ដោយ ហង្ស សាវយុត RFA 2016-05-19
ស្រុកអង្គរជុំ ចម្ងាយជាង ៥០គីឡូម៉ែត្រភាគខាងលិចពីទីរួមខេត្តសៀមរាប គឺស្ថិតនៅតាមបណ្ដោយអតីតផ្លូវបុរាណដែលចេញពីទីក្រុងអង្គរ ឆ្ពោះទៅកាន់ក្រុងភីម៉ាយ ដែលបច្ចុប្បន្នស្ថិតនៅក្នុងទឹកដីថៃ ទៅហើយ។
ស្រុកនោះនៅមានសល់ប្រាសាទបុរាណ និងស្ពានបុរាណជាច្រើនដែលជាស្នាដៃនៃព្រលឹងវប្បធម៌ និងប្រវត្តិសាស្ត្ររបស់ខ្មែរ ក៏ប៉ុន្តែបច្ចុប្បន្ន ស្លាកស្នាមនៃវប្បធម៌ទាំងនោះបានបាក់បែកដោយរងការគំរាមកំហែងពីមនុស្សផង និងធម្មជាតិផង ដែលទាមទារឲ្យមានកិច្ចការពារជាបន្ទាន់។
ពលរដ្ឋមួយចំនួនដែលស្រឡាញ់ និងចូលចិត្តស្នាដៃសិល្បៈរបស់បុព្វបុរសខ្មែរ បានអំពាវនាវឲ្យអាជ្ញាធរ និងមន្ត្រីរដ្ឋាភិបាល ផ្ដោតការយកចិត្តទុកដាក់ទៅលើកិច្ចការពារប្រាសាទបុរាណចំនួន ១០ និងស្ពានបុរាណចំនួន ១០កន្លែងទៀតនៅក្នុងស្រុកអង្គរជុំ ដែលកំពុងតែបែកបាក់ ហាក់មិនសូវមានអ្នកណាមើលថែរក្សាឲ្យបានដិតដល់ទាល់តែសោះនោះ។
ការអំពាវនាវ បានធ្វើឡើងបន្ទាប់ពីប្រជាពលរដ្ឋខ្លះបានចំណាយពេលវេលាផ្ទាល់ខ្លួន ដើរស្រាវជ្រាវប្រាសាទ និងស្ពានបុរាណ ហើយប្រទះឃើញប្រាសាទអាយុជិត ១ពាន់ឆ្នាំជាច្រើនកន្លែងក្នុងស្រុកអង្គរជុំ ទទួលរងការបែកបាក់រាយប៉ាយលើដី ហើយគ្មានអ្នកការពារឲ្យត្រឹមត្រូវទេ។
យុវជនម្នាក់នៅស្រុកអង្គរជុំ ដែលតែងដើរស្រាវជ្រាវទីបុរាណទាំងនោះ គឺលោក មិត សុម៉ា។ លោកមានប្រសាសន៍កាលពីថ្ងៃពុធ ទី១៨ ខែឧសភា ថា លោកមានអារម្មណ៍សង្វេគនៅពេលដែលឃើញប្រាសាទបុរាណជាច្រើនបែកបាក់រាយប៉ាយនៅលើដី ហើយប្រាសាទខ្លះត្រូវគេនាំគ្នាជីកដីស្រេចតែចិត្ត ដោយគ្មានអ្នកមើលថែ។ យុវជនដដែល អំពាវនាវឲ្យអាជ្ញាធរស្រុកអង្គរជុំ ឬក៏អាជ្ញាធរជំនាញផ្នែកអភិរក្ស និងថែរក្សា ជួយសង្គ្រោះប្រាសាទបុរាណ និងស្ពានបុរាណជាច្រើននៅក្នុងទឹកដីស្រុកអង្គរជុំ នោះផង៖ «ប្រាសាទតាត្រាវ ក្នុងឃុំគោកដូង ម្សិលមិញខ្ញុំនាំភ្ញៀវទៅមើល។ ខ្ញុំឃើញគេជីកនៅកស្សិណខាងមុខប្រាសាទ មិនដឹងគេជីកធ្វើអ្វី? វាទ្រុឌទ្រោមអស់ទៅហើយ ក៏ប៉ុន្តែយើងចង់ឲ្យមានការអភិរក្ស»។
មគ្គុទ្ទេសក៍ទេសចរណ៍ផ្នែកភាសាថៃ មួយរូបដែលឧស្សាហ៍ចុះទៅស្រាវជ្រាវបុរាណដ្ឋានក្នុងស្រុកអង្គរជុំ លោក រ៉េត សាមុត ឲ្យដឹងថា ដោយសារស្រុកអង្គរជុំ ស្ថិតនៅតាមបណ្ដោយផ្លូវបុរាណចេញពីក្រុងអង្គរ ឆ្ពោះទៅក្រុងភីម៉ាយ កាលពីអំឡុងសតវត្សទី១១-១២ នៃគ្រិស្តសករាជ គឺវាមានបន្សល់ទុកប្រាសាទបុរាណប្រហែល ១០ និងស្ពានបុរាណប្រហែល ១០កន្លែងទៀត ប៉ុន្តែបច្ចុប្បន្ន មរតកវប្បធម៌ទាំងនោះកំពុងរងការគំរាមកំហែងពីមនុស្ស និងធម្មជាតិ ដែលត្រូវតែមានកិច្ចការពារយ៉ាងដិតដល់។
អភិបាលស្រុកអង្គរជុំ លោក លុក ផុស បានឆ្លើយតបនឹងកង្វល់ទាំងនេះថា បច្ចុប្បន្នអាជ្ញាធរបានចាត់តាំងមន្ត្រីឲ្យការពារប្រាសាទបុរាណទាំងនោះ ប៉ុន្តែដោយសារប្រាសាទជាច្រើនបានបែកបាក់ទៅហើយ អាជ្ញាធរបានត្រឹមតែការពារ និងចុះបញ្ជីប៉ុណ្ណោះ៖ «ជំនាញខាងខ្ញុំក៏មិនទាន់មានជួសជុលឡើងវិញអី គឺអត់ទេ។ អ៊ីចឹងសព្វថ្ងៃ គឺបានតែថែរក្សាទាំងអស់»។
មគ្គុទ្ទេសក៍ទេសចរណ៍ លោក រ៉េត សាមុត បានចាត់ទុកប្រាសាទបុរាណចំនួន ១០ និងស្ពានបុរាណប្រហែល ១០កន្លែងទៀតដែលបន្សល់ទុកក្នុងស្រុកអង្គរជុំ ក្រៅតែពីជាព្រលឹងវប្បធម៌របស់ខ្មែរ ក៏ជាសម្បត្តិមហាសាលដែលមិនអាចកាត់ថ្លៃបាន។ ពេលអនាគត ប្រសិនបើស្រុកអង្គរជុំ មានផ្លូវថ្នល់ល្អ គឺប្រាសាទ និងផ្លូវបុរាណទាំងនោះអាចទាក់ទាញភ្ញៀវទេសចរបរទេសចំនួនច្រើន ឲ្យទៅទស្សនា ហើយអាចបង្កើតមុខរបរឲ្យអ្នកស្រុកអាចរកកម្រៃបានចិញ្ចឹមជីវិតផង៕