើតរបបប្រល័យពូជសាសន៍ឡើងវិញ។
ទោះយ៉ាងនេះក្តី លោក សម រង្ស៊ី ក៏បានសរសេរបន្ថែមនៅលើវីដេអូនោះថា នៅក្នុងសុន្ទរកថារបស់ សមមិត្ត ហេង សំរិន ឆ្នាំ១៩៧៩ បានជេរប្រមាថសម្ដេចព្រះបាទ នរោត្តម សីហនុ ហើយបានប្រៀបធៀបព្រះអង្គ ទៅនឹង ប៉ុល ពត ដែលត្រូវបានគេកាត់ទោសប្រហារជីវិត កំបាំងមុខ។
ទាក់ទងរឿងនេះ មន្ត្រីជាន់ខ្ពស់និងជាស្តរាសាស្ត្រគណបក្សសង្រ្គោះជាតិ លោក អេង ឆៃអ៊ាង យល់ថា ឃ្លីបវីដេអូដែលលោក សម រង្ស៊ី បានបង្ហោះនោះគ្រាន់តែចង់បង្ហាញពីមេដឹកនាំក្រោយរបបឆ្នាំ១៩៧៩ ថ្កោលទោសគ្នា។ លោកថា រឿងក្ដីក្ដាំរវាង លោក ហេង សំរិន និង លោក សម រង្ស៊ី គឺជារឿងគួរឲ្យអស់សំណើច។ «»
កាលពីថ្ងៃទី០៥ ខែសីហា មេធាវីការពារក្ដីអោយលោក ហេង សំរិន ប្រធានសភា គឺលោក គី ថ្លែងថា ការសម្រេចរបស់តុលាការក្រុងភ្នំពេញដែលឲ្យលោក សម រង្ស៊ី សងជំងឺចិត្ត លោក ហេង សំរិន ចំនួន១៥០លានរៀលនោះ មិនសាកសមនឹងការប៉ះពាល់កិត្តិយសរបស់លោក ហេង សំរិន នោះទេ។ «»
លោក គី តិច មេធាវីលោក ហេង សំរិន ប្រធានរដ្ឋសភា បានប្ដឹង លោក សម រង្ស៊ី ពីបទបរិហារកេរ្តិ៍ក្រោយពេលដែលប្រធានបក្សប្រឆាំងដែលកំពុងនិរទេសខ្លួនបានបង្ហោះនៅលើបណ្ដាញសង្គមហ្វេសប៊ុករបស់លោក កាលពីថ្ងៃទី១៧ ខែវិច្ឆិកា ២០១៥ ថា របបកើតឡើងក្រោយថ្ងៃ៧ មករា ១៩៧៩ បានឲ្យតុលាការរបស់គេកាត់ទោសប្រហារជីវិតសម្ដេច សីហនុ។
សាលក្រមសាលាដំបូងរាជធានីភ្នំពេញ បង្គាប់ឲ្យលោក សម រង្ស៊ី បង់ថវិកាចំនួន ១០លានរៀលជូនរដ្ឋ និង១៥០លានរៀលទៀតសងជំងឺចិត្តលោក ហេង សំរិន ប្រធានរដ្ឋសភា ពីបទបរិហារកេរ្តិ៍។
មិនមែនតែលោក ហេង សំរិន ជាអ្នកឈ្នះក្ដីទេ ដែលមិនពេញចិត្តការសម្រេចនេះ សូម្បីលោក សម រង្ស៊ី ដែលអ្នកចាញ់ក្ដីក៏មិនពេញចិត្តនឹងការសម្រេចរបស់សាលាដំបូងនេះដូចគ្នា។
លោកមេធាវី សំ សុគង់ បានប្ដឹងជំទាស់សាលក្រមសាលាដំបូងរាជធានីភ្នំពេញ កាលពី ថ្ងៃទី១ ខែសីហា ដើម្បីឲ្យសាលាឧទ្ធរណ៍ពិនិត្យពិចារណាបើកសវនាការជំទាស់សាលក្រមសាលាដំបូងរាជធានីភ្នំពេញ៕