ដោយ ហង្ស សាវយុត RFA 2016-10-18
អង្គការរបស់អាល្លឺម៉ង់ ជី.អាយ.ហ្សិត (GIZ) និងអង្គការស្វីស រួមជាមួយនឹងរដ្ឋាភិបាលមកពីស្ថាប័នពាក់ព័ន្ធច្រើនផ្នែក បានរួមគ្នាសម្ពោធគេហទំព័រ និងផែនទីផ្នត់ទេសចរណ៍នៃស្រុកបន្ទាយស្រី កាលពីរាត្រីថ្ងៃទី១៤ ខែតុលា។
គេហទំព័រ និងផែនទីដែលណែនាំ និងបង្ហាញផ្លូវឲ្យអ្នកទេសចរបានស្វែងយល់អំពីតំបន់ប្រាសាទ តំបន់វប្បធម៌ កសិកម្ម ព្រមទាំងផ្ទះស្នាក់នៅចំនួនជាង ៣០កន្លែង សម្រាប់ឲ្យភ្ញៀវទេសចរអាចទៅលេងកម្សាន្តនៅក្នុងស្រុកបន្ទាយស្រី ព្រមទាំងអាចស្នាក់នៅបានរយៈពេលយូរផង។
អាជ្ញាធរខេត្តសៀមរាប ព្រមទាំងអង្គការដៃគូនៃកម្មវិធីអភិវឌ្ឍន៍សេដ្ឋកិច្ចតំបន់ រំពឹងទុកថា ប្រជាពលរដ្ឋនៅស្រុកបន្ទាយស្រី នឹងអាចទទួលបានកម្រៃដោយផ្ទាល់ពីអ្នកទេសចរចម្រុះជាតិសាសន៍ ដើម្បីលើកស្ទួយជីវភាពរស់នៅប្រចាំថ្ងៃឲ្យកាន់តែប្រសើរ ព្រមទាំងអាចចាកផុតពីបន្ទាត់នៃភាពក្រីក្រផងសម្រាប់អនាគត។
ការរំពឹងទុកនេះ កើតមានឡើងបន្ទាប់ពីអង្គការអាល្លឺម៉ង់ ជី.អាយ.ហ្សិត (GIZ) និងអង្គការស្វីស (Sweden) បានប្រឹងប្រែងរយៈពេលជាង ៨ឆ្នាំលើការសិក្សា ដើម្បីលើកស្ទួយជីវភាពប្រជាពលរដ្ឋតាមតំបន់នៃស្រុកបន្ទាយស្រី ឲ្យបានប្រសើរ រហូតឈានទៅដល់ការបង្កើតគេហទំព័រ និងផែនទីសម្រាប់ទេសចរ ដើម្បីទាក់ទាញភ្ញៀវឲ្យចាប់អារម្មណ៍ និងធ្វើដំណើរទៅកម្សាន្តនៅទីនោះ។
កាលពីរាត្រីថ្ងៃទី១៤ ខែតុលា អង្គការអាល្លឺម៉ង់ ស្វីស ព្រមទាំងអាជ្ញាធរខេត្តសៀមរាប បានរួមគ្នាធ្វើពិធីសម្ពោធគេហទំព័រ និងផែនទីទេសចរណ៍របស់ស្រុកបន្ទាយស្រី។
ប្រធានមន្ទីរទេសចរណ៍ខេត្តសៀមរាប គឺលោក ង៉ូវ សេងកាក់។ លោកមានប្រសាសន៍ក្នុងពេលបើកសម្ពោធនោះថា ដើម្បីលើកស្ទួយជីវភាពរបស់ប្រជាពលរដ្ឋជាច្រើននៅក្នុងស្រុកបន្ទាយស្រី គឺអាជ្ញាធរខេត្តសៀមរាប បានសហការជាមួយនឹងអង្គការជាដៃគូរយៈពេលជាង ៨ឆ្នាំហើយ ក្នុងការរិះរកវិធីយ៉ាងណាឲ្យប្រជាពលរដ្ឋបានទទួលចំណូលពីវិស័យទេសចរណ៍។ លោក ង៉ូវ សេងកាក់ បញ្ជាក់ថា តាមរយៈការសិក្សា និងប្រឹងប្រែងជាច្រើនឆ្នាំ ទីបំផុតអង្គការជាដៃគូបានរកឃើញតំបន់សេដ្ឋកិច្ចទេសចរណ៍ជាច្រើនកន្លែង ដូចជាសួនមេអំបៅ សារមន្ទីរគ្រាប់មីនដែលសេសសល់ពីសង្គ្រាម កន្លែងភោជនីយដ្ឋាន និងកន្លែងកម្សាន្តផ្សេងៗទៀត ក្រៅពីប្រាសាទបុរាណ គឺអាចទាក់ទាញភ្ញៀវទេសចរឲ្យទៅកម្សាន្ត។
លោក ង៉ូវ សេងកាក់ បញ្ជាក់ថា តំបន់ដែលអង្គការអាល្លឺម៉ង់ (GIZ) រកឃើញនេះ គឺបានដាក់បញ្ចូលទៅក្នុងគេហទំព័រ ព្រមទាំងផែនទីដែលបានសម្ពោធពេលនេះ៖ «នេះជាគម្រោងល្អមួយសម្រាប់ផ្សព្វផ្សាយអំពីសក្ដានុពលនៃស្រុកបន្ទាយស្រី។ បើភ្ញៀវទេសចរចាប់អារម្មណ៍ អាចស្នាក់នៅស្រុកបន្ទាយស្រី ហើយអាចឲ្យប្រជាពលរដ្ឋនៅតាមតំបន់ទទួលបានចំណូលដោយផ្ទាល់ពីវិស័យទេសចរណ៍»។
ប្រធានកម្មវិធីអភិវឌ្ឍន៍សេដ្ឋកិច្ចតំបន់របស់អង្គការអាល្លឺម៉ង់ (GIZ) លោក វ៉ូលហ្វ្រាម ជឺកែល (Wolfram Jaeckel) បានថ្លែងក្នុងពេលបើកសម្ពោធគេហទំព័រ និងផែនទីផ្នត់សម្រាប់ទេសចររបស់ស្រុកបន្ទាយស្រី នោះថា មានគម្រោងជាច្រើនដែលអង្គការរបស់លោកបានធ្វើទៅតាមការលើកឡើងរបស់សង្គមស៊ីវិល វិស័យឯកជន និងប្រជាពលរដ្ឋក្នុងតំបន់ ក្នុងគោលបំណងជួយលើកស្ទួយសេដ្ឋកិច្ចដែលពាក់ព័ន្ធនឹងវិស័យទេសចរណ៍។
អង្គការអាល្លឺម៉ង់ ឲ្យដឹងទៀតថា សក្ដានុពលទេសចរណ៍នៅក្នុងស្រុកបន្ទាយស្រី គឺពិតជាអាចជួយលើកស្ទួយជីវភាពប្រជាពលរដ្ឋក្រីក្រនៅតាមតំបន់នៃស្រុកនោះឲ្យប្រសើរឡើងបាន។
ទីប្រឹក្សាអភិវឌ្ឍន៍សេដ្ឋកិច្ចតំបន់របស់អង្គការ ជី.អាយ.ហ្សិត (GIZ) អ្នកស្រី អេង សាឡូត មានប្រសាសន៍ថា សក្ដានុពលទេសចរណ៍នៅក្នុងស្រុកបន្ទាយស្រី មិនត្រឹមតែប្រាសាទបុរាណប៉ុណ្ណោះទេ គឺនៅមានតំបន់កសិកម្ម វប្បធម៌ ព្រមទាំងតំបន់ធម្មជាតិជាង ៣០កន្លែងផ្សេងទៀតដែលអាចទាក់ទាញភ្ញៀវទេសចរឲ្យទៅកម្សាន្ត ហើយបង្កើតជាមុខរបរឲ្យប្រជាពលរដ្ឋបានទទួលចំណូលដ៏សមរម្យ។ តំបន់ទាំងនោះមានដូចជា កន្លែងធ្វើសិប្បកម្ម កន្លែងផលិតស្ករត្នោត កន្លែងលក់នំបញ្ចុក ព្រមទាំងផ្ទះស្នាក់នៅទីជនបទជាដើម។
