ដោយ ហង្ស សាវយុត RFA 2016-08-28
ពលរដ្ឋខ្លះដែលកំពុងមានទំនាស់ដីធ្លីនៅតាមបណ្ដាខេត្តភាគឧត្តរ យល់ថា ដំណើរចុះសួរសុខទុក្ខរបស់លោកនាយករដ្ឋមន្ត្រី ហ៊ុន សែន នៅតាមបណ្ដាខេត្តជាច្រើននោះ គឺមិនអាចរកឃើញទុក្ខលំបាករបស់ពលរដ្ឋ ហើយជួយដោះស្រាយបញ្ហាឲ្យពិតប្រាកដទេ។
ការអះអាងដូចនេះ ដោយសារតែគេយល់ថា រាល់ដំណើរចុះសួរសុខទុក្ខរបស់លោកនាយករដ្ឋមន្ត្រីទៅតាមបណ្ដាខេត្តនីមួយៗ គឺចុះទៅតាមតែអាជ្ញាធរមូលដ្ឋានរៀបចំទុក ចំណែកកន្លែងដែលពលរដ្ឋមានបញ្ហាដីធ្លីស្មុគស្មាញ គឺអាជ្ញាធរមិនត្រឹមតែមិនរៀបចំឲ្យលោកនាយករដ្ឋមន្ត្រីចុះទៅប៉ុណ្ណោះទេ ថែមទាំងរៀបចំកម្លាំងសមត្ថកិច្ចរារាំងមិនឲ្យពលរដ្ឋបានជួបនាយករដ្ឋមន្ត្រីទៀតផង។
តើការអះអាងរបស់ពលរដ្ឋបែបនេះជាការពិត ឬក៏យ៉ាងណា?
តំណាងពលរដ្ឋដែលមានទំនាស់ដីធ្លីនៅភូមិចំនួន៥ របស់សង្កាត់កូនក្រៀល ក្រុងសំរោង ខេត្តឧត្តរមានជ័យ ប្រមាណជិត ៣០នាក់ សម្ដែងការខកចិត្ត ដោយសារតែពួកគេបានប្រឹងប្រែងគ្រប់មធ្យោបាយដើម្បីស្កាត់រកជួបលោកនាយករដ្ឋមន្ត្រី ហ៊ុន សែន តែមិនបានសម្រេច។
ការខកចិត្ត បានស្ដែងចេញបន្ទាប់ពីកាលពីថ្ងៃទី២៦ ខែសីហា លោកនាយករដ្ឋមន្ត្រី ហ៊ុន សែន បានចំណាយពេលជាច្រើនម៉ោងចុះទៅសួរសុខទុក្ខពលរដ្ឋនៅតាមតំបន់ជាច្រើនរបស់ខេត្តឧត្តរមានជ័យ ក៏ប៉ុន្តែសហគមន៍ទំនាស់ដីធ្លីជាច្រើនកន្លែង មិនត្រូវបានអាជ្ញាធរអនុញ្ញាតឲ្យចូលជួបដើម្បីសម្ដែងកង្វល់ និងស្វែងរកដំណោះស្រាយទេ។
តំណាងប្រជាពលរដ្ឋនៅភូមិអូរបាត់មាន់ សង្កាត់កូនក្រៀល ដែលបាត់បង់ដីធ្លីជាង ២០០គ្រួសារ គឺលោកស្រី ហួយ ម៉ៃ។ លោកស្រីអះអាងថា គាត់បានប្រឹងប្រែងពេញមួយថ្ងៃទី២៦ ខែសីហា ដោយធ្វើដំណើរចម្ងាយដីជាង ២០គីឡូម៉ែត្រ បំណងស្កាត់ជួបមុខលោកនាយករដ្ឋមន្ត្រី ហ៊ុន សែន ដែលចុះទៅជួបប្រជាពលរដ្ឋនៅទីរួមខេត្តឧត្តរមានជ័យ។ លោកស្រីខំរៀបចំឯកសារជាច្រើនពាក់ព័ន្ធនឹងករណីទំនាស់ដីធ្លីជាមួយក្រុមហ៊ុន អង្គរ ស៊ូហ្គើ (Angkor Sugar) រយៈពេល ៧ឆ្នាំមកហើយនោះ ដើម្បីទុកប្រគល់ជូនលោកនាយករដ្ឋមន្ត្រីឲ្យជួយដោះស្រាយ ក៏ប៉ុន្តែបំណងរបស់លោកស្រីបែរជាខកចិត្ត ពីព្រោះតែកម្លាំងសមត្ថកិច្ចបានដាក់ពង្រាយនៅតាមដងផ្លូវរារាំង ព្រមទាំងបញ្ជូនពួកគាត់ទៅសាកសួរនៅឯអធិការដ្ឋាននគរបាលក្រុងសំរោង ផងនោះ៖ «ខ្ញុំទៅនោះខ្ញុំមានបំណងល្អ ដើម្បីចង់ជួបសម្ដេច ពីព្រោះខ្ញុំមិនដែលបានជួបមុខគាត់ផ្ទាល់ផង។ ទី២ ខ្ញុំក៏ចង់ឲ្យសម្ដេចជួយជំរុញចៅហ្វាយខេត្តឧត្តរមានជ័យ ឲ្យពន្លឿនការដោះស្រាយដីនៅភូមិអូរបាត់មាន់ មកឲ្យពួកខ្ញុំវិញ»។
