មាស សុខជា ភ្នំពេញ ប៉ុស្តិ៍ Fri, 19 August 2016
ភ្នំពេញៈ គណបក្សប្រឆាំងនឹងរៀបចំអ្នកសង្កេតការណ៍ជាង ២០០០ នាក់ដើម្បីរង់ចាំសង្កេតមើលជនបរទេសដែលកាន់អត្តសញ្ញាណប័ណ្ណសញ្ជាតិខ្មែរទៅចុះឈ្មោះបោះឆ្នោតហើយប្រសិនបើរកឃើញថាពួកគេមិនមានព្រះរាជក្រឹត្យអ្នកសង្កេតការណ៍ត្រូវតែប្តឹងប្រឆាំងការចុះឈ្មោះរបស់ពួកគេ។
បន្ទាប់ពីបញ្ចប់សិក្ខាសាលាស្តីពីច្បាប់សញ្ជាតិ និងអន្តោប្រវេសន៍ដែលត្រូវបានរៀបចំឡើងនៅទីស្នាក់ការគណបក្សសង្គ្រោះជាតិកាលពីម្សិលមិញអ្នកនាំពាក្យគណបក្សសង្គ្រោះជាតិលោក យឹម សុវណ្ណ បានលើកឡើងដោយសំដៅទៅលើការខ្វះខាតនៃច្បាប់ស្តីពីសញ្ជាតិដែលចែងអំពីជនបរទេសកាន់អត្តសញ្ញាណប័ណ្ណសញ្ជាតិខ្មែរហើយពួកគេមានសិទ្ធិចុះឈ្មោះបោះឆ្នោត។ លោកបានប្រាប់ភ្នំពេញប៉ុស្តិ៍ថាការអនុញ្ញាតឲ្យជនបរទេសដែលកាន់អត្តសញ្ញាណប័ណ្ណសញ្ជាតិខ្មែរដែលមិនចេះនិយាយភាសាខ្មែរវាមិនគោរពទៅតាមស្មារតីនៃច្បាប់ស្តីពីសញ្ជាតិទេដោយសារច្បាប់មិនបានចែងអំពីសិទ្ធិជនបរទេសដែលមិនចេះនិយាយភាសាខ្មែរទៅចុះឈ្មោះបោះឆ្នោតបើទោះបីពួកគេកាន់អត្តសញ្ញាណប័ណ្ណសញ្ជាតិខ្មែរក៏ដោយ។ លោកបន្តថា៖ «ភ្នាក់ងារជាង ២០០០ នាក់របស់គណបក្សដែល [យើង] គ្រោងដាក់ពង្រាយទូទាំងប្រទេស [យើង] ចង់ឲ្យពួកគេឃ្លាំមើលបញ្ហានេះ»។ «ប្រសិនបើពិនិត្យឃើញថាជនបរទេសមកចុះឈ្មោះបោះឆ្នោតដោយមានអត្តសញ្ញាណប័ណ្ណប៉ុន្តែមិនមានព្រះរាជក្រឹត្យយើងឲ្យ [ភ្នាក់ងាររបស់យើង] ដាក់ពាក្យបណ្តឹងប្រឆាំងនឹងភាពមិនប្រក្រតីនៃឯកសារ»។
មាត្រា ៨ នៃច្បាប់ស្តីពីសញ្ជាតិចែងថាជនបរទេសដែលអាចសុំសញ្ជាតូបនីយកម្មបានត្រូវចេះនិយាយភាសាខ្មែរចេះអក្សរខ្មែរ និងយល់ដឹងពីប្រវត្តិសាស្រ្តខ្មែរខ្លះៗហើយបង្ហាញភ័ស្តុតាងច្បាស់ថាខ្លួនអាចរស់នៅក្នុងសង្គមខ្មែរបានដោយសុខដុមព្រមទាំងទទួលបាននូវទំនៀមទម្លាប់ និងប្រពៃណីល្អរបស់ខ្មែរ។ លោក យឹម សុវណ្ណ បានថ្លែងបន្តថា៖ «យើងនិយាយអំពី គ.ជ.ប. ដែលនិយាយថា [ជនបរទេស] ដែលមិនចេះនិយាយភាសាខ្មែរអាចចុះឈ្មោះបោះឆ្នោតបានឲ្យតែ [ពួកគេ] មានអត្តសញ្ញាណប័ណ្ណគំនិតនេះគឺមិនស្របទៅតាមស្មារតីនៃមាត្រា [៨] នៃច្បាប់ស្តីពីសញ្ជាតិទេ»។ «ដូច្នេះយើងក៏អាចរៀបចំដាក់ពាក្យបណ្តឹងបានដែរ»។
