ដោយ ដែន អយុធ្យា RFA 2016-10-10
ម្ចាស់ក្រុមហ៊ុនកប៉ាល់ ឬទូកដឹកភ្ញៀវទេសចរចេញទៅកម្សាន្តតាមកោះមួយចំនួននាខេត្តព្រះសីហនុ ប្រកាសបញ្ចុះតម្លៃលក់សំបុត្រទូកជូនភ្ញៀវជាតិ និងអន្តរជាតិ ឬប្រជាពលរដ្ឋដែលមានបំណងចង់ទៅកម្សាន្តតាមកោះនានាចាប់ពីថ្ងៃទី៨ ខែតុលា តទៅ។
ពួកគេអះអាងថា ការបញ្ចុះតម្លៃលក់សំបុត្រទូកនាឱកាសនេះ ប្រយោជន៍ដើម្បីចូលរួមចំណែកកាត់បន្ថយភាពក្រីក្រជូនប្រជាពលរដ្ឋ ជាពិសេសចង់ផ្តល់ឱកាសជូនពលរដ្ឋ មន្ត្រីរាជការមានប្រាក់ចំណូលទាប អាចមានឱកាសចេញទៅកម្សាន្តតាមកោះ។
ប្រធានក្រុមហ៊ុនទូកដឹកភ្ញៀវទេសចរចេញទៅកម្សាន្តតាមកោះមួយចំនួន បានអះអាងថា ក្រោយពិនិត្យឃើញចំនួនភ្ញៀវទេសចរជាតិ និងអន្តរជាតិ ពិសេសភ្ញៀវជាតិដែលចូលមកទស្សនាខេត្តព្រះសីហនុ បានថយចុះយ៉ាងគំហុកគួរឲ្យព្រួយបារម្ភនារដូវបុណ្យភ្ជុំបិណ្ឌប្រពៃណីជាតិឆ្នាំនេះ ពួកគេបានជូនដំណឹងពីការបញ្ចុះតម្លៃលក់សំបុត្រជូនភ្ញៀវទេសចរ ដែលពីមុនសំបុត្រ ១សន្លឹកមានតម្លៃ ១០ដុល្លារសហរដ្ឋអាមេរិក បានចុះមកត្រឹម ៦ដុល្លារវិញចាប់ពីថ្ងៃទី៨ ខែតុលា ឆ្នាំ២០១៦ តទៅ។
ប្រធានក្រុមហ៊ុន ជី.ធី.វី.ស៊ី ស្ពីដប៊ូត កម្ពុជា (GTVC Speed Boat) លោកឧកញ៉ា ទៀ វិចិត្រ ស្ថិតក្នុងចំណោមក្រុមហ៊ុនទូកទេសចរណ៍ផ្សេងទៀត ផ្តល់សម្ភាសឲ្យអាស៊ីសេរី តាមទូរស័ព្ទនៅថ្ងៃសៅរ៍ ទី៨ ខែតុលា ថា មូលហេតុដែលក្រុមហ៊ុននេះបញ្ចុះតម្លៃសំបុត្រជូនភ្ញៀវទេសចរពេលនេះ ប្រយោជន៍ដើម្បីចូលរួមកៀរគរឲ្យភ្ញៀវទេសចរចូលមកទស្សនាខេត្តនេះបានច្រើនឡើងវិញ។
លោកបន្ថែមថា ការបញ្ចុះតម្លៃលក់សំបុត្រទូកនេះ ក៏មានបំណងចូលរួមចំណែកកាត់បន្ថយភាពក្រីក្រជូនប្រជាពលរដ្ឋជាមួយប្រមុខរាជរដ្ឋាភិបាល ជាពិសេសចង់ផ្តល់ឱកាសជូនប្រជាពលរដ្ឋខ្មែរ ឬមន្ត្រីរាជការដែលមានប្រាក់ចំណូលទាប អាចឲ្យពួកគាត់មានឱកាសចេញទៅកម្សាន្តនៅតាមកោះនានាជាមួយក្រុមគ្រួសារ ដូចគ្នានឹងអ្នកមានប្រាក់ចំណូលខ្ពស់ដែរ។
