ដោយ ជិន ជេដ្ឋា RFA 2016-10-13
ពលរដ្ឋនៅក្រុងប៉ោយប៉ែត ខេត្តបន្ទាយមានជ័យ បារម្ភពីអធិបតេយ្យភាពទឹកដី និងផលប៉ះពាល់ផ្សេងៗពីគម្រោងសាងសង់អគាររបស់ក្រុមហ៊ុនថៃ មួយ ដែលកំពុងដាក់គ្រឿងចក្រឈូសឆាយដីនៅក្បែរព្រំដែនខ្មែរ-ថៃ។ ប៉ុន្តែតំណាងក្រុមហ៊ុនបញ្ជាក់ថា ផ្ទៃដីដែលឈូសឈូសឆាយកំណត់ព្រំនេះ គឺជាដីខ្មែរគ្រប់គ្រងដោយអាជ្ញាធរកម្ពុជា ហើយមិនប៉ះពាល់ដីពលរដ្ឋទេ។
អ្នកភូមិទំនប់ក៥ សង្កាត់ប៉ោយប៉ែត ខ្លះ ភ្ញាក់ផ្អើល និងបារម្ភខ្លាចបាត់បង់ទឹកដីខ្មែរទៅឲ្យភាគីថៃ ក្រោយឃើញគ្រឿងចក្រមួយគ្រឿងកាយដីនៅចំណុចបឹងសាគូ ឋិតនៅក្នុងដីខ្មែរ ដែលមានចម្ងាយប្រមាណ ៥០ម៉ែត្រ ពីព្រំដែនខ្មែរ-ថៃ។ ពលរដ្ឋសង្ស័យថា ជនជាតិថៃ ដែលបានទិញដីពលរដ្ឋខ្មែរនៅតំបន់នេះ គ្រោងបង្កើតបនល្បែង ឬកាស៊ីណូឈ្មោះត្រូពីកាណា (Tropicana) នៅថ្ងៃខាងមុខ។
ពលរដ្ឋម្នាក់ក្នុងចំណោមបីនាក់ដែលបានឃើញសកម្មភាពឈូសឆាយរបស់ក្រុមហ៊ុន ប៉ុន្តែថ្លែងក្នុងលក្ខខណ្ឌសុំមិនបញ្ចេញឈ្មោះឲ្យដឹងថា ចាប់តាំងពីម៉ោង ១០កន្លះព្រឹក រហូតដល់ល្ងាចថ្ងៃទី១៣ ខែតុលា គ្រឿងចក្រនៅបន្តកាយដីកំណត់ព្រំប្រទល់ក្រុមហ៊ុននៅក្បែរផ្ទះពលរដ្ឋមួយចំនួន។
លោកថា សកម្មភាពឈូសឆាយនេះអាចនឹងប៉ះពាល់ដល់ដីពលរដ្ឋប្រមាណ ២៨គ្រួសារផ្សេងទៀត៖ «ប្លង់ឌឺម៉ាស់គេហ្នឹងអក្សររបស់ថៃ សរសេរអក្សរថៃ ខ្ញុំឆ្ងល់អ៊ីចេះ ហេតុអីថៃ មានសិទ្ធិមកទិញដីខ្មែរ? ខ្ញុំគ្រាន់នៅជិតហ្នឹងអត់ប៉ះទេ ខ្ញុំនៅផ្ទះរហូតគេអត់ហ៊ានមកប៉ះពាល់ទេ ប៉ុន្តែគេប្រុងជីកជិតមកដល់ផ្ទះខ្ញុំអីដែរ ខ្ញុំហាមឃាត់អត់ឲ្យជីកទេ ព្រោះវាបាក់ផ្ទះ។ ខ្ញុំរាយការណ៍ឲ្យតាំងពីព្រឹកណោះគេកាយតាំងព្រឹកមក រហូតដល់ថ្មើរនេះមិនទាន់ឈប់ផង។ សំណូមពរផ្អាកការឈូសឆាយសិនទៅ ដោះស្រាយគ្នាសិនទៅចាំធ្វើទៀតទៅ ហើយឲ្យខាងលើៗជួយមើលផងកុំឲ្យចេះតែវាតទីរហូតអ៊ីចឹងងាប់ហើយ»។
ទាក់ទងបញ្ហានេះអភិបាលក្រុងប៉ោយប៉ែត លោក ង៉ោ ម៉េងជ្រួន បដិសេធមិនអត្ថាធិប្បាយយ៉ាងណាទេដោយលោកប្រាប់ថា កំពុងជាប់ប្រជុំ។ ប៉ុន្តែតំណាងក្រុមហ៊ុនដែលពលរដ្ឋស្គាល់ថា ជាមេបញ្ជាការវរសេនាតូចលេខ៥១៣ លោក ង៉ែត ព្រឿង បញ្ជាក់ប្រាប់អាស៊ីសេរីថា ដីដែលឈូសឆាយនេះ មានផ្ទៃប្រមាណ ១ហិកតារ ហើយមានលិខិតទិញលក់រវាងពលរដ្ឋ និងអ្នកទិញជាជនជាតិថៃ សញ្ជាតិខ្មែរ។
លោកថា លិខិតទិញលក់នេះ មានការស៊ីញេទទួលស្គាល់ពីអភិបាលក្រុងប៉ោយប៉ែត លោក ង៉ោ ម៉េងជ្រួន ហើយមិនបានប៉ះពាល់ដល់ដីពលរដ្ឋណាម្នាក់ទេ ផ្ទុយទៅវិញមានពលរដ្ឋមួយគ្រួសារបានចូលទៅរស់នៅលើដីក្រុមហ៊ុនទៀតផង។ លោកបន្ថែមថា ដីនេះអាចទុកសម្រាប់សង់រោងចក្រកាត់ដេរខ្នាតតូចមួយ គឺមិនមែនទុកសម្រាប់បង្កើតកាស៊ីណូ ឬបនល្បែងដូចពលរដ្ឋថានោះទេ៖ «ឯកសារដីគេមានស៊ីញេដល់ ង៉ោ ម៉េងជ្រួន ត្រឹមត្រូវគេមានទាំងអស់តើ។ ...អត់មានអីពាក់ព័ន្ធនឹងរឿងទឹកដី បើខ្ញុំទាហានហើយខ្ញុំទៅឲ្យគេប៉ះពាល់ម៉េចបាន។ អូ..! ខ្ញុំមិនមែនក្រុមហ៊ុនទេ ខ្ញុំទៅគ្រឿងចក្រកូនក្មេងវាទៅធ្វើខ្ញុំទៅជួយមើល ទៅសុំច្បាប់គេឲ្យទៅណា បានសុំអាជ្ញាធរភូមិ ហើយនឹងប៉ូលិសប៉ុស្តិ៍គេត្រឹមត្រូវ»។
មន្ត្រីសម្របសម្រួលសមាគមអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា ថា លោកទើបទទួលបានព័ត៌មាននេះមិនទាន់ច្បាស់ការណ៍ ប៉ុន្តែអាជ្ញាធរត្រូវតែផ្សព្វផ្សាយពីគម្រោងធ្វើអ្វីមួយដល់ពលរដ្ឋក្នុងមូលដ្ឋានផ្ទាល់ដើម្បីកុំឲ្យមានភ្ញាក់ផ្អើល ឬមានការភ័ន្តច្រឡំ៕