មាត្រា ៥ នៃច្បាប់ស្តីពីសញ្ជាតិចែងថាស្រ្តី ឬបុរសបរទេសដែលយកប្តី ឬប្រពន្ធខ្មែរដោយបានរៀបអាពាហ៍ពិពាហ៍អាចទាមទារសញ្ជាតិខ្មែរបានលុះត្រាតែស្រ្តី ឬបុរសនោះរស់នៅជាមួយគ្នារយៈពេលបីឆ្នាំក្រោយពេលចុះសំបុត្រអាពាហ៍ពិពាហ៍។ ការផ្តល់សញ្ជាតិខ្មែរតាមករណីទាមទារសញ្ជាតិត្រូវសម្រេចដោយព្រះរាជក្រឹត្យ។
មាត្រា ៧ នៃច្បាប់ស្តីពីសញ្ជាតិក៏ចែងផងដែរថាជនបរទេសអាចសុំចូលសញ្ជាតិខ្មែរបានដោយសញ្ជាតិតូបនីយកម្ម។ សញ្ជាតូបនីយកម្មមិនមែនជាសិទ្ធិរបស់អ្នកស្នើសុំឡើយគឺជាការអនុគ្រោះរបស់ព្រះរាជាណាចក្រកម្ពុជាតែប៉ុណ្ណោះ។ ទោះក្នុងប្រការណាក៏ដោយពាក្យសុំនោះអាចត្រូវបដិសេធចោលបានតាមអំណាចឆន្ទានុសិទ្ធិ។ ទោះយ៉ាងណាក្តីលោក សុវណ្ណ ថានេះគ្រាន់តែជាការរៀបចំរបស់គណបក្សសង្គ្រោះជាតិដើម្បីរង់ចាំមើលទិដ្ឋភាពការពិតប្រសិនបើជនបរទេសទាំងនោះមានអត្តសញ្ញាណប័ណ្ណដោយមានព្រះរាជក្រឹត្យដោយសារច្បាប់ចែងថាសញ្ជាតូបនីយកម្មត្រូវតែសម្រេចដោយព្រះរាជក្រឹត្យដូច្នេះគណបក្សសង្គ្រោះជាតិមិនទាន់ប្រឆាំងនឹងសេចក្តីសម្រេចរបស់គណៈកម្មាធិការជាតិរៀបចំការបោះឆ្នោតនៅឡើយទេ។
ប៉ុន្តែអ្នកនាំពាក្យ គ.ជ.ប. លោក ហង្ស ពុទ្ធា បានការពារសេចក្តីសម្រេចរបស់ខ្លួនចំពោះការអនុញ្ញាតឲ្យជនបរទេសចុះឈ្មោះបោះឆ្នោតដោយថ្លែងថា គ.ជ.ប. គឺគ្រាន់តែជាអ្នករៀបចំការចុះឈ្មោះបោះឆ្នោតដូច្នេះនៅពេលនរណាមានអត្តសញ្ញាណប័ណ្ណសញ្ជាតិខ្មែរ គ.ជ.ប. ត្រូវតែអនុញ្ញាតឲ្យគាត់ចុះឈ្មោះហើយប្រសិនបើមានបញ្ហាណាមួយវាជាការទទួលខុសត្រូវរបស់ក្រសួងមហាផ្ទៃ។