លោក ទៀ វិចិត្រ ក៏បានឲ្យដឹងដែរថា ប្រាក់ចំណូលមួយផ្នែកដែលក្រុមហ៊ុន ជី.ធី.វី.ស៊ី ស្ពីដប៊ូត កម្ពុជា ទទួលបានពីការលក់សំបុត្រជូនភ្ញៀវទេសចរកន្លងមក បានបរិច្ចាគជូនដល់គ្រួសារក្រីក្រ ចាស់ជរាបាត់បង់កម្លាំងពលកម្ម ជាពិសេសផ្តល់អំណោយសប្បុរសជូនដល់អង្គការមួយចំនួនដែលធ្វើការងារពាក់ព័ន្ធជាមួយកុមារកំព្រា ឬកុមារអនាថាជាដើម ដើម្បីលើកទឹកចិត្តឲ្យពួកគេបានទទួលការអប់រំ និងមានអាហារទទួលទាន។ ជាងនេះទៅទៀត នៅថ្ងៃអនាគត ក្រុមហ៊ុននេះក៏នឹងនៅតែបន្តផ្តល់ថវិកា និងសម្ភារៈសប្បុរសធម៌ដូចគ្នានេះ ដើម្បីចែករំលែកដល់អ្នកខ្វះខាតតទៅទៀត៖ «ការបញ្ចុះតម្លៃលក់សំបុត្រទូករបស់ក្រុមហ៊ុនខ្ញុំនេះ គឺមានបំណងឲ្យប្រជាពលរដ្ឋខ្មែរ ក៏ដូចជាភ្ញៀវទេសចរជាតិ អន្តរជាតិ ទាក់ទាញឲ្យពួកគាត់ចូលមកទស្សនាខេត្តព្រះសីហនុ ឬតំបន់កោះឲ្យបានច្រើននៅពេលខាងមុខ ព្រោះក្នុងរយៈពេលចុងក្រោយនេះ ខេត្តយើងបានបាត់ភ្ញៀវទេសចរច្រើនបំផុត ដែលចូលទៅកម្សាន្តតាមកោះនានា ហើយជួនកាលការបាត់ភ្ញៀវនេះ ក៏អាចបណ្ដាលមកពីកត្តាតម្លៃលក់សំបុត្រទូកខ្ពស់នេះដែរ។ ការបញ្ចុះតម្លៃលក់សំបុត្រទូករបស់ក្រុមហ៊ុនខ្ញុំនេះ គឺឃើញមានការគាំទ្រច្រើនពីប្រជាពលរដ្ឋ ហើយភ្ញៀវទេសចរក៏សប្បាយចិត្ត ជាពិសេសសម្រាប់ប្រជាពលរដ្ឋ ឬយុវជនដែលមានប្រាក់ចំណូលទាប ហើយចង់ចេញទៅកម្សាន្តនៅតាមកោះនានា អាចមានឱកាសទាំងអស់គ្នា»។
ទាក់ទិនបញ្ហានេះ ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹស្នា ស្វាគមន៍ចំពោះការបញ្ចុះតម្លៃលក់សំបុត្រទូកជូនភ្ញៀវទេសចរ ចេញទៅកម្សាន្តតាមកោះនានារបស់ក្រុមហ៊ុនទូកទេសចរណ៍មួយចំនួននៅពេលនេះ។ លោកយល់ថា ការបញ្ចុះតម្លៃលក់សំបុត្រទូកចេញទៅកម្សាន្តតាមកោះនៅពេលនេះ វាជាសិទ្ធិក្នុងការស្វែងរកអតិថិជនគាំទ្ររបស់ក្រុមហ៊ុនដឹកជញ្ជូននីមួយៗនៅលើទីផ្សារសេរី។ យ៉ាងណា លោក គ្រឹស្នា ស្នើឲ្យបណ្ដាក្រុមហ៊ុនទូកទេសចរណ៍ទាំងអស់ ត្រូវប្រកួតប្រជែងទៅលើតម្លៃលក់សំបុត្រជូនភ្ញៀវទេសចរ អាចឲ្យក្រុមហ៊ុនទាំងអស់ទទួលយកបានទាំងអស់គ្នា ហើយមធ្យោបាយដឹកជញ្ជូន ឬទូកដឹកភ្ញៀវទេសចរទាំងនោះត្រូវតែមានគុណភាព