ដោយ ប្រាជ្ញ ចេវ 2016-05-21 RFA
ពលរដ្ឋ និងមន្ត្រីឃុំគណបក្សប្រឆាំងនៅខេត្តកំពង់ចាម ចោទប្រកាន់ប្រធានភូមិ និងអនុប្រធានភូមិរបស់គណបក្សប្រជាជនកម្ពុជា ថាកំពុងធ្វើយុទ្ធនាការដើរប្រមូលស្នាមមេដៃពីពលរដ្ឋឲ្យគាំទ្រគណបក្សប្រជាជនកម្ពុជា។ ទាក់ទងការចោទប្រកាន់នេះ អ្នកដើរប្រមូលស្នាមមេដៃឆ្លើយតបថា ខ្លួនពិតជាបានដើរប្រមូលស្នាមមេដៃមែន។
ជំទប់ទី២ ឃុំព្រែកដំបូក ស្រុកស្រីសន្ធរ ខេត្តកំពង់ចាម មកពីគណបក្សសិទ្ធិមនុស្ស លោក ទួត ម៉ៅ ឲ្យដឹងថា មានទាំងមេភូមិ និងអនុប្រធានភូមិ នៅភូមិតាមល់ ភូមិតាម៉ឺន មេភូមិតាកយ នៃឃុំព្រែកដំបូក កំពុងប្រមូលស្នាមមេដៃពីពលរដ្ឋឲ្យគាំទ្រគណបក្សប្រជាជនកម្ពុជា។ លោកថា ការប្រមូលស្នាមមេដៃនេះ ដោយក្រុមមន្ត្រីភូមិអះអាងថា គាំទ្រឲ្យយកប្រភពទឹកស្អាតពីទន្លេមេគង្គមកប្រើប្រាស់ និងគោលបំណងមួយទៀតដើម្បីឲ្យគាំទ្រគណបក្សប្រជាជនកម្ពុជា៖ «សកម្មភាពហ្នឹងខ្ញុំគិតថា ការដើរយកទឹកស្អាតជាខែលដើម្បីឲ្យពលរដ្ឋផ្ដិតមេដៃគាំទ្របក្សប្រជាជនកម្ពុជា»។
ជំទប់ទី២ ឃុំព្រែកដំបូក លោក ទួត ម៉ៅ ឲ្យដឹងទៀតថា សកម្មភាពប្រមូលស្នាមមេដៃនេះ ត្រូវបានចាប់ផ្ដើមកាលពីថ្ងៃទី០២ ខែឧសភា រហូតមកទល់ពេលនេះ។
ពលរដ្ឋ និងមន្ត្រីឃុំបក្សប្រឆាំងព្រួយបារម្ភថា ការប្រមូលស្នាមមេដៃនៅពេលនេះ នឹងមានបំណងធ្វើអ្វីផ្សេងពីការអះអាងរបស់មេភូមិគណបក្សកាន់អំណាច ដែលធ្វើក្នុងពេលស្ថានការណ៍នយោបាយកំពុងតានតឹង និងមានការប្រកាសរបស់អ្នកប្រើប្រាស់ហ្វេសប៊ុក (Facebook) ល្បីឈ្មោះម្នាក់គឺកញ្ញា ធី សុវណ្ណថា ថានឹងប្រមូលស្នាមមេដៃចំនួន ១លាននាក់ ដើម្បីទម្លាក់លោក កឹម សុខា ចេញពីអនុប្រធានគណបក្សសង្គ្រោះជាតិ។
ទាក់ទងរឿងនេះ វិទ្យុអាស៊ីសេរី មិនអាចសុំការបំភ្លឺពីកញ្ញា ធី សុវណ្ណថា បានទេ នៅថ្ងៃទី២០ ខែឧសភា។
ពលរដ្ឋរស់នៅភូមិតាមល់ ឃុំព្រែកដំបូក ស្រុកស្រីសន្ធរ ខេត្តកំពង់ចាម លោកស្រី តុន ស្រីឡូត ដែលផ្ដិតមេដៃគាំទ្រគណបក្សប្រជាជនកម្ពុជា តាមសំណើមេភូមិ ឲ្យវិទ្យុអាស៊ីសេរី ដឹងថា លោកស្រីមិនចង់ផ្ដិតមេដៃទេ ប៉ុន្តែលោកមេភូមិនិយាយម្ដងហើយម្ដងទៀតអោយលោកស្រីជួយផ្ដិតមេដៃទើបលោកស្រីយល់ព្រមតាមសំណើ៖ «គាត់ (លោកអនុប្រធានភូមិ) ប្រាប់ខ្ញុំថា ស្រីឡូត ឯងគាំទ្រគណបក្សប្រជាជនទៅ។ ចិត្តខ្ញុំរារែកដែរមិនចង់ផ្ដិតមេដៃផងហ្នឹង»។
អនុប្រធានភូមិតាមល់ មកពីគណបក្សប្រជាជនកម្ពុជា លោក គឹម ពៅ ទទួលស្គាល់ថា លោកពិតជាបានដើរប្រមូលស្នាមមេដៃពីពលរដ្ឋដើម្បីគាំទ្រគណបក្សប្រជាជនកម្ពុជា និងផ្ដិតមេដៃចង់បានទឹកស្អាត។ លោកបន្តថា ការប្រមូលស្នាមមេដៃគាំទ្រគណបក្សប្រជាជនកម្ពុជា ព្រោះលោកធ្វើតាមការបញ្ជារបស់ថ្នាក់លើនៃគណបក្សប្រជាជន ដើម្បីចងពលរដ្ឋជាក្រុមៗនៅថ្នាក់មូលដ្ឋាន៖ «ផ្ដិតមេដៃគ្រាន់ចង់ចងជាក្រុម មិនបង្ខិតបង្ខំគាត់ទេ យើងមិនយកធ្វើអីទេ គ្រាន់តែចងជាក្រុមទេ»។
