ដោយ សូត សុខប្រាថ្នា RFA 2016-10-18
មន្ត្រីជំនាញផ្នែករដ្ឋបាលព្រៃឈើនៅខេត្តកំពង់ធំ បញ្ជាក់ថា លិខិតសុំការអនុញ្ញាតិដឹកជញ្ជូនឈើធ្វើផ្ទះពីសំណាក់មន្ត្រីសមត្ថកិច្ចនៅស្នងការដ្ឋាននគរបាលខេត្ត គឺត្រឹមត្រូវ ពីព្រោះមានការយល់ព្រមពីអភិបាលខេត្ត។ យ៉ាងនេះក្តី មន្ត្រីជំនាញកំពុងស្រាវជ្រាវករណីលិខិតនោះធ្លាក់ទៅលើដៃជនដទៃ ដើម្បីដឹកជញ្ជូនឈើបម្រុងចេញទៅកាន់ខេត្តកំពង់ចាម ទៅវិញ។ ចំណែកស្នងការនគរបាលខេត្តបញ្ជាក់ថា ករណីនេះជារឿងបុគ្គល មិនបានពាក់ព័ន្ធអង្គភាពឡើយ។
មន្ត្រីជំនាញរដ្ឋបាលព្រៃឈើលើកឡើងថា ក្នុងករណីរកឃើញសកម្មភាពដឹកជញ្ជូនឈើដែលប្រើប្រាស់លិខិតអនុញ្ញាតចេញដោយអភិបាលខេត្ត មានលក្ខណៈមិនត្រឹមត្រូវ មន្ត្រីជំនាញនឹងបញ្ជូនរបាយការណ៍ទៅអភិបាលខេត្ត និងតុលាការបន្តទៀត។
នាយខណ្ឌរដ្ឋបាលព្រៃឈើខេត្តកំពង់ធំ លោក តិប ញាតា មានប្រសាសន៍នៅថ្ងៃទី១៨ តុលា ថា មន្ត្រីជំនាញបានពិនិត្យលិខិតសុំអនុញ្ញាតដឹកជញ្ជូនឈើ ដែលចេញដោយអភិបាលខេត្ត គឺត្រឹមត្រូវ ប៉ុន្តែអ្នកដែលយកលិខិតទៅប្រើប្រាស់បន្តនោះ គឺអាចធ្វើសកម្មភាពក្លែងបន្លំ។ លោកយល់ថា លិខិតរបស់មន្ត្រីនគរបាលនៅស្នងការដ្ឋាននគរបាលខេត្តកំពង់ធំ ដែលស្នើសុំដឹកជញ្ជូនឈើជិត ២០ម៉ែត្រគូបមកធ្វើផ្ទះ អាចនឹងត្រូវបានគេចម្លង (កូពី) ទៅប្រើប្រាស់បន្ត ហើយលោកថា ឈើទាំងនេះជាឈើប្រមូលទិញពីពលរដ្ឋមូលដ្ឋាន៖ «អ៊ីចឹងអាផ្នែកមានអ្នកពាក់ព័ន្ធក្នុងរឿងលិខិតស្នាមហ្នឹង យើងនឹងពិភាក្សាគ្នាដើម្បីរកដំណោះស្រាយ»។
ការលើកឡើងនេះ ក្រោយពេលព្រះរាជអាជ្ញាអមសាលាដំបូង និងសមត្ថកិច្ចខេត្តកំពង់ធំ បានឃាត់រថយន្តយីឌុបមួយគ្រឿងដោយគេដឹងថា ជាកម្មសិទ្ធិឈ្មួញឈើម្នាក់ឈ្មោះ ទី នៅចំណុចភូមិថ្មសំលៀង ឃុំក្រយា ស្រុកសន្ទុក ដែលមានផ្ទុកឈើប្រណិតប្រភេទលេខពីរ ឬលេខ៣ មិនក្រោម ៤០ម៉ែត្រគូប កាលពីថ្ងៃទី១៦ តុលា ហើយគេដឹងថា បម្រុងដឹកជញ្ជូនបន្តទៅខេត្តកំពង់ចាម។
ស្របពេលលិខិតអនុញ្ញាតរបស់អភិបាលខេត្ត ផ្តល់ទៅអ្នកស្រី ឡេង សុគន្ធា ជានាយរងការិយាល័យបុគ្គលិក នៃស្នងការដ្ឋាននគរបាលខេត្តកំពង់ធំ តាមការស្នើសុំដឹកជញ្ជូនឈើសម្រាប់ធ្វើផ្ទះកាលពីខែកញ្ញា គឺមានចំនួន ១៨ម៉ែត្រគូបប៉ុណ្ណោះ។
