ដោយ អ៊ុំ រង្សី RFA 2016-08-06
ប្រធានអង្គភាពប្រឆាំងអំពើពុករលួយ (ACU) លោកទេសរដ្ឋមន្ត្រី ឱម យ៉ិនទៀង បានប្រាប់អាស៊ីសេរី នៅថ្ងៃទី៦ ខែ សីហាថា កាលល្ងាចថ្ងៃសុក្រទី៥ សីហា អង្គភាពប្រឆាំងអំពើពុករលួយបានសម្រេចឃាត់ខ្លួនមន្ត្រីក្រឡាបញ្ជីតុលាការកំពូល១រូប ពាក់ព័ន្ធនឹងករណីពុករលួយ។
លោក ឱម យ៉ិនទៀង បន្តថា អង្គភាពប្រឆាំងអំពើពុករលួយ នឹងបញ្ជូនមន្ត្រីតុលាការរូបនេះ ទៅកាន់សាលាដំបូងរាជធានីភ្នំពេញ នៅម៉ោង៤រសៀល ថ្ងៃអាទិត្យខាងមុខ។ ប៉ុន្តែប្រធានអង្គភាព ប្រឆាំងអំពើពុករលួយរូបនេះ បដិសេធមិនទាន់អាចបញ្ចេញអត្តសញ្ញាណ មន្ត្រីក្រឡាបញ្ជីតុលាការកំពូល១រូបនោះ ថាឈ្មោះអ្វី ឬពាក់ព័ន្ធនឹងការប្រព្រឹត្តិរឿងរ៉ាវពុករលួយអ្វីប្រាកដនោះទេ ដោយលោកថា ស្ថិតក្នុងដំណាក់កាលស៊ើបអង្កេតនៅឡើយ។
បើទោះបីជា ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង មិនទាន់អាចបញ្ចេញ អត្តសញ្ញាណច្បាស់ មន្រ្តីក្រឡាបញ្ជីតុលាការកំពូល១រូប នោះនៅឡើយ ប៉ុន្តែតាមប្រភពសារព័ត៌មានក្នុងស្រុក ឲ្យដឹងថា មន្ត្រីក្រឡាបញ្ជីរូបនោះឈ្មោះ វ៉ាត ពិសិដ្ឋ ដែលទើបនឹងផ្លាស់ពីខេត្តប៉ៃលិន មកកាន់ការនៅតុលាការកំពូលកាលពីពេលថ្មីៗនេះ៕