ដោយ សុ ជីវី RFA 2016-10-22
មន្រ្តីគណៈកម្មាធិការជាតិរៀបចំការបោះឆ្នោត (គ.ជ.ប) អះអាងថា ករណីចោរគាស់ការិយាល័យចុះឈ្មោះបោះឆ្នោតចូលទៅលួចអីវ៉ាន់នៅខេត្តតាកែវ គឺមិនប៉ះពាល់ដល់ទិន្នន័យ និងដំណើរការចុះឈ្មោះបោះឆ្នោតឡើយ។
សមាជិក និងជាអ្នកនាំពាក្យនៃ គ.ជ.ប លោក ហង្ស ពុទ្ធា មានប្រសាសន៍ថា ពិតជាមានករណីចោរលួចគាស់ការិយាល័យនៅក្នុងឃុំព្រៃល្វា ស្រុកព្រៃកប្បាស់ ខេត្តតាកែវ នោះមែន ប៉ុន្តែពុំបានធ្វើអោយប៉ះពាល់ដល់សម្ភារៈសំខាន់ ឬកុំព្យូទ័រសម្រាប់ការចុះឈ្មោះបោះឆ្នោតឡើយ។
លោក ហង្ស ពុទ្ធា បញ្ជាក់ថា ដំណើរការចុះឈ្មោះបោះឆ្នោតនៅក្នុងការិយាល័យនោះនៅដំណើរការធម្មតា ហើយ គ.ជ.ប បានប្រគល់សម្ភារៈថ្មីជំនួសសម្ភារៈដែលត្រូវចោរលួច។ លោក ហង្ស ពុទ្ធា ពន្យល់ថា តាមបច្ចេកទេសដែល គ.ជ.ប កំពុងប្រើប្រាស់នេះ បើទោះបីជាបាត់បង់កុំព្យូទ័រសម្រាប់ប្រើចុះឈ្មោះនោះក៏មិនធ្វើអោយបាត់បង់ទិន្នន័យរបស់អ្នកចុះឈ្មោះដែរ៖ «»។
សារព័ត៌មានក្នុងបានផ្សព្វផ្សាយថា កាលពីយប់ថ្ងៃទី២០ ខែតុលា ចោរបានគាស់ការិយាល័យចុះឈ្មោះបោះឆ្នោតនៅឃុំព្រៃល្វា លួចបានកញ្ចក់កំព្យូទ័រ ឬ ម៉ូនីទ័រ (Monitor) កុំព្យូទ័រ ១គ្រឿង ម៉ាស៊ីនស្កែន (Scan) ខ្ចៅដៃ១ អាគុយផ្ទុកថាមពល១ ខ្សែបញ្ចូលថ្មកុំព្យូទ័រ១ ឧបករណ៍សម្រាប់ភ្ជាប់អ៊ីនធឺណិត (Modem) ចំនួន១ ម៉ាស៊ីនថត១ កូនកណ្ដុរ ឬម៉ៅស៍ (Mouse) កុំព្យូទ័រ១ អង្គចងចាំ (USB) ១ និងសម្ភារៈបន្ទាប់បន្សំមួយចំនួនទៀត។ អាជ្ញាធរសមត្ថកិច្ចក្នុងខេត្តតាកែវ កំពុងតាមដានករណីនេះដើម្បីតាមចាប់អ្នកប្រព្រឹត្តល្មើស។
របាយការណ៍របស់ គ.ជ.ប ពីចំនួនអ្នកចុះឈ្មោះបោះឆ្នោតអោយដឹងថា គិតត្រឹមម៉ោង ៦ល្ងាចថ្ងៃទី២១ ខែតុលា ចំនួនអ្នកបានចុះឈ្មោះសរុបមានចំនួនជាង ៦លាននាក់ (៦.១២៤.១៤៩) ដែលស្មើនឹងជិត ៦៤ភាគរយ (៦៣,៧៥%)។ នៅខេត្តតាកែវ មានអ្នកចុះឈ្មោះបានសរុបជាង ៤សែននាក់ (៤៥២.៩១០) ដែលស្មើនឹងជាង ៧០ភាគរយ (៧០,៥៤%)៕