ទាក់ទងបញ្ហានេះ ស្នងការនគរបាលខេត្តកំពង់ធំ លោក ជូ សំអាន មានប្រសាសន៍ថា ករណីនេះជារឿងបុគ្គល មិនពាក់ព័ន្ធស្ថាប័នឡើយ។ លោកបន្តថា ច្បាប់អនុញ្ញាតសុំដឹកជញ្ជូនឈើនោះ គឺអភិបាលខេត្តបានចេញឲ្យអ្នកស្រី ឡេង សុគន្ធា មែន ប៉ុន្តែដោយសារមិនមានលទ្ធភាពដឹកជញ្ជូនឈើទាំងនោះ។ អ្នកស្រីក៏បានលក់លិខិតអនុញ្ញាតឲ្យអ្នកដទៃ ដើម្បីយកប្រាក់មកទិញគ្រឿងសំណង់សម្រាប់ធ្វើផ្ទះវិញ។ លោកថា នីតិវិធីយ៉ាងណា គឺជាសមត្ថកិច្ចរបស់មន្ត្រីជំនាញ៖ «ជាធម្មតា ការលក់ច្បាប់ឲ្យអ្នកផ្សេងហ្នឹង គឺវាអត់មានអីខុសទេ ប៉ុន្តែអ្នកខុស គឺខុសអ្នកយកច្បាប់ទៅប្រើ ហើយវាលើសចំនួន»។
ទោះបីយ៉ាងណាក៏ដោយ អ្នកសម្របសម្រួលលេខាធិការដ្ឋានបណ្ដាញព្រៃឡង់ លោក សេង សុខហេង អះអាងថា ការចេញលិខិតអនុញ្ញាតនេះ គឺជារឿងខុសនីតិវិធី ព្រោះអ្នកយកទៅប្រើប្រាស់ខុសទីតាំង និងខុសគោលដៅ ហើយអាចពាក់ព័ន្ធអំពើពុករលួយផង។ ចំណែកអ្នកចម្លងទៅប្រើប្រាស់បន្ត ឬលក់លិខិតអនុញ្ញាត គឺកាន់តែខុសច្បាប់ថែមទៀត។ លោកថា ក្នុងលិខិតស្នើសុំដឹកជញ្ជូនឈើធ្វើផ្ទះ គឺដឹកចេញពីស្រុកប្រាសាទបល្ល័ង្គ មកខេត្តកំពង់ធំ ប៉ុន្តែជាក់ស្តែង ឈ្មួញឈើឈ្មោះ ទី ដែលលោកអះអាងថាជាឈ្មួញរកស៊ីឈើសកម្មម្នាក់ យកទៅប្រើប្រាស់ក្នុងទម្រង់ធ្វើអាជីវកម្មវិញ៖ «ទោះបីជាយ៉ាងណាក្តី រឿងហ្នឹងខ្ញុំគិតថាអាជ្ញាធរហាក់ដូចជាមានចេតនាលាក់លៀម ក្នុងការចាប់ឈើនេះ ចំពោះបទល្មើសមួយនេះ»។
លោកបន្ថែមថា ឈើទាំងនោះមិនមែនជាឈើប្រមូលទិញពីប្រជាពលរដ្ឋទេ ប៉ុន្តែអាចជាប្រភេទឈើជួលពលរដ្ឋទៅកាប់ឲ្យច្រើនជាង។ លោកថា ករណីចេញលិខិតអនុញ្ញាតដើម្បីដឹកជញ្ជូនឈើបែបនេះ តែងតែកើតមានឡើងជារឿយៗ ដែលបង្កភាពងាយស្រួលដល់ក្រុមឈ្មួញរកស៊ីឈើ។ លោកយល់ថា ប្រសិនបើអាជ្ញាធរមិនចាត់វិធានការលើក្រុមឱកាសនិយម ឬក្រុមឈ្មួញទាំងនេះទេ គឺកាន់តែធ្វើឲ្យពួកគេបានចិត្តក្នុងការប្រព្រឹត្តបទល្មើសបន្ថែមទៀត ហើយព្រៃឈើ ពិសេសព្រៃឡង់កាន់តែហិនហោចជាក់ជាមិនខាន៕