ឡាយ សាមាន ភ្នំពេញ ប៉ុស្តិ៍ Fri, 26 August 2016
ភ្នំពេញៈ តំណាងរាស្ត្រគណបក្សសង្គ្រោះជាតិស្នើរដ្ឋមន្ត្រីក្រសួងមហាផ្ទៃចាត់វិធានការបញ្ឈប់កុំឱ្យមានការជួលដីខ្មែរនៅតាមបណ្តោយព្រំដែនទៅឲ្យវៀតណាមដើម្បីការពារបូរណភាពទឹកដីបន្ទាប់ពីគណបក្សនេះរកឃើញថាពលរដ្ឋវៀតណាមកំពុងធ្វើស្រែលើដីខ្មែរជិត ៥០០ ហិកតានៅក្នុងខេត្តស្វាយរៀង។
ការស្នើនេះធ្វើឡើងស្របពេលដែលវៀតណាមនៅតែផ្គើនមិនព្រមបញ្ឈប់ការសាងសង់ប៉ុស្តិ៍ និងធ្វើផ្លូវនៅតាមព្រំដែនទៅតាមសំណើរបស់កម្ពុជា។
លិខិតមួយច្បាប់របស់តំណាងរាស្រ្តគណបក្សសង្គ្រោះជាតិចំនួន ៥ រូបចុះថ្ងៃទី ២៣ ខែសីហាដែលផ្ញើជូនរដ្ឋមន្ត្រីក្រសួងមហាផ្ទៃលោក ស ខេង បានលើកឡើងថាបើទោះបីជាមានសារាចរណែនាំ និងប្រកាសរបស់លោកនាយករដ្ឋមន្ត្រី ហ៊ុន សែន ហាមជួលដីខ្មែរនៅតាមព្រំដែនទៅឱ្យជនជាតិវៀតណាមធ្វើស្រែក៏ដោយតែសកម្មភាពជួលដីនេះនៅតែបន្តមានតាមរូបភាពឱ្យជនជាតិខ្មែរធ្វើជាតំណាងដែលមានអាជ្ញាធរជួយបិទបាំង។
លិខិតបញ្ជាក់ថា៖ «ជាក់ស្តែងនៅឃុំទួលស្តី និងឃុំចន្ទ្រា ស្រុកចន្ទ្រា មានការជួលដីឲ្យប្រជាពលរដ្ឋវៀតណាមធ្វើស្រែចំនួន ១៩៦ ហិកតា (ឃុំទួលស្តី)និងចំនួន ២០០ ហិកតា (ឃុំចន្ទ្រា) ហើយនិងនៅសង្កាត់ប្រាសាទ ក្រុងបាវិតចំនួន ៤០ ហិកតា»។
ក្រុមតំណាងរាស្ត្រក៏បានស្នើឱ្យរដ្ឋមន្ត្រីក្រសួងមហាផ្ទៃចាត់វិធានការកុំឱ្យមានការជួលដីឱ្យវៀតណាមនៅតាមព្រំដែនបន្តទៅទៀតដោយបារម្ភខ្លាចបាត់បង់ទឹកដី។
ជាមួយគ្នានេះដែរប្រធានគណបក្សយុវជនកម្ពុជាលោក ពេជ្រ ស្រស់ បានបង្ហោះសារនៅលើហ្វេសប៊ុករបស់លោកថាគណបក្សនឹងធ្វើលិខិតផ្ញើទៅស្ថានទូតវៀតណាមដើម្បីឲ្យស្ថានទូតវៀតណាមបញ្ជាក់ឲ្យបានច្បាស់លាស់ជុំវិញការរំលោភបំពានទឹកដីកម្ពុជាពីរដ្ឋាភិបាលវៀតណាម។
លោកព្រមានថា បើវៀតណាមិនឆ្លើយតបនោះទេគណបក្សនឹងដឹកនាំពលរដ្ឋធ្វើបាតុកម្មប្រឆាំងនឹងវៀតណាម។
លោកថា៖ «គណបក្សនឹងដឹកនាំប្រជាពលរដ្ឋទូទាំងប្រទេសដើម្បីធ្វើបាតុកម្មនៅមុខស្ថានទូតវៀតណាម និងបាតុកម្មនៅមុខទីស្នាក់ការភ្នាក់ងារនៃអង្គការសហប្រជាជាតិប្រចាំកម្ពុជាដើម្បីទាមទារឲ្យរដ្ឋាភិបាលវៀតណាមបញ្ឈប់នូវសកម្មភាពរំលោភបំពានទឹកដីកម្ពុជា»។
