ដោយ រដ្ឋា វិសាល RFA 2016-10-05
ព្រះរាជអាជ្ញាអមសាលាដំបូងខេត្តមណ្ឌលគិរី ចេញដីកាកោះហៅជនជាតិដើមភាគតិចព្នង ពីរគ្រួសារ ដែលបានដាក់ពាក្យប្ដឹងទាមទារឲ្យបញ្ឈប់ការលក់ដីសហគមន៍ពីសំណាក់ជនជាតិដើមភាគតិចព្នង ៩គ្រួសារមកសាកសួរនៅថ្ងៃទី៧ តុលា។ ការកោះហៅនេះ ខណៈដែលជនជាតិដើមភាគតិចព្នង ៩គ្រួសារ រួមជាមួយអាជ្ញាធរមូលដ្ឋាន គ្រោងចុះហត្ថលេខាលើឯកសារទិញលក់ដីសហគមន៍នោះ។
ជនជាតិដើមភាគតិចព្នង ពីរគ្រួសាររស់នៅភូមិពូតាំង សង្កាត់រមនា ក្រុងសែនមនោរម្យ ខេត្តមណ្ឌលគិរី ប្រកាន់ជំហរទាមទារមិនឲ្យសហគមន៍ជនជាតិដើមភាគតិចក្នុងភូមិ លក់ដីភូមិចាស់ដែលជាដីកម្មសិទ្ធិសមូហភាពរបស់សហគមន៍។
ការអះអាងនេះ ធ្វើឡើងនៅថ្ងៃទី៥ ខែតុលា មុនពីរថ្ងៃដែលមន្ត្រីអយ្យការអមសាលាដំបូងខេត្តមណ្ឌលគិរី កោះហៅជនជាតិដើមភាគតិចទាំងពីរគ្រួសារជាលើកទីបី ដើម្បីសាកសួរពីរឿងប្ដឹងទាមទារឲ្យបញ្ឈប់ការលក់ដូរដីភូមិចាស់ជាកម្មសិទ្ធិរបស់រដ្ឋ។
ជនជាតិដើមភាគតិចព្នង ម្នាក់ក្នុងចំណោមពីរនាក់ដែលមន្ត្រីអយ្យការកោះហៅ គឺលោក ណាន ដានី បញ្ជាក់ថា ភាគីដើមចោទយល់ព្រមបែងចែកដីភូមិចាស់ដែលសមាជិកសហគមន៍បានដាំដុះជាក់ស្តែង ដើម្បីប្រើប្រាស់ជាលក្ខណៈប្រពៃណី ក៏ប៉ុន្តែមិនយល់ព្រមឲ្យយកដីនោះលក់ទៅឲ្យអ្នកក្រៅសហគមន៍ឡើយ។ លោកថា ពីរលើកហើយដែលមន្ត្រីអយ្យការកោះហៅដើមបណ្ដឹងឲ្យចូលទៅបំភ្លឺ និងតទល់ផ្ទាល់ជាមួយភាគីចុងចោទជាអ្នកលក់ដី ដើម្បីសម្របសម្រួលបញ្ហានេះ៖ «»។
មន្ត្រីអយ្យការអមសាលាដំបូងខេត្តមណ្ឌលគិរី បានចេញដីកាចំនួនពីរផ្សេងគ្នា កោះហៅឈ្មោះ ណាន ដានី និងឈ្មោះ ជ្រើច ជ្រោយ ជាដើមបណ្ដឹងឲ្យចូលទៅបំភ្លឺនៅការិយាល័យអយ្យការនៅថ្ងៃទី៧ ខែតុលា។
ព្រះរាជអាជ្ញាសាលាដំបូងខេត្តមណ្ឌលគិរី លោក ឡុង ហុងម៉េង បញ្ជាក់ថា រឿងក្តីនេះទាក់ទិនជនជាតិដើមភាគតិចព្នង ៩គ្រួសារ បានព្រមព្រៀងគ្នាលក់ដីភូមិចាស់មួយកន្លែង ដែលដើមបណ្ដឹងកំពុងកាន់កាប់ដីមួយចំណែកនៃដីភូមិចាស់នោះ។ លោកថា ដោយសារដីនោះមិនមានប័ណ្ណកម្មសិទ្ធិ ដូច្នេះរឿងក្តីនេះមិនឋិតក្រោមចំណាត់ការរបស់ស្ថាប័នអយ្យការទេ ក៏ប៉ុន្តែលោកព្យាយាមសម្របសម្រួលវិវាទនេះក្រៅប្រព័ន្ធតុលាការ ដើម្បីស្វែងរកដំណោះស្រាយសន្តិវិធីតាមការព្រមព្រៀងរបស់ភាគីទាំងពីរ ជាពិសេសគឺបែងចែកដីសម្រាប់សមាជិកសហគមន៍គ្រប់ៗគ្នាប្រើប្រាស់៖ «»។
កាលពីខែឧសភា ជនជាតិដើមភាគតិចព្នង ភូមិពូតាំង ពីរគ្រួសារ បានដាក់ពាក្យប្ដឹងអនុប្រធានភូមិពូតាំង គឺលោក ញើម ប៊ុនទិត សមាជិកក្រុមប្រឹក្សាសង្កាត់រមនា គឺលោក ក្រោន ស្រើល ប្រជាពលរដ្ឋភូមិពូតាំង គឺលោក សាវឿន ណារ៉ួ និងតំណាងអ្នកទិញដីឈ្មោះ ម៉ាប់ ទៅស្ថាប័នអយ្យការ ទាមទារឲ្យបញ្ឈប់គម្រោងទិញលក់ដីភូមិចាស់របស់សហគមន៍។
មន្ត្រីសម្របសម្រួលសមាគមអាដហុក (ADHOC) ខេត្តមណ្ឌលគិរី លោក សុក រដ្ឋា គាំទ្រការស្វែងរកដំណោះស្រាយក្រៅប្រព័ន្ធតុលាការរបស់មន្ត្រីអយ្យការ ដើម្បីបញ្ចប់ជម្លោះផ្ទៃក្នុងសហគមន៍ ក៏ប៉ុន្តែលោកអំពាវនាវសុំឲ្យអាជ្ញាធរមូលដ្ឋានបញ្ឈប់ចេញលិខិត ឬឯកសារទិញលក់ដីភូមិចាស់សហគមន៍ ដែលជាទ្រព្យសម្បត្តិរបស់រដ្ឋ៖ «»។
អាជ្ញាធរសង្កាត់រមនា កាលពីខែឧសភា បានរៀបចំឯកសារផ្ទេរកម្មសិទ្ធិលក់ដីភូមិចាស់ជនជាតិដើមភាគតិចភូមិពូតាំង ដោយសំអាងថា សមាជិកសហគមន៍ ៩គ្រួសារក្នុងចំណោម ១២គ្រួសារ បានផ្តិតមេដៃយល់ព្រមលក់ដីនោះ។
ដីអតីតភូមិចាស់សហគមន៍ភូមិពូតាំង មានទំហំជិត ៣០ហិកតារ ស្ថិតនៅតំបន់ជើងភ្នំរឡាណោងយាល់។ បច្ចុប្បន្ន ដីតំបន់នោះសមាជិកសហគមន៍បីគ្រួសារបានដាំចេក ខ្នុរ ស្វាយចន្ទី និងធ្វើស្រែនៅលើដីអតីតភូមិចាស់សហគមន៍ជាង ១៨ហិកតារ ដោយសារដីនោះត្រូវសហគមន៍ទុកចោលមិនប្រើប្រាស់៕