ដោយ សន ចាន់រដ្ឋា RFA 2016-11-05
យុវជនប្រមាណ ១ពាន់នាក់ នៅព្រឹកថ្ងៃទី៥ ខែវិច្ឆិកា នេះ ចូលរួមស្វែងយល់អំពីចំណេះដឹងទាក់ទងនឹងបច្ចេកវិទ្យា នៅក្នុងព្រឹត្តិការណ៍បាខែម អាស៊ាន (BARCAMP ASEAN) ដែលរៀបចំឡើងនៅសាកលវិទ្យាល័យន័រតុន (Norton) ក្នុងសង្កាត់ជ្រោយចង្វារ។
បាខែម គឺជាព្រឹត្តិការណ៍ចែករំលែកចំណេះ និងបទពិសោធន៍ទាក់ទងនឹងបច្ចេកវិទ្យា និងសហគ្រិនភាព ដែលរៀបចំឡើងដោយក្រុមបាខែម កម្ពុជា។ បាខែម បានចាប់ផ្ដើមឡើងតាំងពីឆ្នាំ២០០៨។
អ្នករៀបចំព្រឹត្តិការណ៍បាខែម លោក បេ ចាន់ត្រា ឱ្យអាស៊ីសេរី ដឹងថា បាខែម អាស៊ានឆ្នាំ២០១៦ នេះ មានលក្ខណៈពិសេស ដោយសារមានការរៀបចំពីអ្នករៀបចំបាខែម និងវាគ្មិនមកពីបណ្ដាប្រទេសអាស៊ាន។ លោកបន្ថែមថា បាខែម អាស៊ាន ឆ្នាំ២០១៦ ផ្ដោតសំខាន់លើបច្ចេកវិទ្យា និងអាជីវកម្មខ្នាតតូច។
ព្រឹត្តិការណ៍បាខែម អាស៊ាន លើកទី៥ នេះ បានចាប់ផ្ដើមតាំងពីថ្ងៃទី៤ ខែវិច្ឆិកា និងបញ្ចប់ទៅវិញនៅល្ងាចថ្ងៃទី៦ វិច្ឆិកា។ ព្រឹត្តិការណ៍នេះមានការដាក់តាំងពិព័រណ៍ផលិតផល ឬស្នាដៃនានា និងកម្មវិធីចែករំលែកចំណេះដឹងទាក់ទងនឹងប្រធានបទផ្សេងៗ៕