ដោយ ផាន់ យ៉ាស៊ី RFA 2016-10-03
សហគមន៍បុរីកីឡា បន្តធ្វើយុទ្ធនាការថ្ងៃច័ន្ទពណ៌ខ្មៅនៅថ្ងៃទី៣ តុលា។ យុទ្ធនាការថ្ងៃនេះមិនមានការរារាំងពីកម្លាំងអាជ្ញាធរទេ។ អ្វីដែលប្លែកនោះ គឺនៅសហគមន៍បុរីកីឡា មានការចូលរួមពីក្មេងៗ។ ពួកគេប្រើស្កុតខ្មៅមកបិទលើមាត់។
តំណាងសហគមន៍បុរីកីឡា លោកស្រី ស ស៊ន ប្រាប់ថា ស្កុតខ្មៅដែលយកមកបិទមាត់ពួកគាត់នោះ មានន័យថា ការបំបិទសិទ្ធិសេរីភាពក្នុងការបញ្ចេញមតិ។
ចំណែកសហគមន៍បឹងកក់ មិនបានប្រមូលផ្ដុំគ្នាដូចសប្ដាហ៍កន្លងទៅឡើយនៅថ្ងៃច័ន្ទ ទី៣ តុលា ដោយសារពួកគាត់រវល់ទៅស្រុកកំណើតក្នុងឱកាសពិធីបុណ្យភ្ជុំបិណ្ឌ តែពួកគាត់នឹងបង្ហោះសារទាមទារយុត្តិធម៌នៅលើបណ្ដាញសង្គមហ្វេសប៊ុក (facebook) ជំនួសវិញ។
សហគមន៍មានទំនាស់ដីធ្លីធ្វើយុទ្ធនាការថ្ងៃច័ន្ទពណ៌ខ្មៅ ក្នុងគោលបំណងទាមទារឲ្យរដ្ឋាភិបាលទម្លាក់ចោលការចោទប្រកាន់ និងដោះលែងមន្ត្រីសិទ្ធិមនុស្សសមាគមអាដហុក (ADHOC) ៤រូប និងអគ្គលេខាធិការរង គ.ជ.ប លោក នី ចរិយា ដែលត្រូវបានតុលាការចោទប្រកាន់ពីបទសូកប៉ាន់សាក្សី និងបទសមគំនិតសូកប៉ាន់សាក្សី ពាក់ព័ន្ធរឿងអាស្រូវស្នេហារវាងលោក កឹម សុខា និងអ្នកនាង ខុម ចាន់តារាទី ហៅ ស្រីមុំ។
សូមរង់ចាំអាន ឬស្ដាប់ព័ត៌មានបន្ថែមនៅក្នុងកម្មវិធីផ្សាយយប់នេះ!