ដើម្បីធានាដល់សុវត្ថិភាពអ្នកធ្វើដំណើរនៅលើលំហសមុទ្រឲ្យមានស្តង់ដារត្រឹមត្រូវ៖ «ក្នុងនាមយើងជាស្ថាប័នគ្រប់គ្រង ឬស្ថាប័នជំនាញ យើងក៏ត្រូវធ្វើការគ្រប់គ្រងទៅលើការកំណត់តម្លៃលក់សំបុត្រទូកទេសចរណ៍នេះដែរ ធ្វើម៉េចឲ្យគ្រប់ក្រុមហ៊ុនទាំងអស់អាចទទួលយកបានទាំងអស់គ្នា ជាពិសេសធ្វើយ៉ាងណាកុំឲ្យប៉ះពាល់ដល់ឧស្សាហកម្មនៃសេវាកម្មវិស័យទេសចរណ៍នោះទេ។ ការបញ្ចុះតម្លៃនេះ អាចមានការសប្បាយចិត្តចំពោះប្រជាពលរដ្ឋ ឬភ្ញៀវទេសចរ ហើយម្ចាស់ក្រុមហ៊ុនទូកទេសចរណ៍ទាំងនោះ ក៏ត្រូវធានាបាននូវគុណភាព និងនិរន្តរភាពរបស់ពួកគេនាថ្ងៃអនាគត»។
បញ្ហានេះដែរ លោក ជួន ណារិន្ទ ស្នងការនគរបាលខេត្តព្រះសីហនុ ក៏ស្វាគមន៍ការបញ្ចុះតម្លៃលក់សំបុត្រចេញទៅកម្សាន្តតាមកោះរបស់ម្ចាស់ក្រុមហ៊ុនទូកទេសចរណ៍មួយចំនួន ពិសេសក្រុមហ៊ុន ជី.ធី.វី.ស៊ី ស្ពីដប៊ូត កម្ពុជា ដែលកំពុងបម្រើសេវាទេសចរណ៍លើមធ្យោបាយដឹកជញ្ជូននៅលើលំហសមុទ្រនាឱកាសនេះ។ លោកសង្កត់ធ្ងន់ថា រាល់កប៉ាល់ ឬទូកដឹកភ្ញៀវទេសចរ ទោះក្រុមហ៊ុនតូច ឬក្រុមហ៊ុនធំក្តី គឺមុននឹងអនុញ្ញាតឲ្យដឹកអ្នកដំណើរចេញពីដីគោក ឆ្ពោះទៅកាន់កោះនានា សមត្ថកិច្ចលោកបានទាមទារឲ្យមានបំពាក់សម្ភារៈសុវត្ថិភាពដើម្បីសង្គ្រោះ មានដូចជាអាវពោង និងត្រូវត្រួតពិនិត្យបច្ចេកទេសទូក ឬកប៉ាល់ជាដើម ឲ្យបានត្រឹមត្រូវជាមុន ទើបអនុញ្ញាតឲ្យចាកចេញពីឆ្នេរសមុទ្រ៖ «តាមការត្រួតពិនិត្យមធ្យោបាយទូកដឹកភ្ញៀវទេសចររបស់ក្រុមហ៊ុន ជី.ធី.វី.ស៊ី ស្ពីដប៊ូត កម្ពុជា ដែលមានការបញ្ចុះតម្លៃលក់សំបុត្រពេលនេះ គឺមានប្រភេទទូកនាំចូលថ្មី មានបំពាក់សម្ភារៈសង្គ្រោះពេលជួបគ្រោះអាសន្ននៅលើលំហសមុទ្រទំនើប និងទាន់សម័យ ព្រមទាំងអ្នកបើកបរកប៉ាល់ ឬទូកមានបទពិសោធន៍ និងមានប័ណ្ណបើកបរត្រូវត្រឹម អាចជាទីទុកចិត្តសម្រាប់ភ្ញៀវទេសចរជាតិអន្តរជាតិ ដែលមកទទួលសេវាដឹកជញ្ជូនតាមរយៈក្រុមហ៊ុននេះ ព្រោះកន្លងមក កម្លាំងនគរបាលជើងទឹកនៃស្នងការដ្ឋាននគរបាលខេត្តព្រះសីហនុ មុននឹងអនុញ្ញាតឲ្យទូកដឹកអ្នកដំណើរក្រុមហ៊ុនចេញពីផែ គឺត្រូវត្រួតពិនិត្យលក្ខណៈបច្ចេកទេសម៉ាស៊ីន និងសម្ភារៈផ្សេងៗបានត្រឹមត្រូវ»។
