ដោយ សាន សែល RFA 2016-08-08
នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ស៊ី.ស៊ី.អាយ.អិម (CCIM) លោក ប៉ា ងួនទៀង ប្រកាសថា លោកនឹងចូលបំភ្លឺនៅតុលាការនៅថ្ងៃទី១៨ សីហា ក្នុងនាមជាសាក្សីក្នុងសំណុំរឿងអនុប្រធានគណបក្សសង្គ្រោះជាតិ លោក កឹម សុខា ដែលគេចោទប្រកាន់ថាមានស្នេហាលួចលាក់ តបតាមការកោះហៅរបស់សាលាដំបូងរាជធានីភ្នំពេញ។
ចៅក្រមស៊ើបសួរនៃសាលាដំបូងរាជធានីភ្នំពេញ លោក ធាម ច័ន្ធពិសិដ្ឋ បានចេញដីកាកោះហៅលោក ប៉ា ងួនទៀង កាលពីថ្ងៃទី៣ សីហា ដែលគេទើបផ្សព្វផ្សាយនៅថ្ងៃទី៨ សីហា ឲ្យចូលធ្វើជាសាក្សី ជុំវិញដំណើររឿងសូកប៉ាន់សាក្សីតាមមាត្រា៥៤៨ នៃក្រមព្រហ្មទណ្ឌ។
គេហទំព័រផ្លូវការរបស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ដែលជាអង្គការក្រៅរដ្ឋាភិបាលមួយ មានគោលដៅលើកកម្ពស់អភិបាលកិច្ចបែបប្រជាធិបតេយ្យ និងការអនុវត្តសិទ្ធិមនុស្សក្នុងប្រទេសកម្ពុជា តាមការអភិវឌ្ឍបរិយាកាសប្រព័ន្ធផ្សព្វផ្សាយឯករាជ្យ។ ស៊ី.ស៊ី.អាយ.អិម ក៏គ្រប់គ្រងស្ថាប័នព័ត៌មាន វី.អូ.ឌី (VOD) ដែរ។
លោក ប៉ា ងួនទៀង ដែលអ្នករិះគន់ពីបញ្ហាសង្គម និងនយោបាយម្នាក់ផងនោះ ប្រាប់អាស៊ីសេរី នៅថ្ងៃទី៨ សីហា ថា លោកមិនយល់ពីមូលហេតុនៃការកោះហៅលោកឲ្យធ្វើជាសាក្សីនោះឡើយ។ លោកបញ្ជាក់ថា លោកមិនដែលជាប់ពាក់ព័ន្ធនឹងសំណុំរឿងនេះទេ៖ «»។
លោក ប៉ា ងួនទៀង ជាមនុស្សម្នាក់ក្នុងចំណោមអ្នកផ្ដួចផ្ដើមគំនិតរៀបចំយុទ្ធនាការ «ថ្ងៃច័ន្ទពណ៌ខ្មៅ» ដែលជាយុទ្ធនាការទាមទារឲ្យដោះលែងសកម្មជនការពារសិទ្ធិមនុស្ស និងមន្ត្រីជាន់ខ្ពស់របស់ គ.ជ.ប ឲ្យមានសេរីភាព។ លោក ប៉ា ងួនទៀង ក៏ជាអ្នកសកម្មជួយរៀបចំចាត់ចែងពិធីបុណ្យសពបណ្ឌិត កែម ឡី ផងដែរ។
ប្រធានការិយាល័យមេធាវីក្រុមអ្នកច្បាប់អមរិន្ទ្រ លោកមេធាវី សុក សំអឿន ចង់ដឹងពីភស្តុតាងជុំវិញការជាប់ពាក់ព័ន្ធរបស់លោក ប៉ា ងួនទៀង ក្នុងសំណុំរឿងនេះ៖ «»។
ចំណែកឯនាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា (CCHR) អ្នកស្រី ចក់ សុភាព ក៏មិនទាន់យល់ច្បាស់ពីទំនាក់ទំនងនេះនៅឡើយ។ អ្នកស្រីថ្លែងថា ប្រសិនបើករណីលោក ប៉ា ងួនទៀង ឈានដល់ការចាប់ចង វាបង្ហាញពីការយាយីដល់សកម្មជនសិទ្ធិមនុស្ស និងអ្នករិះគន់រដ្ឋាភិបាលក្នុងការបំពេញតួនាទីសម្រាប់សង្គម៖ «»។
អនុប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចប៉ុនប៉ងចាប់ខ្លួនកាលពីចុងខែឧសភា បន្ទាប់ពីលោកបដិសេធមិនចូលបំភ្លឺក្នុងនាមជាសាក្សី តាមការកោះហៅរបស់តុលាការ។
អាជ្ញាធរប្រកាសមិនឲ្យលោកចាកចេញពីកម្ពុជា ដោយស្ថិតក្រោមការតាមដាន។ អនុប្រធានគណបក្សសង្គ្រោះជាតិ កំពុងឃុំខ្លួនឯងក្នុងទីស្នាក់ការគណបក្សសង្គ្រោះជាតិ អស់រយៈពេលជាច្រើនខែហើយ៕