Shaun Turton and ម៉ិច ដារ៉ា ភ្នំពេញ ប៉ុស្តិ៍
Tue, 13 September 2016
ភ្នំពេញៈ សមាជិកគណបក្សសង្គ្រោះជាតិវ័យក្មេងបីនាក់ដែលភ័យខ្លាចការចាប់ខ្លួនដែលបានគេចចេញពីប្រទេសកម្ពុជាកាលពីឆ្នាំមុនបន្ទាប់ពីជាប់ពាក់ព័ន្ធនៅក្នុងករណីសមាជិកព្រឹទ្ធសភាលោក ហុង សុខហួរ បានទៅដល់ប្រទេសបារាំងហើយបន្ទាប់ពីការស្នាក់នៅក្នុងប្រទេសហ្វីលីពីនដែលជាទីកន្លែងពួកគេស្នើសុំសិទ្ធិជ្រកកោននៅប្រទេសលោកខាងលិច។
បើទោះបីជាភ្នំពេញប៉ុស្តិ៍មិនអាចបញ្ជាក់ថាអ្នកទាំងបីនាក់ត្រូវបានផ្តល់ឲ្យនូវសិទ្ធិជ្រកកោន ឬអត់នោះក៏ដោយប្រភពនៅលើហ្វេសប៊ុក ប្រភពពីសមាជិកគ្រួសារ និងប្រភពពីគណបក្សបានបញ្ជាក់ថាក្រុមអ្នកទាំងបីនាក់នេះបានចាកចេញពីទីក្រុងម៉ានីលកាលពីសប្តាហ៍មុន និងបានជិះយន្តហោះតាមប្រទេសចិន។
លោក សម្បត្តិ សត្យា អាយុ ២៥ ឆ្នាំ និង លោក ចុង លាងអឹង អាយុ ២០ ឆ្នាំជាអ្នករដ្ឋបាលកាន់ទំព័រហ្វេសប៊ុករបស់ប្រធានគណបក្សសង្គ្រោះជាតិលោក សម រង្ស៊ី ខណៈបងប្អូនប្រុសរបស់ សត្យា ឈ្មោះ ដាវីត ជាជំនួយការផ្ទាល់របស់លោក សុខហួរ ដែលជាសមាជិកព្រឹទ្ធសភារបស់គណបក្ស សម រង្ស៊ី។
អ្នកទាំងបីនាក់បានឡើងយន្តហោះទៅប្រទេសថៃកាលពីខែសីហាឆ្នាំមុនបន្ទាប់ពីមានឈ្មោះជាប់ពាក់ព័ន្ធនឹងករណីញុះញង់ និងករណីក្លែងបន្លំសន្ធិសញ្ញាព្រំដែនបំពេញបន្ថែមកម្ពុជា វៀតណាម ក្នុងសំណុំរឿងលោក សុខហួរ ដែលត្រូវបានចាប់ខ្លួននៅខែនោះបន្ទាប់ពីបានបង្ហោះវីដេអូមួយនៅលើទំព័រហ្វេសប៊ុករបស់លោក សម រង្ស៊ី។
យ៉ាងហោចណាស់ពីរនាក់ក្នុងចំណោមអ្នកទាំងបីនាក់គឺលោក សត្យា និង លោក លាង អឹង ត្រូវបានដាក់ឈ្មោះជាបន្តបន្ទាប់នៅក្នុងដីកាមួយថាជាអ្នកឃុបឃិតនៅក្នុងករណីនោះ។ ទន្ទឹមនោះលោក សុខហួរ ត្រូវបានជាប់ពន្ធនាគារចាប់តាំងពីពេលនោះមក។
ថ្លែងកាលពីម្សិលមិញបងប្អូនស្រីរបស់លោក ដាវីត និងលោក សត្យា អ្នកនាង សម្បត្តិ រស់ម៉ារីយ៉ា បានបញ្ជាក់ថាអ្នកនាងបានដឹងថាអ្នកទាំងពីរបានទទួលទិដ្ឋាការចូល ឬធ្វើការនៅក្នុងប្រទេសបារាំងប៉ុន្តែមិនដឹងថា តើពួកគេទទួលបានឯកសារប្រភេទអ្វីទេ។
បើទោះបីជារីករាយនៅពេលឃើញបងប្អូនរបស់អ្នកនាងមានសុវត្ថិភាពអ្នកនាងបានថ្លែងថាអ្នកទាំងពីរបានចាកចេញពីគ្រួសាររបស់ខ្លួនហើយនៅកំពុងឈឺចាប់នៅឡើយ។
អ្នកនាង រស់ម៉ារីយ៉ា បានថ្លែងថា៖ «ពួកគេមានអារម្មណ៍ឯកកា... វាខុសពីការរស់នៅក្នុងពន្ធនាគារយ៉ាងហោចណាស់ពួកគេអាចដើរហើរដោយសេរី»។
អ្នកនាងបន្តថា៖ «ពួកគេបារម្ភអំពីសុខភាពរបស់ម្តាយខ្លួន... [ប៉ុន្តែ] យើងជំរុញឲ្យពួកគេតស៊ូពីព្រោះមានមេដឹកនាំ និងអ្នកលើកទឹកចិត្ត និងគាំទ្រពួកគេ»។
ស្ថានទូតបារាំងកាលពីម្សិលមិញបានបដិសេធធ្វើអត្ថាធិប្បាយអំពីករណីនេះហើយលោកស្រីអ្នកនាំពាក្យស្ថានទូតបារាំងថ្លែងថាករណីបែបនេះគឺ «ត្រូវរក្សាការសម្ងាត់»។
តំណាងពីឧត្តមស្នងការអង្គការសហប្រជាជាតិសម្រាប់ជនភៀសខ្លួនដែលកាលពីដំបូងបានផ្តល់ជំនួយដល់អ្នកទាំងបីនាក់ក្នុងអំឡុងការរត់គេចខ្លួននេះកាលពីម្សិលមិញបានបង្វែរសំណួរទៅអាជ្ញាធរបារាំង។
នៅលើហ្វេសប៊ុកលោក ដាវីត បានថ្លែងថាលោកនឹកគ្រួសាររបស់លោក។ លោកបានបន្តថា៖ «នៅទីក្រុងប៉ារីសអាកាសធាតុត្រជាក់បន្តិចប៉ុន្តែខ្ញុំមានអារម្មណ៍ត្រជាក់ខ្លាំងនៅពេលខ្ញុំនៅឆ្ងាយពីមនុស្សជាទីស្រឡាញ់របស់ខ្ញុំ។ ខ្ញុំនឹកអ្នកទាំងអស់គ្នាខ្លាំងណាស់រួមទាំងម៉ាក់ ប៉ា និងបងប្អូនប្រុសស្រី»។
ចៅក្រមស៊ើបសួរសាលាដំបូងរាជធានីលោក កែវ វ៉ាន់ឌី ដែលចេញដីកាបង្គាប់ឲ្យសមត្ថកិច្ចតាមចាប់ខ្លួនលោក សត្យា និងលោក លាងអ៊ឹង បានបដិសេធធ្វើអត្ថាធិប្បាយលើបញ្ហានេះកាលពីម្សិលមិញ។
សកម្មជនទាំងនេះបានរត់គេចខ្លួនទៅក្រៅប្រទេសបន្ទាប់ពីមានការចាប់ខ្លួនលោក ហុង សុខហួរ៕