ដោយ ឡេង ម៉ាលី RFA 2016-10-03
សវនាការរបស់អង្គជំនុំជម្រះសាលាដំបូងនៃសាលាក្ដីខ្មែរក្រហម ដែលតែងចាប់ផ្ដើមនៅថ្ងៃច័ន្ទ ដើមសប្ដាហ៍ នឹងមិនមានសវនាការទេនៅព្រឹកថ្ងៃច័ន្ទ ទី៣ តុលា។
ប្រធានអង្គជំនុំជម្រះសាលាដំបូង លោកចៅក្រម យ៉ា សុខន ប្រកាសកាលពីមុនថ្ងៃឈប់សម្រាកបុណ្យភ្ជុំបិណ្ឌថា អង្គជំនុំជម្រះនឹងបន្តសវនាការរបស់ខ្លួនឡើងវិញនៅថ្ងៃអង្គារ ទី៤ ខែតុលា។ សវនាការនោះ អង្គជំនុំជម្រះនឹងស្ដាប់អ្នកជំនាញមួយរូបទៀតពាក់ព័ន្ធនឹងបទបញ្ជានៃការរៀបការនៅក្នុងរបបកម្ពុជាប្រជាធិបតេយ្យ។
ក្នុងអង្គហេតុនេះដែរ គ្រប់ភាគីក្នុងសំណុំរឿង០០២ វគ្គ២ បានចាត់ទុកដើមបណ្ដឹងរដ្ឋប្បវេណីថ្មីដែលមានលេខកូដ 2-PTCCP-1064 ថាមានសារសំខាន់ទាក់ទងនឹងបញ្ជានៃការរៀបការនោះ។
អង្គជំនុំជម្រះបានផ្អាកសវនាការចាប់តាំងពីថ្ងៃទី២២ កញ្ញា តាមការស្នើសុំរបស់មេធាវីការពារក្ដីជនជាប់ចោទទាំងពីរក្រុម គឺ នួន ជា និង ខៀវ សំផន។ មេធាវីការពារក្ដីជនជាប់ចោទលើកហេតុផលថា ភាគីខ្លួនមិនទាន់ក្ដាប់ព័ត៌មានដើមបណ្ដឹងរដ្ឋប្បវេណីថ្មីរូបនេះឡើយ ព្រោះឯកសារមិនទាន់បានបកប្រែជាភាសាបារាំង និងអង់គ្លេសនៅឡើយ៕