អ្នកស្រី អេង សាឡូត បញ្ជាក់ថា អង្គការ ជី.អាយ.ហ្សិត (GIZ) បានមើលឃើញថា បច្ចុប្បន្ន គឺមានភ្ញៀវទេសចរប្រហែល ២.០០០នាក់ បានទៅមើលប្រាសាទបន្ទាយស្រី ក្នុងមួយថ្ងៃៗ ក៏ប៉ុន្តែភ្ញៀវទេសចរទាំងនោះមិនបានស្នាក់នៅស្រុកបន្ទាយស្រី ឲ្យបានយូរ ដែលធ្វើឲ្យប្រជាពលរដ្ឋបានទទួលចំណូលទេ។ ហេតុដូច្នេះ អង្គការ ជី.អាយ.ហ្សិត (GIZ) ក៏បានផ្ដួចផ្ដើមបង្កើតជាគេហទំព័រ និងផែនទីទេសចរណ៍ស្រុកបន្ទាយស្រី ដើម្បីទាក់ទាញភ្ញៀវទេសចរឲ្យមើលឃើញវិស័យជាច្រើនទៀតក្រៅពីប្រាសាទបុរាណដែលកំពុងតែលាក់ខ្លួន ប្រយោជន៍ឲ្យភ្ញៀវអាចបន្តការស្នាក់នៅស្រុកបន្ទាយស្រី ឲ្យបានច្រើនថ្ងៃ៖ «សក្ដានុពលស្រុកបន្ទាយស្រី ត្រូវបានកប់លាក់ទុកដោយសារតែខ្វះការផ្សព្វផ្សាយ ខ្វះការសហការរវាងអ្នកដែលពាក់ព័ន្ធ»។
លោក សូរ សុន អភិបាលស្រុកបន្ទាយស្រី ថ្លែងថា លោកមានចិត្តសប្បាយរីករាយជាខ្លាំងដែលរដ្ឋាភិបាល និងអង្គការជាដៃគូ បានជួយបង្កើតគេហទំព័រ និងផែនទីទេសចរណ៍ស្រុកបន្ទាយស្រី ក្នុងគោលបំណងលើកស្ទួយជីវភាពប្រជាពលរដ្ឋរបស់លោកឲ្យចេញផុតពីភាពក្រីក្រនេះ។ លោក សូរ សុន បញ្ជាក់ថា បច្ចុប្បន្ន ស្រុកបន្ទាយស្រី មានប្រជាពលរដ្ឋរស់នៅសរុបចំនួនជាង ៨ពាន់គ្រួសារ ក្នុងចំណោមប្រជាពលរដ្ឋទាំងនោះ គឺប្រហែល ៣០០គ្រួសារកំពុងរស់នៅក្រោមបន្ទាត់នៃភាពក្រីក្រ។
ចំណែកអភិបាលខេត្តសៀមរាប លោក ឃឹម ប៊ុនសុង មានប្រសាសន៍ថា បច្ចុប្បន្ន ពិភពលោកបានចាត់ទុកវិស័យទេសចរណ៍អាចជួយដល់សង្គម ក្នុងការធ្វើឲ្យសេដ្ឋកិច្ចជាតិកើនឡើង។ មិនតែប៉ុណ្ណោះ វិស័យទេសចរណ៍អាចបង្កើតការងារដល់ប្រជាពលរដ្ឋឲ្យមានចំណូល ដើម្បីកាត់បន្ថយភាពក្រីក្រ ព្រមទាំងជួយសេដ្ឋកិច្ចបៃតងឲ្យការពារផែនដី មិនឲ្យឡើងកម្ដៅទៀតផង៖ «ទាំងនេះសបញ្ជាក់ពីការចូលរួម ធ្វើយ៉ាងណាឲ្យស្រុកបន្ទាយស្រី ក្លាយជាតំបន់ទាក់ទាញទេសចរចង់ទៅសិក្សាស្វែងយល់»។
