ទូច សុខា ភ្នំពេញប៉ុស្តិ៍ | Mon, 24 October 2016
ភ្នំពេញៈ ភ្លាមៗបន្ទាប់ពីទទួលបានលិខិតបញ្ជាពីទីស្តីការគណៈរដ្ឋមន្ត្រី អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានចេញលិខិតមួយជូនដំណឹងដល់មន្រ្តីសមត្ថកិច្ចនៅតាមច្រកព្រំដែន និងច្រកទ្វារអន្តរជាតិនានាឲ្យពង្រឹងការត្រួតពិនិត្យនៅតាមច្រករបស់ខ្លួនដើម្បីទប់ស្កាត់កុំឲ្យប្រធានគណបក្សសង្គ្រោះជាតិលោក សម រង្ស៊ី វិលចូលស្រុកវិញបាន។
លិខិតរបស់អគ្គនាយកនៃអគ្គនាយកដ្ឋានអន្តោប្រវេសន៍លោក សុខ ផល ដែលបានចុះកាលបរិច្ឆេទថ្ងៃទី ១៨ ខែតុលា ឆ្នាំ ២០១៦ បានណែនាំមន្ត្រីនៅតាមច្រកទ្វារអាកាសយានដ្ឋានអន្តរជាតិភ្នំពេញ សៀមរាប ព្រះសីហនុ និងប៉ុស្តិ៍ច្រកទ្វារអន្តរជាតិនានាបង្កើនការត្រួតពិនិត្យនៅតាមទីតាំងរបស់ខ្លួនហើយត្រូវរាយការណ៍ដល់នាយកដ្ឋាននៅពេលលោក សម រង្ស៊ី ចេញផុតពីយន្តហោះ។
ក្នុងលិខិតនោះសរសេរទៀតថា៖ «...ប្រធាននាយកដ្ឋានទាំងអស់ត្រូវយកចិត្តទុកដាក់ក្រើនរំឭកពង្រឹងការត្រួតពិនិត្យនៅតាមបណ្តាច្រកទ្វារអាកាយានដ្ឋានអន្តរជាតិទាំងបី ភ្នំពេញ សៀមរាប និងក្រុងព្រះសីហនុ និងប៉ុស្តិ៍ច្រកទ្វារព្រំដែនអន្តរជាតិនានា និងរាយការណ៍ជាបន្ទាន់ក្នុងករណីដែលបុគ្គល សម រង្ស៊ី បានចាកចេញផុតពីយន្តហោះនៃប៉ុស្តិ៍ច្រកទ្វារអាកាសយានដ្ឋានទាំងបី ឬតាមបណ្តាប៉ុស្តិ៍ច្រកទ្វារព្រំដែនអន្តរជាតិនានាព្រមទាំងចាត់វិធានការតាមផ្លូវច្បាប់ដើម្បីកុំឲ្យបុគ្គលនេះចូលស្រុកបាន និងចាត់វិធានការផ្សេងទៀតតាមការចាំបាច់ដោយអនុវត្តបានហ្មត់ចត់ និងទទួលបានប្រសិទ្ធភាពខ្ពស់»។
កាលពីថ្ងៃទី ២១ ខែតុលា ឆ្នាំ ២០១៦ មានការចែកផ្សាយនូវលិខិតមួយដែលចេញដោយទីស្តីការគណៈរដ្ឋមន្ត្រីមានកាលបរិច្ឆេទថ្ងៃទី ១២ ខែតុលា ឆ្នាំ ២០១៦ ជូនទៅកាន់លោក សុខ ផល ដោយមានខ្លឹមសារថាគ្រប់ក្រុមហ៊ុនអាកាសចរណ៍ទាំងអស់មិនត្រូវអនុញ្ញាតឲ្យលោក សម រង្ស៊ី ឡើងលើយន្តហោះទេ និងត្រូវផ្តល់របាយការណ៍ពីករណីលោក សម រង្ស៊ី ទិញសំបុត្រយន្តហោះធ្វើដំណើរមកកម្ពុជា។
