ដោយ មួង ណារ៉េត RFA 2016-10-13
ព្រះមហាក្សត្រថៃ ភូមិបុល អាដុលយ៉ាដេ (Bhumibol Adulyadej) បានសោយទិវង្គតនៅថ្ងៃទី១៣ តុលា នៅឯមន្ទីរពេទ្យស៊ីរីរ៉ាត (Siriraj) ក្នុងក្រុងបាងកក ក្នុងជន្មាយុ ៨៨ព្រះវស្សា។ ព្រះអង្គបានឡើងគ្រងរាជ្យអស់រយៈពេលជាង ៧០ព្រះវស្សា និងក្លាយជាព្រះមហាក្សត្រមួយអង្គគ្រងរាជ្យសម្បត្តិយូរជាងគេបំផុតនៅលើពិភពលោក។
ទីភ្នាក់ងារសារព័ត៌មានអេភី (AP) បានស្រង់សំដីនាយករដ្ឋមន្ត្រីថៃ លោក ប្រាយុទ្ធ ចាន់អូចា (Prayuth Chan-ocha) ដែលប្រកាសនៅថ្ងៃនេះថា ព្រះអង្គម្ចាស់ មហា វ៉ាជីរ៉ាឡុងកន (Maha Vajiralongkorn) ព្រះជន្ម ៦៤ ព្រះវស្សា នឹងត្រូវគ្រងរាជ្យបន្តពីព្រះបិតា ដោយយោងតាមរដ្ឋធម្មនុញ្ញថៃ។ ប៉ុន្តែព្រះអង្គម្ចាស់មិនសូវមានប្រជាប្រិយ ឬទទួលបានគោរពខ្លាំងដូចព្រះរាជបិតារបស់ព្រះអង្គទេ។
ទីផ្សារភាគហ៊ុនរបស់ថៃ បានធ្លាក់ចុះយ៉ាងគំហុក។ ចំណែកប្រាក់បាតថៃ ក៏ធ្លាក់ថ្លៃខ្លាំងភ្លាមៗមួយរំពេច ដោយសារដំណឹងអំពីការសោយទិវង្គតរបស់ព្រះអង្គ៕