លោក ហង្ស ពុទ្ធា ថ្លែងបន្តថា៖ «ទោះយ៉ាងណាក្តី គ.ជ.ប. គឺជាស្ថាប័នមួយដែលអនុវត្តច្បាប់។ ប្រសិនបើច្បាប់ចែងថា [នរណាម្នាក់] មានអត្តសញ្ញាណប័ណ្ណអាចចុះឈ្មោះបាន គ.ជ.ប. នឹងចុះឈ្មោះឲ្យ [គាត់]»។
«ហើយប្រសិនបើមានភាពមិនប្រក្រតីសូម [គណបក្ស] ប្តឹងហើយការទទួលខុសត្រូវស្តីពីអត្តសញ្ញាណប័ណ្ណគឺជាតួនាទីរបស់ក្រសួងមហាផ្ទៃ»។ លោក ពុទ្ធា ក៏បានជំរុញឲ្យគណបក្សប្តឹងប្រឆាំងនឹងការចុះឈ្មោះផងដែរប្រសិនបើបុគ្គលណាមួយមិនមានលក្ខខណ្ឌគ្រប់គ្រាន់ក្នុងការចុះឈ្មោះបោះឆ្នោត។ ទន្ទឹមនេះលោក មេធាវី សុក សំអឿន បានថ្លែងថា៖ «គ.ជ.ប.បាននិយាយដូចនេះ [ជនបរទេសដែលមានអត្តសញ្ញាណប័ណ្ណចុះឈ្មោះ] គឺមិនខុសទេ។ ជាធម្មតា គ.ជ.ប. មិនមែនជាអ្នកចេញអត្តសញ្ញាណប័ណ្ណទេ។ អត្តសញ្ញាណប័ណ្ណក្រសួងមហាផ្ទៃជាអ្នកចេញ។ «ប្រសិនបើមានបញ្ហា គ.ជ.ប. មិនមែនជាអ្នកសម្រេចទេ។ បញ្ហាអត្តសញ្ញាណប័ណ្ណគឺនៅលើតុលាការ ក្រសួងមហាផ្ទៃ។ ខ្ញុំសូមឲ្យក្រសួងមហាផ្ទៃ និងគ.ជ.ប. និយាយគ្នាប្រសិនបើមានការជំទាស់ការសង្ស័យ»។
ប៉ុន្តែអ្នកនាំពាក្យក្រសួងមហាផ្ទៃលោក ខៀវ សុភ័គ បានដាក់ការទទួលខុសត្រូវ ទៅ គ.ជ.ប. នៅពេលមានបញ្ហាណាមួយកើតឡើងពីភាពមិនប្រក្រតីនៃការចុះឈ្មោះជនបរទេសដោយថ្លែងថា គ.ជ.ប. គឺជាអាជ្ញាកណ្តាលនៅក្នុងការបោះឆ្នោត។ ទោះយ៉ាងណាក្តីលោក សុភ័គ គាំទ្រ គ.ជ.ប. ដែលអនុញ្ញាតឲ្យជនបរទេសចុះឈ្មោះបោះឆ្នោតដោយអះអាងថាជនបរទេសដែលកាន់អត្តសញ្ញាណប័ណ្ណសញ្ជាតិខ្មែរទាំងអស់មានព្រះរាជក្រឹត្យ។
លោកបន្តថា៖ «មិនដែលមានអត្តសញ្ញាណប័ណ្ណរបស់នរណាម្នាក់មិនមានព្រះរាជក្រឹត្យទេ។ ឥឡូវប្រសិនបើមានអត្តសញ្ញាណប័ណ្ណរបស់នរណាមិនមានព្រះរាជក្រឹត្យសូមរក»។ «ឲ្យតែពួកគេ [មានអត្តសញ្ញាណប័ណ្ណ] ពួកគេមានព្រះរាជក្រឹត្យត្រឹមត្រូវ»។ លោក សុភ័គ ក៏បានចង្អុលបង្ហាញថាខ្មែរជាច្រើនដែលរស់នៅអូស្រ្តាលី បារាំង ក៏អាចបោះឆ្នោតបានដែរហេតុអ្វីជនបរទេសដែលកាន់អត្តសញ្ញាណប័ណ្ណសញ្ជាតិខ្មែរមិនអាចចុះឈ្មោះបោះឆ្នោតបាន៕ PS