ដោយ ដែន អយុធ្យា RFA 2016-10-13
ក្រុមអាជីវករលក់ដូរនៅមុខក្រុមហ៊ុន សុខា អូតែល ដែលត្រូវអាជ្ញាធរឈូសបំផ្លាញតូបលក់ដូរចោលដោយគ្មានសំណង មានទីតាំងនៅចុងឆ្នេរអូរឈើទាល ឬអតីតឆ្នេរមុខក្រុមហ៊ុនអារីស្តុនខេត្តព្រះសីហនុ អំពាវនាវដល់ប្រមុខដឹកនាំរដ្ឋាភិបាល និងថ្នាក់ដឹកនាំស្ថាប័នពាក់ព័ន្ធ ជួយអន្តរាគមន៍រកយុត្តិធម៌ ដើម្បីឲ្យពួកគេទទួលបានសំណងសមរម្យ។
ការតវ៉ានេះ អាជ្ញាធរខេត្តព្រះសីហនុ ប្រតិកម្មថា ពលរដ្ឋទាំងនោះគឺគ្មានឈ្មោះក្នុងបញ្ជីដែលអាជ្ញាធរត្រូវដោះស្រាយសំណងជូនទេ ដោយលើកហេតុផលថា ទើបមកសង់តូបលក់ដូរថ្មី។
ក្រុមអាជីវករចំនួន ៨គ្រួសារដែលមានស្តង់ ឬតូបលក់ដូរនៅចុងឆ្នេរអូរឈើទាល អតីតមុខក្រុមហ៊ុនអារីស្តុន ដែលត្រូវអាជ្ញាធរខេត្តព្រះសីហនុ ដាក់ពង្រាយកម្លាំងចម្រុះរាប់សិបនាក់ និងប្រើគ្រឿងចក្រឈូសកម្ទេចតូបលក់ដូរទាំងនោះគ្មានសំណងកាលពីខែមេសា បន្តស្វែងរកយុត្តិធម៌។
ប្រជាពលរដ្ឋរៀបរាប់ថា កាលពីថ្ងៃសៅរ៍ ទី៩ ខែមេសា លោក សុខ ផន អភិបាលរងខេត្តព្រះសីហនុ បានដឹកនាំកម្លាំងនគរបាល និងកងរាជអាវុធហត្ថរាប់សិបនាក់ អមដោយគ្រឿងចក្រទៅឈូសកម្ទេចស្តង់ ឬតូបលក់ដូររបស់ពួកគេនៅចុងឆ្នេរអូរឈើទាល។ អាជីវកររងគ្រោះអះអាងថា កាលណោះមានតូបអាជីវករចំនួន ១៤តូប ត្រូវបានអាជ្ញាធរឈូសកម្ទេចចោលទាំងស្រុង។
អាជីវករម្នាក់ក្នុងចំណោមអាជីវករចំនួន ៨តូបដែលគ្មានឈ្មោះទទួលសំណងពីរដ្ឋបាលខេត្តព្រះសីហនុ លោកស្រី មាន បុប្ផា សំណូមពរដល់ប្រមុខដឹកនាំ ជួយអន្តរាគមន៍ទៅអភិបាលខេត្តព្រះសីហនុ លោក យន្ត មីន ឲ្យផ្តល់សំណងជូនអាជីវករទាំង ៨តូប ដែលមិនទាន់មានឈ្មោះទទួលសំណងចំនួន ៣.៥០០ដុល្លារសហរដ្ឋអាមេរិកក្នុងមួយតូបៗ និងស្នើសុំសាងសង់តូបលក់ដូរតាមស្តង់ដាររដ្ឋបានកំណត់នៅលើទីតាំងដើមវិញ។
ក្រុមអាជីវករក៏បានអះអាងថា ពួកគេមិនមែនជាអាជីវករថ្មីដូចអាជ្ញាធរខេត្តចោទនោះទេ ហើយការបាត់ឈ្មោះពីអ្នកមានឈ្មោះលក់ដូរនៅឆ្នេរអារីស្តុន គឺដោយសារកំហុសឆ្គងរបស់តំណាងពួកគេឈ្មោះ ភឿក សុខេន មិនដាក់ឈ្មោះជូនអាជ្ញាធរនាពេលកន្លងទៅ៖ «សូមសំណូមពរដល់ឯកឧត្តមអភិបាលខេត្តព្រះសីហនុ លោក យន្ត មីន ជួយដោះស្រាយកញ្ចប់ថវិកាចំនួន ៣.៥០០ដុល្លារ ដូចអាជីវករចំនួន ៣២តូបមុនៗដែរ។ ស្នើសុំសាងសង់តូបលក់ដូរតាមគំរូស្តង់ដាររបស់រដ្ឋាភិបាលបានដាក់ចេញនៅលើទីតាំងដើម។ អាជីវករពួកខ្ញុំទាំង ៨តូបនេះ គឺជាអាជីវករចាស់ ហើយមូលហេតុបាត់ឈ្មោះ គឺដោយសារលោកស្រី ភឿក សុខេន ប្រធានសហគមន៍ចុងឆ្នេរអូរឈើទាល ឬអតីតឆ្នេរអារីស្តុន មិនបានប្រាប់ពួកគាត់ឲ្យទៅចុះបញ្ជីជាមួយអាជ្ញាធរក្រុងព្រះសីហនុ នាពេលកន្លងទៅ»។
