ដោយ អ៊ុំ រង្សី RFA 2016-10-10
ក្រសួងបរិស្ថាន និងសហព័ន្ធស្រូវអង្ករកម្ពុជា បានចុះអនុស្សរណៈនៃការយោគយល់គ្នាស្ដីពីការ «វាយតម្លៃហេតុប៉ះពាល់បរិស្ថាន»។ ស្ថាប័នទាំងពីរនេះអះអាងថា ការចុះអនុស្សរណៈនៃការយោគយល់គ្នានេះ ដើម្បីបង្ហាញការអនុវត្តគោលនយោបាយរបស់រាជរដ្ឋាភិបាលកម្ពុជា ក្នុងការនាំអង្ករចេញ បង្កើនគុណភាពអង្ករនៅកម្ពុជា ដែលគ្មានសារជាតិគីមី និងមានការជឿជាក់ពីអតិថិជន។
ក្រសួងបរិស្ថាន និងសហព័ន្ធស្រូវអង្ករកម្ពុជា អះអាងថា កិច្ចព្រមព្រៀងស្ដីពី «ការវាយតម្លៃហេតុប៉ះពាល់បរិស្ថាន» គឺដើម្បីធានាដល់កិច្ចការពារបរិស្ថាននៅក្នុងឧស្សាហកម្មស្រូវអង្ករ ដែលមិនធ្វើឲ្យប៉ះពាល់ដល់សោភណភាព បរិស្ថានក្នុងទឹក និងសុខភាពមនុស្ស ពិសេសបង្កើនទំនុកចិត្តដល់អ្នកបរិភោគ ព្រមទាំងទាក់ទាញតម្រូវការទីផ្សារក្នុងស្រុក និងក្រៅស្រុក។
កិច្ចព្រមព្រៀង ឬអនុស្សរណៈនៃការយោគយល់គ្នានេះ (MOU) ដែលត្រូវបានចុះហត្ថលេខានៅថ្ងៃទី៧ ខែតុលា នោះរួមមាន៖
- ការអនុវត្តគោលនយោបាយរបស់រាជរដ្ឋាភិបាលកម្ពុជា ក្នុងការនាំអង្ករចេញឲ្យបាន ១លានតោនក្នុងមួយឆ្នាំ
- ជំរុញលើកទឹកចិត្ត និងការគិតគូរខ្ពស់ដល់កសិករសហគ្រិន និងវិនិយោគិន ក្នុងការផលិតអង្ករសម្រាប់ការនាំចេញទៅក្រៅប្រទេស
- បង្កើនគុណភាពអង្ករនៅកម្ពុជា ដែលគ្មានសារជាតិគីមី និងមានការជឿជាក់ពីអតិថិជន
- ធានាការចូលរួមអភិវឌ្ឍរោងម៉ាស៊ីនកិនស្រូវ និងកែច្នៃអង្ករប្រកបដោយនិរន្តរភាពបរិស្ថាន។
ខ្លឹមសារនៃកិច្ចព្រមព្រៀងនេះ ត្រូវបានសហព័ន្ធស្រូវអង្ករកម្ពុជា បានប្រកាសឲ្យដឹងតាមបណ្ដាញសង្គមហ្វេសប៊ុក (Facebook) នៅថ្ងៃទី៨ ខែតុលា។
រដ្ឋមន្ត្រីក្រសួងបរិស្ថាន លោក សាយ សំអាល់ មានប្រសាសន៍ឲ្យដឹងតាមសេចក្តីប្រកាសនេះថា នេះគឺជាកិច្ចព្រមព្រៀងមានសារសំខាន់ជួយជំរុញឲ្យរោងម៉ាស៊ីនកិនស្រូវ និងក្រុមហ៊ុននាំចេញអង្ករ ផលិតអង្ករដែលមានគុណភាពខ្ពស់ និងធ្វើកិច្ចសន្យាការពារបរិស្ថាន ដើម្បីទាក់ទាញវិនិយោគិនក្នុងស្រុក និងនៅក្រៅស្រុក ឲ្យធ្វើការវិនិយោគឲ្យបានកាន់តែច្រើន។ លោករំពឹងថា កិច្ចព្រមព្រៀងនេះនឹងជួយកាត់បន្ថយភាពក្រីក្រ និងលើកទឹកចិត្តដល់កសិករ។