ក្រសួងការបរទេសកម្ពុជាកាលពីថ្ងៃទី ១៨ ខែសីហា ឆ្នាំ ២០១៦ បានផ្ញើកំណត់ទូតជាថ្មីមួយទៀតដោយស្នើឲ្យវៀតណាមបញ្ឈប់សកម្មភាពនានារួមមានការជីកស្រះសង់ប៉ុស្តិ៍ និងធ្វើផ្លូវនៅតាមបន្ទាត់ព្រំដែននៅក្នុងខេត្តមណ្ឌលគិរី រតនគិរី ស្វាយរៀង កណ្តាល និងតាកែវ ជាដើមរហូតដល់គណៈកម្មការចម្រុះព្រំដែននៃប្រទេសទាំងពីរបានបញ្ចប់ការបោះខណ្ឌសីមាជាស្ថាពរនៅតំបន់នោះ។ ប៉ុន្តែទោះជាយ៉ាងណាវៀតណាមមិនព្រមបញ្ឈប់សកម្មភាពទៅតាមសំណើរបស់ភាគីកម្ពុជានោះឡើយ។
អ្នកនាំពាក្យក្រសួងមហាផ្ទៃលោក ខៀវ សុភ័គ ថ្លែងថាលោកមិនទាន់បានឃើញលិខិតរបស់តំណាងរាស្ត្រនោះទេ។ យ៉ាងណាក៏ដោយលោកថារដ្ឋាភិបាលមានតែវិធានការអប់រំពលរដ្ឋរស់នៅតាមព្រំដែនឱ្យបានយល់ពីផលវិបាកនៃការជួលដីទៅឱ្យពលរដ្ឋប្រទេសជិតខាងប៉ុណ្ណោះខណៈលោកថាមិនទាន់មានវិធានការផ្លូវច្បាប់នោះទេ។
លោកថា៖ «យើងមិនដឹងយកច្បាប់អីមកអនុវត្តព្រោះយើងមិនទាន់មានច្បាប់ចែងថាមិនឱ្យពលរដ្ឋជួលដីជាប់ព្រំដែនតែយើងនឹងសិក្សាតាមផ្លូវច្បាប់ថានឹងត្រូវធ្វើយ៉ាងម៉េច ឬអាចដូរដីឱ្យគាត់តែសំខាន់បំផុតមានតែវិធានការអប់រំទេ»។
បើតាមលោក សុភ័គ លោកនាយករដ្ឋមន្ត្រីធ្លាប់បានធ្វើលិខិតជាផ្លូវការមួយផ្ញើជូនរដ្ឋាភិបាលវៀតណាមសុំឱ្យឃាត់ពលរដ្ឋវៀតណាមមកជួលដីប្រជាពលរដ្ឋខ្មែរនៅតាមព្រំដែន។
ក្នុងករណីវៀតណាមនៅបន្តសាងសង់ប៉ុស្តិ៍ ឬសង់ផ្លូវចូលទឹកដីខ្មែរត្រូវបានលោក សុភ័គ សង្កត់ធ្ងន់ថា៖ «ក្រសួងការបរទេសយើងបានចេញកំណត់ការទូតជាបន្តបន្ទាប់តែវៀតណាមនៅតែព្រហើនធ្វើហើយគេនៅតែមិនស្តាប់នូវអ្វីដែលយើងតវ៉ាទៀតហើយគណៈកម្មការព្រំដែនយើងក៏ខិតខំដែរតែសំខាន់បំផុតទោះដោះស្រាយម៉េចក៏ដោយយើងត្រូវធ្វើឱ្យនៅតាមព្រំដែនមានសន្តិភាពចៀសវាងការដោះស្រាយប្រឈមដោយអាវុធ»។
អភិបាលរងខេត្តរតនគិរីលោក ញ៉ែម សំអឿន ថ្លែងថាខាងភាគីវៀតណាមនៅតែបន្តសង់ប៉ុស្តិ៍នៅតាមព្រំដែនទោះបីជាកម្ពុជាបានផ្ញើកំណត់ទូតឱ្យផ្អាកសិនក៏ដោយ។
លោកថា៖ «យើងធ្លាប់ហាមឃាត់ដែរតែវៀតណាមថាសាងសង់ក្នុងដីគេទោះសង់ក្នុងដីគេក៏ដោយតែយើងមានកិច្ចព្រមព្រៀងរវាងថ្នាក់ដឹកនាំទាំងពីរបានន័យថានៅតាមបន្ទាត់ព្រំដែនយើងមិនឱ្យមានការប្រែប្រួលស្ថានភាពដើមទេព្រោះយើងមិនទាន់កំណត់ព្រំសីមា»។