ក្រុមអាជីវករទាំង ៨តូបដែលត្រូវអាជ្ញាធរឈូសកម្ទេចចោលអះអាងថា ពួកគេនឹងមិនលះបង់ការតវ៉ាទាមទារសំណងសមរម្យនេះទេ ព្រោះមុខរបរ និងតូបលក់ដូររបស់ពួកគេ ដែលបានចំណាយដើមទុនសាងសង់អស់ជាច្រើន ត្រូវអាជ្ញាធរខេត្តនេះឈូសបំផ្លាញចោលអស់គ្មានសល់។
ស្ត្រីវ័យចំណាស់ឈ្មោះ ប៊ូ រ៉ាវី បានសំណូមពរដល់លោកនាយករដ្ឋមន្ត្រី ហ៊ុន សែន និងថ្នាក់ដឹកនាំស្ថាប័នពាក់ព័ន្ធ ជួយរកយុត្តិធម៌ និងផ្តល់សំណងជូនអាជីវករពួកគាត់ទាំង ៨គ្រួសារ ដែលកន្លងមកមិនទាន់មានឈ្មោះទទួលថវិកាចំនួន ៣.៥០០ដុល្លារពីរដ្ឋបាលខេត្តព្រះសីហនុ។
អភិបាលខេត្តព្រះសីហនុ លោក យន្ត មីន មានប្រសាសន៍ថា អាជីវករចំនួន ៨តូបដែលតវ៉ានេះ គឺជាអាជីវករទើបមកសង់តូបលក់ដូរថ្មី និងគ្មានឈ្មោះ ឬតូបលក់ដូរនៅឆ្នេរអារីស្តុន ឬចុងឆ្នេរអូរឈើទាល ដែលត្រូវទទួលសំណង ៣.៥០០ដុល្លារនោះទេ។ ប៉ុន្តែសម្រាប់អាជីវករមានតូបលក់ដូរចាស់ៗ ឬមានឈ្មោះក្នុងបញ្ជីត្រឹមត្រូវ អាជ្ញាធរបានផ្តល់សំណងរួចហើយ។ ទោះយ៉ាងណា លោក យន្ត មីន បញ្ជាក់ថា អាជ្ញាធរនឹងលើកយកសំណូមពររបស់ប្រជាពលរដ្ឋក្នុងមូលដ្ឋាននេះ ទៅរកដំណោះស្រាយឲ្យស្របតាមគោលការណ៍ច្បាប់ និងទិដ្ឋភាពជាក់ស្តែង។
អ្នកឃ្លាំមើលការរំលោភសិទ្ធិមនុស្សអង្គការលីកាដូ (LICADHO) ខេត្តព្រះសីហនុ លោក អ៊ុប សុវណ្ណចាន់ថន ផ្តល់ទស្សនៈថា អាជ្ញាធរគួរពិចារណាផ្តល់សំណងជូនអាជីវករចំនួន ៨តូបដែលគ្មានឈ្មោះនោះ ដើម្បីបញ្ចប់ការតវ៉ា ជាពិសេសដើម្បីអាចឲ្យពួកគាត់មានដើមទុនខ្លះសម្រាប់ប្រកបមុខរបរចិញ្ចឹមជីវិតនាថ្ងៃខាងមុខទៀត៖ «ស្នើសុំឲ្យអាជ្ញាធរខេត្ត ជួយដោះស្រាយសំណងសមរម្យជូនអាជីវករទាំង ៨គ្រួសារចប់ឲ្យបានឆាប់ ដើម្បីអាចឲ្យពួកគាត់មានដើមទុនសម្រាប់ធ្វើរបរចិញ្ចឹមជីវិតនាថ្ងៃខាងមុខទៀត។ ជាងនេះ គឺដើម្បីបញ្ចប់ការដើរតវ៉ារបស់ប្រជាពលរដ្ឋនៅសហគមន៍នេះតទៅទៀត»។
កាលពីថ្ងៃទី៩ ខែមេសា អភិបាលរងខេត្តព្រះសីហនុ លោក សុខ ផន ដែលជិតគ្រប់អាយុចូលនិវត្តន៍ បានដឹកនាំកម្លាំងចម្រុះចុះឈូសកម្ទេចតូបលក់ដូររបស់ប្រជាពលរដ្ឋដែលសង់នៅតាមឆ្នេរ ទល់មុខដីក្រុមហ៊ុន សុខា អូតែល បំផ្លាញចោលរាបដល់ដី។ សកម្មភាពនេះ លោកអះអាងថា សមត្ថកិច្ចបានអនុវត្តទៅតាមសេចក្ដីសម្រេចរបស់ប្រធានគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រ លោក ជា សុផារ៉ា និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់៕