ទន្ទឹមគ្នានេះ ប្រធានសហព័ន្ធស្រូវអង្ករកម្ពុជា លោក សុខ ពុទ្ធីវុធ ឲ្យដឹងដែរថា អនុស្សរណៈថ្មីនេះ នឹងជួយសមាជិករបស់សហព័ន្ធស្រូវអង្ករកម្ពុជា តាមរូបភាពជាច្រើនក្នុងសង្វាក់ផលិតកម្មស្រូវអង្ករ ដូចជាទាក់ទងថ្លៃដើមផលិត កាត់បន្ថយពេលវេលា និងជួយកាត់បន្ថយការចំណាយថវិកា ការទទួលប្រឹក្សាបច្ចេកទេសចំពោះការរៀបចំ និងគ្រប់គ្រងបរិស្ថាន ជាដើម។
អគ្គលេខាធិការសហព័ន្ធស្រូវអង្ករកម្ពុជា លោក មូល សារិទ្ធី បញ្ជាក់ប្រាប់អាស៊ីសេរី នៅថ្ងៃទី៨ ខែតុលា ដែរថា អនុស្សរណៈ និងកិច្ចព្រមព្រៀងនេះមានរយៈពេល ៣ឆ្នាំ ហើយចាប់ផ្តើមដំណើរការពីថ្ងៃចុះហត្ថលេខានេះតទៅ។ លោកបញ្ជាក់ថា ករណីរោងម៉ាស៊ីនកិនស្រូវ និងក្រុមហ៊ុននាំចេញអង្ករមិនអនុវត្តតាមក្រសួងបរិស្ថាន នឹងធ្វើការពិន័យទៅតាមច្បាប់៖ «ការចុះហត្ថលេខានេះ វិស័យស្រូវអង្ករនឹងទទួលបានការវាយតម្លៃបរិស្ថាន (EIA) ពីក្រសួងបរិស្ថាន គាត់អាចយកវិញ្ញាបនបត្របញ្ជាក់ថា រោងម៉ាស៊ីនកិនស្រូវគាត់នេះមានបញ្ជាក់គុណភាពលើផលប៉ះពាល់បរិស្ថាន រួចហើយទុកដាក់លើសម្បកបាវជាដើម ដើម្បីតស៊ូមតិជាមួយអតិថិជន ហើយកាលណាគាត់មាន ធ្វើឲ្យអតិថិជនជឿជាក់ និងហ៊ានផ្តល់តម្លៃខ្ពស់»។
ការចុះអនុស្សរណៈនៃការយោគយល់គ្នារវាងក្រសួងបរិស្ថាន និងសហព័ន្ធស្រូវអង្ករកម្ពុជា ស្ដីពី «ការវាយតម្លៃហេតុប៉ះពាល់បរិស្ថាន» ធ្វើឡើងបន្ទាប់ពីសហរដ្ឋអាមេរិក កាលពីពេលថ្មីៗនេះ ប្រកាសផ្អាកការនាំអង្ករចូលពីប្រទេសវៀតណាម ក្រោយពីអាជ្ញាធរទទួលបន្ទុកត្រួតពិនិត្យផ្នែកអាហារ និងថ្នាំពេទ្យរបស់អាមេរិក (FDA) បានរកឃើញថា អង្ករទាំងនោះមានជាតិគីមីចំនួន ៨ប្រភេទដែលប្រើច្រើនហួសកម្រិត និងខ្វះអនាម័យ។
ក្រោយវិធានការរបស់សហរដ្ឋអាមេរិក ក្រសួងកសិកម្ម និងអភិវឌ្ឍន៍ជនបទវៀតណាម បានតម្រូវឲ្យក្រុមហ៊ុនវៀតណាម ដែលនាំអង្ករចេញទៅទីផ្សារអាមេរិក ត្រូវពិនិត្យដោយយកចិត្តទុកដាក់ទៅលើគុណភាពអង្ករ រួមមានការប្រើថ្នាំសម្លាប់សត្វល្អិត ជាដើម ដើម្បីបញ្ចៀសបញ្ហាការនាំអង្ករចេញពីវៀតណាម ទៅសហរដ្ឋអាមេរិក នាថ្ងៃអនាគត៕