ដោយ សេក បណ្ឌិត RFA 2016-05-19
ក្រុមនិស្សិតអាហារូបករណ៍កម្ពុជា នៅសហព័ន្ធរុស្ស៊ី កំពុងជួបការលំបាកលើជីវភាព អំពាវនាវឲ្យរដ្ឋាភិបាលជួយឧបត្ថម្ភដោយដំឡើងប្រាក់អាហារូបករណ៍បន្ថែមទៀត។
តំណាងនិស្សិតបានថ្លែងចំពោះមុខលោកនាយករដ្ឋមន្ត្រី ហ៊ុន សែន ក្នុងពេលលោកបានចុះសួរសុខទុក្ខនិស្សិត នៅពេលលោកកំពុងបំពេញទស្សនកិច្ចនៅប្រទេសរុស្ស៊ី នោះថា សព្វថ្ងៃពួកគេទទួលបានប្រាក់ខែប្រមាណ ២៥ដុល្លារក្នុងមួយខែ និងប្រាក់ឧបត្ថម្ភពីរដ្ឋាភិបាល ១០ដុល្លារទៀត ដែលប្រាក់ទាំងនេះមិនគ្រប់គ្រាន់ក្នុងការចំណាយក្នុងការរៀនសូត្រ និងការរស់នៅប្រចាំថ្ងៃនោះបានទេ។
តំណាងនិស្សិតថ្លែងថា «និស្សិតទាំងអស់ដែលកំពុងរស់នៅទីនេះ បានជួបការលំបាកទាំងការរស់នៅ និងការសិក្សា ដោយសារទំនិញឡើងថ្លៃ ការចំណាយលើសេវាធានារ៉ាប់រងសុខភាព និងការចំណាយផ្សេងៗទៀត អាចអស់ចំនួន ១០០ ទៅ ១៥០ដុល្លារយ៉ាងតិចក្នុងមួយខែ រីឯប្រាក់ខែដែលរដ្ឋាភិបាលសហព័ន្ធរុស្ស៊ី ទទួលបានមានតិចតួចណាស់»។
ជំនួបរវាងលោកនាយករដ្ឋមន្ត្រី និងក្រុមនិស្សិតទាំងនោះ ត្រូវបានផ្សព្វផ្សាយនៅលើទំព័រហ្វេសប៊ុក (Facebook) របស់លោក ហ៊ុន សែន កាលពីថ្ងៃពុធ ទី១៨ ឧសភា។
ក្នុងជំនួបនោះដែរ លោក ហ៊ុន សែន បានសម្រេចភ្លាមៗតាមការស្នើសុំ ដោយសម្រេចដំឡើងប្រាក់ឧបត្ថម្ភពីរដ្ឋាភិបាលកម្ពុជា ពី ១០ដុល្លារទៅ ៥០ដុល្លារក្នុងមួយខែ ដោយគិតចាប់ពីខែឧសភា ឆ្នាំ២០១៦ នេះ ហើយប្រាក់ទាំងនោះត្រូវរាប់បញ្ចូលក្នុងខ្ទង់ចំណាយរបស់រដ្ឋាភិបាល។ ក្រសួងសេដ្ឋកិច្ច និងហិរញ្ញវត្ថុ នឹងរៀបចំបញ្ជូនប្រាក់នោះឲ្យក្រុមនិស្សិតទាំងអស់រៀងរាល់ ៣ខែម្តង។
និស្សិតដែលកំពុងបំពេញការសិក្សានៅសហព័ន្ធរុស្ស៊ី បច្ចុប្បន្នសរុបចំនួន ៣៣១នាក់ ក្នុងនោះមាននិស្សិតផ្នែកយោធា និងផ្នែកផ្សេងៗទៀត៕