ដោយ ខែ សុណង RFA 2016-08-16
ក្រុមការងារបច្ចេកទេសរៀបចំតាក់តែងសេចក្ដីព្រាងច្បាប់ស្ដីពីសិទ្ធិទទួលព័ត៌មាន បានបើកកិច្ចប្រជុំលើកទី១០ នៅថ្ងៃទី១៦ ខែសីហា។ កិច្ចប្រជុំនេះ ក្រុមការងារបច្ចេកទេសបានផ្អាកការជជែកដេញដោលដោយសារមានចំណុចមួយចំនួននៃមាត្រាខ្លះនៃសេចក្ដីព្រាងច្បាប់នេះមិនទាន់ស្របគំនិតគ្នា។
ក្រសួងព័ត៌មាននឹងបង្កើតគណៈកម្មការចំពោះកិច្ចដើម្បីពិគ្រោះគ្នាស្វែងរកដំណោះស្រាយលើពាក្យគន្លឹះមួយចំនួនក្នុងសេចក្ដីព្រាងច្បាប់ស្ដីពីសិទ្ធិទទួលព័ត៌មាន ដែលក្រុមការងារនៅមានគំនិតប្រទាំងប្រទើសគ្នា។
រដ្ឋមន្ត្រីក្រសួងព័ត៌មាន លោក ខៀវ កាញរីទ្ធ មានប្រសាសន៍ថា ក្រុមការងារពិភាក្សានៅមិនទាន់យល់គ្នាទៅលើពាក្យពេចន៍ដែលបានចែងក្នុងមាត្រានៃសេចក្ដីព្រាងនេះ ដែលទាមទារឲ្យក្រុមការងារបច្ចេកទេសដកថយទៅពិភាក្សាគ្នាសិនមុននឹងជួបពិភាក្សាគ្នាម្ដងទៀត។
លោកថា ថ្វីត្បិតតែការជជែកគ្នាមួយព្រឹកមិនបានមួយមាត្រាក្ដី តែលោកពេញចិត្តចំពោះការដេញដោលរបស់ក្រុមការងារបច្ចេកទេសមុននឹងបញ្ជូនសេចក្ដីព្រាងច្បាប់នេះ ទៅប្រជុំអន្តរក្រសួង៖ «ថ្ងៃនេះយើងឃើញហើយតែមាត្រាមួយយើងធ្វើអត់ចេញផង ពីព្រោះដោយសារការមិនយល់គ្នាការមិនយល់បានថាតើទំហំ នៃរឿងនេះមានដល់ប៉ុណ្ណា? ឥឡូវនេះយើងបានសម្រេចថាមួយព្រឹក ហើយយើងបញ្ចប់ថាយើងនឹងបង្កើតគណៈកម្មការតូចមួយទៀត គេហៅថាគណៈកម្មការចំពោះកិច្ចដើម្បីពិគ្រោះស្វែងរកដំណោះស្រាយឲ្យមានទស្សនៈត្រូវគ្នាហើយបន្ទាប់មកយើងនឹងប្រជុំម្ដងទៀតស្វែងរកពាក្យគន្លឹះណាៗដើម្បីឲ្យសមស្រប»។
លោកថ្លែងនេះ នៅក្នុងកិច្ចប្រជុំលើកទី១០ នៃក្រុមការងារបច្ចេកទេសរៀបចំតាក់តែងសេចក្ដីព្រាងច្បាប់ស្ដីពីសិទ្ធិទទួលព័ត៌មាន នៅថ្ងៃទី១៦ ខែសីហា នៅសណ្ឋាគារភ្នំពេញ ដែលមានមន្ត្រីក្រសួងពាក់ព័ន្ធ តំណាងអង្គការសង្គមស៊ីវិល តំណាងអង្គការសហប្រជាជាតិ និងស្ថាប័នសារព័ត៌មានចូលរួម។
មាន៣ចំណុចដែលអ្នកពិភាក្សាដេញដោលខ្លាំងនៅក្នុងជំពូក៣ ស្ដីពីនីតិវិធីស្នើសុំ និងផ្ដល់ព័ត៌មានមាត្រា១៥ នៃសេចក្ដីព្រាងច្បាប់នេះ គឺអ្នកស្នើសុំមានចេតនាឆាឆៅរំខានដល់ប្រតិបត្តិការរបស់ស្ថាប័នសាធារណៈ ចំណុចបដិសេធន៍ដល់អ្នកស្នើសុំព័ត៌មានដដែលៗ ក្នុងរយៈពេលក្រោម ៤ខែ និងការជជែកដេញដោលគ្នាទៅលើចំណុច បុគ្គលប្រព្រឹត្តអំពើឆាឆៅរំខានដែលផ្ដន្ទាទោសដាក់ពន្ធនាគារពី១សប្ដាហ៍ទៅ១ខែ និងពិន័យជាប្រាក់ពី ១ម៉ឺនរៀល ទៅ ១សែនរៀល។ ក្រុមការងារពិភាក្សាយល់ថា ការចែងនេះ គឺជាការដាក់កំហិត និងប៉ះពាល់ដល់ផលប្រយោជន៍សាធារណជន និងអ្នកស្នើសុំ ឬអ្នកសារព័ត៌មាន។
មន្ត្រីតំណាងឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា (UN OHCHR-Cambodia) កញ្ញា វ៉ាន់ហ៊ី លី (Wan-Hea Lee) ដែលបានចូលរួមជជែកពិភាក្សាផ្ដល់យោបល់ក្នុងសេចក្ដីព្រាងច្បាប់នេះយល់ថា វាជាការជជែកមួយដែលអនុញ្ញាតឲ្យយើងបង្កើតក្រុមតូចៗធ្វើកិច្ចការលើចំណុចពិបាកនៃសេចក្ដីព្រាងច្បាប់ ដែលពាក់ព័ន្ធច្បាប់គោលស្ដីពីការស្នើសុំព័ត៌មាន។ មានផ្នែកខ្លះនៃច្បាប់នេះ ដែលត្រូវបែងចែកឲ្យដាច់ពីគ្នា ពិសេសការស្នើសុំព័ត៌មានដោយសមហេតុផល និងការងាររបស់ក្រសួងព័ត៌មាន និងមន្ត្រីរដ្ឋាភិបាលផ្សេងទៀត។
កញ្ញា វ៉ាន់ហ៊ី លី៖ «យើងតែងចង់ឃើញនូវភាពច្បាស់លាស់នៃច្បាប់នេះ។ ដូច្នេះ នៅពេលមាននីតិវិធីមួយច្បាស់លាស់សម្រាប់អ្នកស្នើសុំព័ត៌មាន វាបង្កភាពងាយស្រួលដល់អ្នកស្នើ ស្រួលអនុវត្តតាម។ ពេលមានហេតុផលច្បាស់លាស់ក្នុងការបដិសេធសំណើប្រជាពលរដ្ឋកាន់តែងាយស្រួលធ្វើតាម។ យើងនឹងបន្តតាមដាន និងចង់ឃើញភាពច្បាស់លាស់នៃច្បាប់នេះ»។
រដ្ឋមន្ត្រីក្រសួងព័ត៌មាន លោក ខៀវ កាញរីទ្ធ មិនរំពឹងទេថា នឹងអាចបញ្ចប់ការពិភាក្សានេះនៅត្រឹមឆ្នាំ២០១៦។ សេចក្ដីព្រាងច្បាប់ស្ដីពីសិទ្ធិទទួលព័ត៌មានមាន ៩ជំពូក និង ៣៦មាត្រា៕