ភ្នំពេញ: រសជាតិគុយទាវទូកបែបថៃ ជាមួយសម្បកគាវបំពង នៅតែដិតដាមក្នុងចំណូលចិត្តយុវវ័យ។
ប្ដូរពីស្ទីលញ៉ាំគរចាន បច្ចុប្បន្ន អាហារដ្ឋាន ម៉ៅសេទុង ដែលមានការរចនាហាងបែបសាមញ្ញ តែទាន់សម័យនោះ បានរក្សារសជាតិដ៏ឆ្ងាញ់ដដែលនេះនៅក្នុងចានគោមធំមួយដែលអាចឲ្យអតិថិជនញ៉ាំមួយចម្អែតតែម្ដងក្នុងតម្លៃតែ ៨ ពាន់រៀល។
មិនត្រឹមតែលក់នូវគុយទាវទូកប៉ុណ្ណោះទេ ថ្មីៗនេះអាហារដ្ឋាន ម៉ៅសេទុង ក៏មានបើកបម្រើអាហារពេលព្រឹកដូចជាបាយស្រូប បាយសាច់ជ្រូក បាយសាច់មាន់អាំង បាយផាក់ឡូវ គុយទាវ មីគាវ គុយទាវតុមយ៉ាំ និងគុយទាវជើងជ្រូក។
សម្រាប់អាហារថ្ងៃត្រង់ អាហារដ្ឋាន ម៉ៅសេទុង មានបម្រើនូវអាហារចម្អិនស្រាប់ដូចជា ខជើងជ្រូក ត្រីប្រម៉ាចំហុយពងទា ត្រីចៀនជួន សម្លកកូរ និងទឹកគ្រឿងជាដើម សម្រាប់សិស្សនិស្សិត និងបុគ្គលិកបម្រើការក្បែរៗនោះទទួលទានជាមួយបាយ។
ដោយឡែក នៅពេលរសៀលបន្តិច អាហារដ្ឋាន ម៉ៅសេទុង ក៏មានលក់នូវគាវបំពង ប្រហិតអាំង ប្រហិតត្រីបំពង និងប្រហិតត្រីឈីងចាំង ដែលមួយប្រអប់មានតម្លៃ ១ ម៉ឺនរៀល។
អាហារទាំងបីពេលនេះអាចទទួលទានជាមួយទឹកសណ្ដែកសលាយចាហួយខ្មៅរសជាតិឆ្ងាញ់ ដែលជាស្នាដៃធ្វើផ្ទាល់ពីហាងនេះផងដែរ។
អាហារដ្ឋាន ម៉ៅសេទុង មានអាសយដ្ឋានផ្ទះលេខ ២៣៦ មហាវិថីម៉ៅសេទុង ជាប់ធនាគារ May Bank រាជធានីភ្នំពេញ៕