ចំណែកអ្នកស្រី ជៀប សុធារី មន្ត្រីសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ ក៏បានគាំទ្រការបញ្ចុះតម្លៃលក់សំបុត្រពី ១០ដុល្លារមកត្រឹម ៦ដុល្លារដើម្បីរួមចំណែកកៀរគរឲ្យកំណើនភ្ញៀវទេសចរ ឲ្យចូលមកទស្សនាខេត្តនេះបានច្រើនថែមទៀត។ យ៉ាងនេះក្តី អ្នកស្រីស្នើឲ្យការបញ្ចុះតម្លៃលក់សំបុត្រទូកចេញទៅកម្សាន្តតាមកោះនានា មានកោះរ៉ុងសន្លឹម និងកោះរ៉ុង ជាដើម របស់ក្រុមហ៊ុន ជី.ធី.វី.ស៊ី និងក្រុមហ៊ុនផ្សេងទៀត ត្រូវឲ្យមានរយៈពេលយូរអង្វែង៖ «បើសិនក្រុមហ៊ុនទូកដឹកភ្ញៀវទេសចរ ជី.ធី.វី.ស៊ី ស្ពីដប៊ូត នេះបញ្ចុះតម្លៃរយៈពេលវែង មិនធ្វើការដំឡើងតម្លៃក្នុងរយៈពេលខ្លី ប្រជាពលរដ្ឋនឹងមានការរីករាយសប្បាយចិត្តជាមួយការបញ្ចុះតម្លៃនេះ ហើយរូបខ្ញុំជាប្រជាពលរដ្ឋម្នាក់ និងជាតំណាងឲ្យមន្ត្រីសង្គមស៊ីវិលក្នុងខេត្តនេះ នឹងគាំទ្រ។ ជាងនេះ ប្រសិនបើក្រុមហ៊ុនផ្សេងៗទៀតអាចបញ្ចុះតម្លៃលក់សំបុត្រដូចក្រុមហ៊ុនទូកទេសចរណ៍មួយនេះទៀត នឹងនាំឲ្យកំណើនភ្ញៀវទេសចរកើនខ្ពស់នៅក្នុងពិធីបុណ្យសមុទ្រ និងបុណ្យឆ្លងឆ្នាំសកលដាច់ឆ្នាំ២០១៦ នេះនាខេត្តព្រះសីហនុ ជាក់ជាមិនខាន»។
យ៉ាងណាក៏ដោយចុះ ប្រធានក្រុមហ៊ុន ជី.ធី.វី.ស៊ី ស្ពីដប៊ូត កម្ពុជា លោកឧកញ៉ា ទៀ វិចិត្រ បានអះអាងថា ការបញ្ចុះតម្លៃលក់សំបុត្រជូនភ្ញៀវទេសចរ គឺជាការបញ្ចុះតម្លៃក្នុងរយៈពេលវែង មិនកំណត់ពេលវេលាទេ ប្រយោជន៍ដើម្បីផ្តល់ឱកាសដល់ប្រជាពលរដ្ឋខ្មែរ ឬភ្ញៀវទេសចរជាតិ អាចមានឱកាសចេញទៅកម្សាន្តតាមកោះ ឬចូលមកទស្សនាខេត្តព្រះសីហនុ បានច្រើន។ ជាងនេះ ក៏ដើម្បីចង់ចូលរួមចំណែកជាមួយប្រមុខដឹកនាំរាជរដ្ឋាភិបាល ដែលបានអំពាវនាវដល់វិស័យឯកជន ចូលរួមបំផុសសកម្មភាពផ្សេងៗ ដើម្បីកៀរគរឲ្យកំណើនភ្ញៀវទេសចរជាតិ និងអន្តរជាតិ ឲ្យចូលមកប្រទេសកម្ពុជា ឬចូលមកទស្សនាមូលដ្ឋានខេត្ត-ក្រុងនានាបានកាន់តែច្រើនពីមួយឆ្នាំទៅមួយឆ្នាំ ដើម្បីឈានដល់កាត់បន្ថយភាពក្រីក្រជូនប្រជាពលរដ្ឋនៅទូទាំងប្រទេសកម្ពុជា៕