ដោយ អ៊ុង សេរីវុទ្ធ RFA 2016-05-18
តុលាការក្រុងភ្នំពេញចេញដីកាកោះហៅប្រធានស្ដីទីគណបក្សសង្គ្រោះជាតិ លោក កឹម សុខា មកឆ្លើយបំភ្លឺជាលើកទី២ ក្នុងនាមជាសាក្សី ពាក់ព័ន្ធនឹងអំពើសញ្ចារកម្ម។
ដីការបស់ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លោក សៀង សុខ ចុះថ្ងៃទី១៨ ឧសភា បង្គាប់ឲ្យលោក កឹម សុខា ចូលឆ្លើយបំភ្លឺនៅថ្ងៃទី២៦ ឧសភា វេលាម៉ោង៩ព្រឹក។
កាលពីថ្ងៃទី១៧ ឧសភា លោក កឹម សុខា រួមនឹងមេធាវីរបស់លោកផង មិនបានចូលខ្លួនឆ្លើយបំភ្លឺតាមការកោះហៅរបស់តុលាការក្នុងនាមជាសាក្សី ពាក់ព័ន្ធនឹងសំណុំរឿងសញ្ចរកម្មឡើយ។
ចំណែកតំណាងរាស្ត្រពីររូបរបស់គណបក្សនេះ គឺលោក ពិន រតនា និងលោក តុ វ៉ាន់ចាន់ ដែលជាប់ចោទថា បាននាំអ្នកនាង ខុម ចាន់តារាទី ហៅស្រីមុំ ទៅជួបលោក កឹម សុខា នៅទីក្រុងបាងកក ប្រទេសថៃ នោះ ក៏មិនបានចូលខ្លួនបំភ្លឺតាមការកោះហៅរបស់តុលាការដូចគ្នា កាលពីថ្ងៃទី១៦ ខែឧសភា។
លោក កឹម សុខា មិនបានចូលបំភ្លឺតាមដីកាកោះរបស់តុលាការក្រុងភ្នំពេញ២លើកហើយ រួមនឹងបណ្ដឹងបរិហារកេរ្តិ៍របស់កញ្ញា ធី សុវណ្ណថា ផង។ ការមិនចូលឆ្លើយបំភ្លឺនេះ បន្ទាប់ពីគណបក្សប្រឆាំងបានចេញសេចក្ដីថ្លែងការណ៍ថា លោក កឹម សុខា និងតំណាងរាស្ត្រពីររូបទៀតនេះ មានអភ័យឯកសិទ្ធិសភា ហើយការកោះហៅរបស់តុលាការនេះ គឺផ្ទុយពីរដ្ឋធម្មនុញ្ញត្រង់មាត្រា៨០ ដែលចែងថា តំណាងរាស្ត្រមានអភ័យឯកសិទ្ធិសភា ហើយមិនត្រូវចោទប្រកាន់ ចាប់ខ្លួន ឃាត់ខ្លួនបានឡើយ លុះត្រាមានការយល់ព្រមពីរដ្ឋសភា ឬគណៈកម្មាធិការអចិន្ត្រៃយ៍រដ្ឋសភា ក្នុងចន្លោះសម័យប្រជុំនៃរដ្ឋសភា វៀរលែងតែបទល្មើសព្រហ្មទណ្ឌជាក់ស្ដែង៕