អាជ្ញាធររដ្ឋាភិបាល និងអង្គការជាដៃគូ បានយល់ឃើញថា បើទោះបីជាមានការបង្កើតគេហទំព័រ ព្រមទាំងផែនទីតំបន់ទេសចរណ៍នៃស្រុកបន្ទាយស្រី ហើយក្ដី ក៏គម្រោងជួយដល់ជីវភាពប្រជាពលរដ្ឋតាមរយៈវិស័យទេសចរណ៍ អាចនឹងមិនរីកចម្រើនបានទេ ប្រសិនបើខ្វះការចូលរួមពីវិស័យឯកជនផ្នែកសេវាកម្មទេសចរណ៍ជួយផ្សព្វផ្សាយនោះ។
អនុប្រធានសមាគមទីភ្នាក់ងារទេសចរណ៍កម្ពុជា (CATA) លោក ម៉េង ផល្លា មានប្រសាសន៍ថា ការបង្កើតជាគេហទំព័រ ព្រមទាំងផែនទីតំបន់ទេសចរណ៍ស្រុកបន្ទាយស្រី គឺពិតជាមានសារសំខាន់ខ្លាំងណាស់សម្រាប់វិស័យឯកជន ក្នុងការជួយផ្សព្វផ្សាយទៅកាន់អ្នកទេសចរនៅទូទាំងពិភពលោក។ នេះគឺជាគន្លឹះថ្មីមួយទៀតដែលធ្វើឲ្យវិស័យឯកជនផ្នែកបម្រើសេវាកម្មទេសចរណ៍ អាចចាប់ផ្ដើមផ្សព្វផ្សាយលក់កញ្ចប់ទេសចរណ៍ថ្មីទៅកាន់ពិភពលោក៖ «យើងមិនមានអ្វីក្រៅពីការជួយផ្សព្វផ្សាយ ហើយយកសក្ដានុពលរបស់ទីជនបទដែលស្អាត ព្រមទាំងជីវភាពរស់នៅរបស់ប្រជាពលរដ្ឋផង ធ្វើជាកញ្ចប់លក់ទៅឲ្យអ្នកទេសចរសម្រាប់ឆ្នាំថ្មី»។
កម្មវិធីអភិវឌ្ឍន៍សេដ្ឋកិច្ចតំបន់មើលឃើញថា បើទោះបីជាអង្គការអាល្លឺម៉ង់ (GIZ) និងអង្គការស្វីស (Sweden) បានបង្កើតកម្មវិធីដើម្បីជួយលើកស្ទួយជីវភាពរបស់អ្នកស្រុកបន្ទាយស្រី តាមរយៈទាក់ទាញភ្ញៀវទេសចរក៏ដោយ ក៏វាអាចនិយាយថា គេទើបតែបានជោគជ័យពាក់កណ្ដាលនៅឡើយ ដែលទាមទារឲ្យមានការប្រឹងប្រែងជាច្រើនថែមទៀត។ អង្គការអាល្លឺម៉ង់ និងអង្គការស្វីស នឹងបន្តគម្រោងអភិវឌ្ឍន៍សេដ្ឋកិច្ចតំបន់នេះនៅស្រុកទាំង១២ របស់ខេត្តសៀមរាប និងនៅស្រុកមួយចំនួនទៀតរបស់ខេត្តឧត្តរមានជ័យ និងខេត្តបន្ទាយមានជ័យ រហូតដល់ឆ្នាំ២០២០៕