លិខិតដដែលបន្តថា ក្នុងករណីដែលលោក សម រង្ស៊ី ធ្វើដំណើរមកកាន់កម្ពុជាតាមរយៈយន្តហោះណា យន្តហោះនោះនឹងមិនត្រូវអនុញ្ញាតឲ្យចុះចតទេ និងត្រូវបង្វែរឲ្យទៅកាន់អាកាសយានដ្ឋានដើមវិញ ឬបើយន្តហោះបានចុះចតហើយក៏ដោយគឺមិនអនុញ្ញាតឲ្យភ្ញៀវចេញដែរដោយត្រូវបញ្ជាឲ្យយន្តហោះនោះត្រឡប់ទៅអាកាសយានដ្ឋានដើមដូចគ្នា។ ក្នុងករណីដែលលោក សម រង្ស៊ី ចេញផុតពីយន្តហោះនគរបាលអន្តោប្រវេសន៍ត្រូវចាត់វិធានការផ្លូវច្បាប់ដើម្បីកុំឲ្យលោក សម រង្ស៊ី ចូលកម្ពុជាបាន។
ក្នុងលិខិតរបស់ទីស្តីការគណៈរដ្ឋមន្ត្រីសរសេរដែរថា៖ «ចំណារដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាចុះថ្ងៃទី ២៦ ខែកញ្ញាឆ្នាំ ២០១៦ ដើម្បីចាត់វិធានការបង្ការទុកជាមុនក្នុងការទប់ស្កាត់បុគ្គល សម រង្ស៊ី ...កុំឲ្យវិលចូលស្រុកវិញដោយអាជ្ញាធរមានសមត្ថកិច្ចមិនបានដឹងជាមុនទីស្តីការគណៈរដ្ឋមន្ត្រីបានចាត់តាំងកិច្ចប្រជុំគណៈកម្មាធិការសន្តិសុខកាលពីថ្ងៃទី ២៩ ខែកញ្ញាឆ្នាំ ២០១៦...»។
ទោះយ៉ាងណា អគ្គនាយករងនៃអគ្គនាយដ្ឋានអន្តោប្រវេសន៍ លោក កែវ វណ្ណថន បានប្រាប់ភ្នំពេញប៉ុស្តិ៍កាលពីម្សិលមិញថា អគ្គនាយកដ្ឋានបានទទួលលិខិតពីទីស្តីការគណៈរដ្ឋមន្ត្រីកាលពីថ្ងៃទី ១៨ ខែតុលា ឆ្នាំ ២០១៦។
លោកមិនអាចបញ្ចាក់បានទេថា មូលហេតុអ្វីបានជាគណៈរដ្ឋមន្ត្រីហាមឃាត់លោក សម រង្ស៊ី មិនឲ្យចូលស្រុកដូច្នេះ។
លោកបន្ថែមថា៖ «ខាងខ្ញុំ ខ្ញុំចាំតែអនុវត្តទេអ៊ីចឹងគណៈរដ្ឋមន្ត្រីគេចេញអ្វីមកក៏យើងខ្ញុំចាំតែអនុវត្តតាមច្បាប់ទេអ៊ីចឹងបើសួរខ្ញុំថាហេតុអ្វីបានចេញលិខិតហ្នឹងសួរខ្ញុំអត់ត្រូវទេ»។
អ្នកនាំពាក្យទីស្តីការគណៈរដ្ឋមន្ត្រីលោក ផៃ ស៊ីផាន បានថ្លែងកាលពីម្សិលមិញថាលោកមិនទាន់បានដឹងថាទីស្តីការគណៈរដ្ឋមន្ត្រីបានចេញលិខិតនេះឬយ៉ាងណានោះទេ។
លោកបន្ថែមថា៖ «ឥឡូវនេះកំពុងតែចាប់ផ្តើម (ទាក់ទង) តាមទូរស័ព្ទហ្នឹងហើយប្រហែលជាថ្ងៃចន្ទ ឬថ្ងៃអង្គារព្រោះម្នាក់ៗដូចកន្លែងដែលឯកឧត្តមចុះហត្ថលេខាហ្នឹងអត់មានសេវា (ទូរស័ព្ទ)»។