ទោះបីជាយ៉ាងណា អាស៊ីសេរី មិនអាចទាក់ទងអធិការនគរបាលក្រុងសំរោង និងស្នងការនគរបាលខេត្តឧត្តរមានជ័យ ដើម្បីសុំការអធិប្បាយជុំវិញរឿងដែលអ្នកភូមិចោទប្រកាន់ថា បានរារាំងពួកគេមិនឲ្យចូលជួបលោកនាយករដ្ឋមន្ត្រី ហ៊ុន សែន បានថាយ៉ាងនៅឡើយនៅថ្ងៃទី២៨ ខែសីហា។
ចំណែកអភិបាលខេត្តឧត្តរមានជ័យ លោក ស ថាវី មិនជឿថា អ្នកភូមិអូរបាត់មាន់ ជាង ២០០គ្រួសារដែលមានទំនាស់ដីធ្លីជាមួយក្រុមហ៊ុន អង្គរ ស៊ូហ្គើ (Angkor Sugar) រយៈពេល ៧ឆ្នាំមកហើយនោះ អាចលើកគ្នាមកជួបលោកនាយករដ្ឋមន្ត្រីទេ ពីព្រោះកាលពីសប្ដាហ៍មុន លោកបានជួបអ្នកភូមិទីនោះ ព្រមទាំងសន្យាថា នឹងដោះស្រាយដីធ្លីជូនវិញផង។ លោក ស ថាវី បដិសេធថា ក្នុងពេលដែលលោកនាយករដ្ឋមន្ត្រី ហ៊ុន សែន ចុះជួបប្រជាពលរដ្ឋនៅខេត្តឧត្តរមានជ័យ កាលពីថ្ងៃទី២៦ ខែសីហា គឺមិនមានសមត្ថកិច្ចណាបានហាមឃាត់ប្រជាពលរដ្ឋ មិនឲ្យជួបនោះឡើយ ពីព្រោះតែប្រមុខរដ្ឋាភិបាលដែលខំចំណាយពេលជាច្រើនមកកាន់ខេត្តជាប់ជាយដែនខ្មែរ-ថៃ ក៏ដោយសារតែចង់ជួបពលរដ្ឋគ្រប់រូប៖ «ហ្នឹងខ្ញុំបានណែនាំជាមួយអ្នកភូមិអូរបាត់មាន់ បានយល់គ្នាហើយ គឺមិនមានអ្នកភូមិអូរបាត់មាន់ ណាមកតវ៉ាទៀតទេ។ ខ្ញុំមិនដឹងថា អ្នកភូមិមកពីខាងណាទៀត ដែលចង់ជួបសម្ដេច គឺខ្ញុំមិនទាន់បានទទួលព័ត៌មានទេ»។
បើទោះជាយ៉ាងណាក៏ដោយ តំណាងអ្នកភូមិអូរបាត់មាន់ ម្នាក់ទៀត លោក គន់ សំរិទ្ធ នៅតែអះអាងថា រូបលោក ព្រមទាំងតំណាងប្រជាពលរដ្ឋដែលមានទំនាស់ដីធ្លីមកពីច្រើនភូមិទៀត ពិតជាបានលើកគ្នាទៅស្កាត់ជួបលោកនាយករដ្ឋមន្ត្រី ហ៊ុន សែន ហើយត្រូវបានប៉ូលិសរារាំងមែន។ លោក គន់ សំរិទ្ធ បញ្ជាក់ថា ពេញមួយថ្ងៃទី២៦ ខែសីហា រូបលោក ព្រមទាំងតំណាងអ្នកភូមិតាម៉ាន ភូមិត្រពាំងវែង ភូមិបុស្ស និងភូមិឈូកមាស ដែលសុទ្ធតែមានទំនាស់ដីធ្លីប្រមាណ ៣០នាក់ បានធ្វើដំណើរតាមគោយន្តទៅស្កាត់រកជួបលោកនាយករដ្ឋមន្ត្រីដល់ក្រុងសំរោង។ នៅពេលដែលប៉ូលិសរារាំង គឺពួកលោកបានបំបែកគ្នា ៦នាក់ខំស្កាត់តាមរកជួបលោកនាយករដ្ឋមន្ត្រីទៀត រហូតដល់បំបែកនៅសល់គ្នា ៣នាក់ តែទីបំផុតបានត្រឹមតែប៉ូលិសនៃអធិការដ្ឋានក្រុងសំរោង ហៅចូលទៅក្នុងប៉ុស្តិ៍ដើម្បីសាកសួរ៖ «សម្រាប់ខ្ញុំជាពលរដ្ឋខ្មែរមួយរូប គឺមានការខកចិត្ត ពីព្រោះគ្រាន់តែចង់ជួបថ្នាក់ដឹកនាំឲ្យជួយដោះស្រាយទុក្ខកង្វល់រឿងជម្លោះដីធ្លី បែរជាគ្មានសិទ្ធិជួប»។
មិនមែនមានតែប្រជាពលរដ្ឋខ្លះនៅខេត្តឧត្តរមានជ័យ ប៉ុណ្ណោះទេ ដែលខកចិត្តក្នុងការស្កាត់ជួបលោកនាយករដ្ឋមន្ត្រី ហ៊ុន សែន ក្នុងពេលដែលចុះសួរសុខទុក្ខនៅតាមបណ្ដាខេត្តនោះ សូម្បីតែសហគមន៍ទំនាស់ដីធ្លីនៅខេត្តព្រះវិហារ និងខេត្តសៀមរាប ក៏បានសម្ដែងការខកចិត្តដូចគ្នាដែរ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ ឲ្យដឹងថា កាលពីថ្ងៃទី២៥ ខែសីហា កន្លងទៅ លោកនាយករដ្ឋមន្ត្រី ហ៊ុន សែន បានអញ្ជើញទៅខេត្តព្រះវិហារ។ នៅក្នុងពេលដែលលោក ហ៊ុន សែន មានវត្តមាននៅខេត្តនោះ គឺសហគមន៍ទំនាស់ដីធ្លីជនជាតិដើមភាគតិចនៅឃុំប្រមេរ ស្រុកត្បែងមានជ័យ ដែលកំពុងមានទំនាស់ជាមួយក្រុមហ៊ុនចិន ព្រមទាំងសហគមន៍ឃុំសង្កែ២ ស្រុកឆែប ក៏ខកចិត្តដែរ ពីព្រោះមិនបានជួបនាយករដ្ឋមន្ត្រីទេ។
ចំណែកនៅឯខេត្តសៀមរាប កាលពីថ្ងៃទី២២ ខែសីហា កន្លងទៅ គឺលោកនាយករដ្ឋមន្ត្រី ហ៊ុន សែន ក៏បានចុះសួរសុខទុក្ខដែរ។ កាលណោះមានសហគមន៍ចុងកៅស៊ូ ដែលមានទំនាស់ដីធ្លីជាមួយអាជ្ញាធរអប្សរាជាច្រើននាក់ បានលើកគ្នាស្កាត់រកជួបលោកនាយករដ្ឋមន្ត្រី ហ៊ុន សែន ក៏ប៉ុន្តែមិនបានសម្រេចទេ ពីព្រោះអាជ្ញាធរបានទៅបន្ទច់បង្អាក់ ហើយចរចាថាថ្នាក់ខេត្តនឹងប្រឹងប្រែងដោះស្រាយជូន។
ក្រុមសង្គមស៊ីវិល បានវិភាគថា បច្ចុប្បន្ន បើទោះបីជាលោកនាយករដ្ឋមន្ត្រី ហ៊ុន សែន កំពុងប្រឹងប្រែងតាមរយៈការចុះជួបប្រជាពលរដ្ឋនៅតាមបណ្ដាខេត្តដើម្បីសួរសុខទុក្ខ និងជួយដោះស្រាយបញ្ហាទាំងឡាយក៏ដោយ ក៏វាមិនប្រាកដជាបានជួយដោះស្រាយទុក្ខលំបាករបស់ពលរដ្ឋពិតទាំងអស់ទេ ពីព្រោះតែកន្លែងខ្លះ គឺអាជ្ញាធរមូលដ្ឋាននៅតែលាក់បាំង ព្រមទាំងមិនអនុញ្ញាតឲ្យអ្នកភូមិដែលមានបញ្ហាពិតប្រាកដ បានជួបជាមួយប្រមុខរដ្ឋាភិបាលដើម្បីដោះស្រាយដោយសុឆន្ទៈពិតប្រាកដនៅឡើយ៕