ដោយ ជិន ជេដ្ឋា RFA 2016-10-21
មន្ត្រីអយ្យការអមសាលាដំបូងខេត្តកំពង់ឆ្នាំង ព្រមានចេញសេចក្ដីជូនដំណឹងរុះរើផ្ទះពលរដ្ឋចំនួន ៦ខ្នងដោយស្ម័គ្រចិត្តជាលើកទី២ ក្រោយពីម្ចាស់ផ្ទះមិនព្រមរុះរើចេញតាមកាលកំណត់នៃសេចក្ដីជូនដំណឹងលើកទី១។ ប៉ុន្តែអាជ្ញាធរស្នើសុំពន្យារពេលអនុវត្តសាលដីការបស់តុលាការកំពូលនេះ តាមរយៈសាលាដំបូងដើម្បីទុកលទ្ធភាពឲ្យអាជ្ញាធរស៊ើបអង្កេតរឿងរ៉ាវជាថ្មី។
មន្ត្រីនៃមន្ទីរទំនាក់ទំនងរដ្ឋសភា ព្រឹទ្ធសភា និងអធិការកិច្ចខេត្តកំពង់ឆ្នាំង បានហៅម្ចាស់ផ្ទះទាំង ៦ខ្នងដែលឋិតនៅខាងក្រោយផ្សារលើ ខេត្តកំពង់ឆ្នាំង នៅថ្ងៃទី២១ ខែតុលា ដើម្បីសួរពីប្រវត្តិចូលកាន់កាប់ដីលំនៅឋានរបស់ពួកគេ។ ក្រោយសួរនាំរួច ពលរដ្ឋបង្ហើបថា អាជ្ញាធរសន្យាសម្របសម្រួល និងជួយចេញលុយពលរដ្ឋទាំង ៦គ្រួសារ ដើម្បីយកទៅបង់ឲ្យភាគីដើមបណ្ដឹងដែលឈ្នះក្ដី។
អាស៊ីសេរី មិនទាន់អាចសុំការអត្ថាធិប្បាយលម្អិតជុំវិញបញ្ហានេះ ពីប្រធានមន្ទីរទំនាក់ទំនងរដ្ឋសភា ព្រឹទ្ធសភា និងអធិការកិច្ច លោក សោម សុជាតា បាននៅឡើយទេ។ ប៉ុន្តែលោកស្រី ស៊ុយ រដ្ឋា ដែលជាម្ចាស់ផ្ទះម្នាក់ក្នុងចំណោម ៦គ្រួសារឲ្យដឹងថា ក្រុមការងាររបស់មន្ទីរបានសួររកឯកសារទិញលក់ដីផ្ទះដែលគាត់កំពុងរស់នៅសព្វថ្ងៃ និងសួររឿងរ៉ាវជាច្រើនទៀតពាក់ព័ន្ធនឹងបញ្ហានេះ៖ «យើងចង់ជួយគេប្រាំពាន់ដុល្លារអ៊ីចឹងទៅ ហើយឲ្យខាងអាជ្ញាធរខេត្តអីជួយសម្រួលបញ្ចប់រឿងហ្នឹង។ ត្រូវនៅកន្លែងដដែល ព្រោះអត់កន្លែងនៅ មិនដឹងរុះផ្ទះទៅនៅណាទៀត»។
ក្ដីក្ដាំចម្រូងចម្រាសរវាងអតីតអភិបាលក្រុងកំពង់ឆ្នាំង លោក កាន់ ខេមរា ជាមួយដើមបណ្ដឹងឈ្មោះ ព្រហ្ម អឿន ប្ដឹងចោទលោក កាន់ ខេមរា ថាបានយកដីគាត់ទៅលក់ និងដោះដូរជូនពលរដ្ឋដែលរងផលប៉ះពាល់ពីការអភិវឌ្ឍផ្សារលើកាលពីឆ្នាំ២០០០។ ក្រោយលោក ព្រហ្ម អឿន ឈ្នះក្ដីពលរដ្ឋដែលទទួលដីដោះដូរពីអាជ្ញាធរ និងអ្នកទិញបន្តពីគេដើម្បីធ្វើផ្ទះរស់នៅបានក្លាយជាអ្នករងគ្រោះ។
ទាក់ទងបញ្ហានេះព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តកំពង់ឆ្នាំង លោក ឡុង ស៊ីថា ថ្លែងយ៉ាងខ្លីថា ចំពោះករណីនេះតុលាការនឹងអនុវត្តទៅតាមនីតិវិធីទៀត ដោយចេញសេចក្ដីជូនដំណឹងឲ្យរុះរើផ្ទះជាលើកទី២ បើទោះបីជាមានការស្នើសុំពន្យារពេលលើការអនុវត្តសាលក្រមនេះពីអាជ្ញាធរខេត្តក្ដី៖ «អាហ្នឹងខាងខេត្តសុំពន្យារពេល អ៊ីចឹងយើងនឹងជូនដំណឹងឲ្យគាត់រុះរើដោយស្ម័គ្រចិត្តលើកទី២។ បើយើងគិតពីនេះ (អង្គហេតុនៃសំណុំរឿង) គំនិតរបស់ខ្ញុំគួរដោះស្រាយតាមប្រព័ន្ធច្បាប់ឲ្យគាត់សម្របសម្រួលគ្នា តែភាគីទាំងសងខាងដូចជានៅរឹងនៅឡើយ»។
ទោះបីជាយ៉ាងណាពលរដ្ឋទាំង ៦គ្រួសារ ប្ដេជ្ញាបន្តរស់នៅលើដីនោះដដែល ដោយអះអាងថា ពួកគេបានទទួលដីដោះដូរពីអាជ្ញាធរស្របច្បាប់ និងខ្លះទិញដីបន្តពីម្ចាស់ដីដើមដែលមានលិខិតស្នាមត្រឹមត្រូវ៕