ចំណែកអ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីលោក ទិត សុធា ក៏ថ្លែងដែរថាលោកមិនបានដឹងពីលិខិតនេះដូចគ្នា។
កាលពីថ្ងៃទី ១៩ ខែតុលាលោក សម រង្ស៊ី បានប្រកាសក្នុងវីដេអូឃ្លីបមួយដែលបង្ហោះលើទំព័រហ្វេសប៊ុកផ្លូវការរបស់លោកថាលោកនឹងវិលមកកម្ពុជាវិញក្នុងពេលឆាប់ៗដោយថាលោកមិនខ្លាចក្នុងការចាប់ខ្លួននោះទេ។
លោកថា លោកសុខចិត្តឲ្យអាជ្ញាធរចាប់ខ្លួនលោកដាក់ពន្ធនាគារជាថ្នូរនឹងការដោះលែងមន្ត្រីសិទ្ធិមនុស្ស មន្ត្រី និងសកម្មជនគណបក្សប្រឆាំង។ ទោះយ៉ាងណានៅថ្ងៃទី ២១ ខែតុលាក៏មានលេចចេញនូវសេចក្តីជូនដំណឹងស្តីពីការហាមឃាត់មិនឲ្យលោក សម រង្ស៊ី វិលចូលស្រុកវិញនេះ។
នៅថ្ងៃជាមួយគ្នានេះ លោក សម រង្ស៊ី បានសរសេរលើទំព័រហ្វេសប៊ុករបស់លោកថា៖ «ដំណឹងចុងក្រោយគេហាមមិនឲ្យខ្ញុំវិលត្រឡប់មកស្រុកវិញ»។
លោកមេធាវី សុក សំអឿន ថ្លែងថាមិនមានច្បាប់ណាដែលចែងពីការនិរទេសចេញក្រៅប្រទេស ឬហាមមិនឲ្យប្រជាពលរដ្ឋខ្មែរវិលចូលស្រុកនោះទេដោយលោកថាបើអ្នកទាំងនោះប្រព្រឹត្តខុសអ្វីមួយត្រូវទទួលខុសត្រូវចំពោះមុខច្បាប់ដូចជាជាប់ពន្ធនាគារជាដើម។
លោកបន្ថែមថា៖ «មិនដែលមានផងបើមានទោសដាក់គុកទៅ»។
ចំណែកមេធាវីរបស់គណបក្សសង្គ្រោះជាតិលោកស្រី ម៉េង សុភារី បានថ្លែងថាការហាមឃាត់នេះផ្ទុយទៅនឹងរដ្ឋធម្មនុញ្ញដែលលោកស្រីថាលោក សម រង្ស៊ី ជាពលរដ្ឋខ្មែរហើយគ្មាននរណាម្នាក់អាចហាមឃាត់មិនឲ្យលោក សម រង្ស៊ីវិលចូលប្រទេសវិញនោះទេ។
លោកស្រីបន្ថែមថា៖ «តាមខ្ញុំយល់នេះជាការរំលោភលើរដ្ឋធម្មនុញ្ញហើយព្រោះនេះជាប្រទេសខ្មែរហើយប្រទេសខ្មែរជាប្រទេសរបស់ពលរដ្ឋទាំងអស់គ្នាមិនមែនជារបស់បុគ្គលណាមានសិទ្ធិលើប្រទេសហ្នឹងទេ»។
មាត្រា ៣៣ នៃរដ្ឋធម្មនុញ្ញចែងថា៖ «ប្រជាពលរដ្ឋខ្មែរមិនអាចត្រូវបានដកសញ្ជាតិ និរទេស ឬចាប់បញ្ជូនខ្លួនឲ្យទៅប្រទេសក្រៅណាមួយឡើយលើកលែងតែមានកិច្ចព្រមព្រៀងជាមួយគ្នាទៅវិញទៅមក។ ប្រជាពលរដ្ឋខ្មែរដែលកំពុងរស់នៅក្រៅប្រទេសត្រូវបានរដ្ឋការពារ...»៕