ដោយ យាង សុជាមេត្តា RFA 2016-05-14
មន្ត្រីរដ្ឋាភិបាលអះអាងនៅថ្ងៃទី១៤ ខែឧសភា ថា តុលាការសហរដ្ឋអាមេរិក មិនមានដែនយុត្តាធិការចាត់ការលើបណ្ដឹងដោយសាច់ញាតិមន្ត្រីគណបក្សសង្គ្រោះជាតិ ប្រឆាំងនឹងកូនប្រុសច្បងលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត ឡើយ។ ការអះអាងនេះ គឺស្របពេលដែលលោក ហ៊ុន ម៉ាណែត មិនបានចូលទៅឆ្លើយការពារខ្លួននៅតុលាការអាមេរិក តាមបណ្ដឹងរបស់សាច់ញាតិបក្សប្រឆាំងឡើយ។
មន្ត្រីរដ្ឋាភិបាល និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ថ្លែងចាត់ទុកបណ្ដឹងប្រឆាំងលោក ហ៊ុន ម៉ាណែត ដោយសាច់ញាតិរបស់មន្ត្រីបក្សប្រឆាំងថា គ្រាន់តែមានទិសដៅដើម្បីបង្កការរំខាន និងបំផ្លាញកិត្តិយសកូនប្រុសច្បងលោក ហ៊ុន សែន ប៉ុណ្ណោះ។
បើទោះជា លោក ផៃ ស៊ីផាន អះអាងថា លោកមិនបានដឹងលំអិតពីការប្ដឹងផ្ដល់ប្រឆាំងលោក ហ៊ុន ម៉ាណែត ថាយ៉ាងណាក្ដី ប៉ុន្តែលោកថ្លែងថា តុលាការសហរដ្ឋអាមេរិក មិនមានដែនយុត្តាធិការចាត់ការលើលោក ហ៊ុន ម៉ាណែត ទៅតាមបណ្ដឹងរបស់សាច់ញាតិមន្ត្រីបក្សប្រឆាំងឡើយ។
លើសពីនេះទៀតលោកថា លោក ហ៊ុន ម៉ាណែត ក៏មិនបានប្រព្រឹត្តបទល្មើសណាមួយនៅលើទឹកដីអាមេរិក នោះដែរ។
លោក ផៃ ស៊ីផាន បញ្ជាក់បន្ថែមថា បើទោះជាភរិយាលោក មាជ សុវណ្ណារ៉ា ដែលជាដើមបណ្ដឹងប្ដឹងលោក ហ៊ុន ម៉ាណែត មានសញ្ជាតិអាមេរិកក្ដី ប៉ុន្តែតុលាការអាមេរិក មិនមានអំណាចមកចាត់ការលើលោក ហ៊ុន ម៉ាណែត នៅកម្ពុជាឡើយ។ មួយវិញទៀតលោកថា បើទោះជាលោក មាជ សុវណ្ណារ៉ា មានសញ្ជាតិអាមេរិកាំងក្តី ប៉ុន្តែលោក មាជ សុវណ្ណារ៉ា មកធ្វើការងារនៅកម្ពុជា ដូច្នេះត្រូវស្ថិតនៅក្រោមច្បាប់របស់កម្ពុជា។
លោក ផៃ ស៊ីផាន៖ «លោក មាជ សុវណ្ណារ៉ា ស្ថិតនៅក្រោមឥទ្ធិពលនៃច្បាប់របស់ខ្មែរ ហើយបណ្ដឹងដែលដាក់នៅកន្លែងដទៃទៀតគ្រាន់តែជាបណ្ដឹង វាមិនមានពាក់ព័ន្ធការងារដែនសមត្ថកិច្ចរបស់តុលាការ ពីព្រោះហេតុកើតឡើងនៅក្នុងទឹកដីខ្មែរនៅក្រោមសមត្ថកិច្ចរបស់អាជ្ញាធរខ្មែរ សមត្ថកិច្ចរបស់តុលាការខ្មែរ ហើយអ្នកដែលជាប់ឃុំខ្លួនក៏នៅដែនដីខ្មែរ ដូច្នេះមិនមានការងារណាអាចធ្វើការតបប្រឆាំងដែលជាដែនសមត្ថកិច្ចនៅខ្មែរបានទេ»។
ភរិយាលោក មាជ សុវណ្ណារ៉ា តាមរយៈមេធាវីបរទេស លោក មូរតុន ក្លារ (Morton Sklar) បានដាក់ពាក្យបណ្ដឹងប្រឆាំងលោក ហ៊ុន ម៉ាណែត និងរដ្ឋាភិបាលកម្ពុជា កាលពីដើមខែមេសា ពីបទធ្វើទារុណកម្ម និងអំពើភេរវកម្ម។ ប៉ុន្តែលោក មូរតុន ក្លារ បានបញ្ជាក់ប្រាប់វិទ្យុអាស៊ីសេរី ថា លោក ហ៊ុន ម៉ាណែត មិនបានចូលឆ្លើយការពារខ្លួននៅតុលាការក្នុងរយៈពេល ៣០ថ្ងៃ បន្ទាប់ពីមានបណ្ដឹងប្ដឹងប្រឆាំងនឹងលោកឡើយ។
លោក មូរតុន ក្លារ អះអាងថា លោកនឹងដាក់សំណើទៅតុលាការដើម្បីចេញដីកាបញ្ជាក់ថា ដើមបណ្ដឹងឈ្នះក្ដី។ លោកថា ដីកាបញ្ជាក់ថា ដើមបណ្ដឹងឈ្នះក្ដីនេះជាជំហានទីមួយ ដើម្បីព្រមានទៅដល់ចុងចោទដែលមិនបានចូលបំភ្លឺតាមការកំណត់។ លោក មូរតុន ក្លារ ព្រមានថា លោក ហ៊ុន ម៉ាណែត អាចប្រឈមមុខនឹងបញ្ហាច្បាប់ ប្រសិនបើលោកបន្តមិនបង្ហាញខ្លួន ឬជួលមេធាវីការពារក្តីនោះទេ។
លោក ហ៊ុន សែន ប្រកាសកាលពីពេលថ្មីៗនេះថា បើនរណាម្នាក់ធ្វើឲ្យគ្រួសារលោកមិនបានសុខ លោកក៏នឹងមិនធ្វើឲ្យអ្នកនោះបានសុខដូចគ្នា។
ភរិយាលោក ម៉ាជ សុវណ្ណារ៉ា ដែលជាដើមបណ្ដឹងធ្លាប់អះអាងថា អ្នកស្រីមិនប្ដឹងលោក ហ៊ុន ម៉ាណែត មកកាន់តុលាការកម្ពុជា ដោយសារអ្នកស្រីយល់ច្បាស់ថា តុលាការកម្ពុជាមិនឯករាជ្យ និងស្ថិតក្រោមសម្ពាធរបស់បក្សកាន់អំណាច។ ដូច្នេះអ្នកស្រីមិនមានសង្ឃឹមថា តុលាការកម្ពុជា អាចរកយុត្តិធម៌ឲ្យអ្នកស្រីបាននោះឡើយ៕