បើតាមលោក ញ៉ែម សំអឿន វៀតណាមលួចសាងសង់ប៉ុស្តិ៍ពេលអាជ្ញាធរកម្ពុជាមិននៅ។ លោកថា៖ «ពេលយើងចុះទៅគេអត់ធ្វើទេតែដល់ពេលយើងចេញគេធ្វើយើងបានឃាត់រហូតដែរហ្នឹងរហូតយើងចង់មានបញ្ហាជាមួយគ្នាទៅវិញទៅមក...បើតាមកម្លាំងប្រដាប់អាវុធវាសឹងតែមានប្រទូសរ៉ាយទៅហើយប៉ុន្តែមិនចង់ឱ្យមានរឿងនេះកើតឡើងទេទុកឱ្យថ្នាក់ជាតិដោះស្រាយ»។
ប្រធានក្រុមអ្នកស្រាវជ្រាវកិច្ចការព្រំដែននៃរាជបណ្ឌិត្យសភាលោក សុខ ទូច បានថ្លែងថាមូលហេតុចម្បងដែលពលរដ្ឋខ្មែរបន្តជួលដីឱ្យវៀតណាមដោយសារពលរដ្ឋខ្មែរខ្លួនឯងមានភាពខ្ជិលច្រអូស និងមិនមានការលើកទឹកចិត្តពីរដ្ឋាភិបាល។
លោកថា៖ «កាលខ្ញុំចុះស្រាវជ្រាវសួរមួយណាក៏ឆ្លើយថាខ្វះទឹក ខ្វះទីផ្សារ ខ្វះបច្ចេកទេសអ៊ីចឹងយើងចោទសួរមកវិញហេតុអីវៀតណាមជួលយើងចំណេញដោយសារគេព្យាយាមទោះបីជាផលបានតិចជារបស់គេតែកម្ពុជាយើងហៅថាសេដ្ឋីកសិករមានន័យថាគាត់ជួលគេភ្ជួរ ជួលគេបាញ់ថ្នាំ ជួលគេដាំ ជួលគេដក អ៊ីចឹងដល់ពេលប្រមូលផលវាបានចំណេញតិច អ៊ីចឹងគាត់លែងចង់ធ្វើម្ចាស់គេសុខចិត្តទៅធ្វើកម្មករឱ្យវៀតណាមដដែល »។
ចំណែករឿងវៀតណាមបន្តសង់ប៉ុស្តិ៍នៅតំបន់ស លោកថាគ្រាន់តែជាល្បិចវៀតណាមចង់បំបែកបំបាក់ខ្មែរខណៈលោកអំពាវឱ្យខ្មែរចេះសាមគ្គីគ្នា។
លោកថ្លែងថា៖ «រឿងនេះវាជាល្បិចវៀតណាមថ្លឹងថ្លែងក្នុងនយោបាយទេ ទីមួយគណបក្សប្រឆាំង ឬប្រជាជនដែលស្អប់គណបក្សប្រជាជនតែងនិយាយថាអាយ៉ងយួនអ៊ីចឹងនៅពេលកម្ពុជាមិនគាំទ្របញ្ហាសមុទ្រចិនខាងត្បូង វៀតណាមចាប់ផ្តើមបង្កើនស្ថានភាពនេះដើម្បីថ្លែងសារនយោបាយដើម្បីឱ្យខ្មែរបែកបាក់គ្នាឱ្យប្រឈមដាក់គ្នា»។
តែលោកសង្កត់ធ្ងន់ថាទោះបីជាវៀតណាមខិតខំសង់ប៉ុស្តិ៍យ៉ាងណាក៏ដោយតែផែនទីដែលកំណត់ព្រំប្រទល់រវាងកម្ពុជា និងវៀតណាមនៅតែជាផែនទីមិនអាចរំលោភបានទេ។
ប្រធានគណៈកម្មការព្រំដែនកម្ពុជាលោក វ៉ា គឹមហុង សុំមិនអត្ថាធិប្បាយលម្អិតជុំវិញវៀតណាមបន្តសង់ប៉ុស្តិ៍នៅតាមព្រំដែនទេតែលោកថាគណៈកម្មការព្រំដែនទាំងពីរនឹងបើកកិច្ចប្រជុំមួយនៅថ្ងៃចន្ទសប្តាហ៍ក្រោយដើម្បីពិភាក្សាពីរឿងចម្រូងសម្រាសនេះ៕