លោកអនុប្រធានភូមិដដែលឲ្យដឹងទៀតថា ក្នុងមួយក្រុមមានពលរដ្ឋប្រមាណជា ៦នាក់ ហើយក្នុងមួយគ្រួសារអ្នកណានៅផ្ទះជាប់លាប់នឹងធ្វើជាប្រធានក្រុម។
ទោះជាយ៉ាងនេះក្តី អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងថា លោកមិនបានដឹងរឿងនេះទេ។ លោកបដិសេធថា គណបក្សប្រជាជនកម្ពុជា គ្មានគោលការណ៍ឲ្យថ្នាក់ក្រោមដើរប្រមូលស្នាមមេដៃដើម្បីគាំទ្រគណបក្សឡើយ។ ប៉ុន្តែលោកក៏មិនបញ្ជាក់ថា គណបក្សនឹងស្រាវជ្រាវរកការពិតលើករណីនេះទេ៖ «គណបក្សប្រជាជនកម្ពុជា មិនដែលមានគោលការណ៍អ៊ីចឹងទេ រឿងគេហៅទៅស្បថ ហៅគេទៅសច្ចា ហៅគេទៅផ្ដិតមេដៃគាំទ្រ សមាជិកមកចូលជាមួយគណបក្សលុះត្រាតែគេភ្ញាក់រលឹកមកចូលរួមជាមួយគណបក្សប្រជាជនកម្ពុជា»។
នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) លោក គល់ បញ្ញា មានប្រសាសន៍មេភូមិជាបុគ្គល អព្យាក្រឹត្យ និងអ្នកផ្ដល់សេវាសាធារណៈដល់ពលរដ្ឋ ហើយករណីមេភូមិជាអ្នកដើរប្រមូលស្នាមមេដៃដូចនេះជាការដាក់បន្ទុកដល់ពលរដ្ឋដែលមិនបានគាំទ្រគណបក្សកាន់អំណាច៕
ពលរដ្ឋ និងមន្ត្រីឃុំគណបក្សប្រឆាំងនៅខេត្តកំពង់ចាម ចោទប្រកាន់ប្រធានភូមិ និងអនុប្រធានភូមិរបស់គណបក្សប្រជាជនកម្ពុជា ថាកំពុងធ្វើយុទ្ធនាការដើរប្រមូលស្នាមមេដៃពីពលរដ្ឋឲ្យគាំទ្រគណបក្សប្រជាជនកម្ពុជា។ ទាក់ទងការចោទប្រកាន់នេះ អ្នកដើរប្រមូលស្នាមមេដៃឆ្លើយតបថា ខ្លួនពិតជាបានដើរប្រមូលស្នាមមេដៃមែន។
ជំទប់ទី២ ឃុំព្រែកដំបូក ស្រុកស្រីសន្ធរ ខេត្តកំពង់ចាម មកពីគណបក្សសិទ្ធិមនុស្ស លោក ទួត ម៉ៅ ឲ្យដឹងថា មានទាំងមេភូមិ និងអនុប្រធានភូមិ នៅភូមិតាមល់ ភូមិតាម៉ឺន មេភូមិតាកយ នៃឃុំព្រែកដំបូក កំពុងប្រមូលស្នាមមេដៃពីពលរដ្ឋឲ្យគាំទ្រគណបក្សប្រជាជនកម្ពុជា។ លោកថា ការប្រមូលស្នាមមេដៃនេះ ដោយក្រុមមន្ត្រីភូមិអះអាងថា គាំទ្រឲ្យយកប្រភពទឹកស្អាតពីទន្លេមេគង្គមកប្រើប្រាស់ និងគោលបំណងមួយទៀតដើម្បីឲ្យគាំទ្រគណបក្សប្រជាជនកម្ពុជា៖ «សកម្មភាពហ្នឹងខ្ញុំគិតថា ការដើរយកទឹកស្អាតជាខែលដើម្បីឲ្យពលរដ្ឋផ្ដិតមេដៃគាំទ្របក្សប្រជាជនកម្ពុជា»។
ជំទប់ទី២ ឃុំព្រែកដំបូក លោក ទួត ម៉ៅ ឲ្យដឹងទៀតថា សកម្មភាពប្រមូលស្នាមមេដៃនេះ ត្រូវបានចាប់ផ្ដើមកាលពីថ្ងៃទី០២ ខែឧសភា រហូតមកទល់ពេលនេះ។
ពលរដ្ឋ និងមន្ត្រីឃុំបក្សប្រឆាំងព្រួយបារម្ភថា ការប្រមូលស្នាមមេដៃនៅពេលនេះ នឹងមានបំណងធ្វើអ្វីផ្សេងពីការអះអាងរបស់មេភូមិគណបក្សកាន់អំណាច ដែលធ្វើក្នុងពេលស្ថានការណ៍នយោបាយកំពុងតានតឹង និងមានការប្រកាសរបស់អ្នកប្រើប្រាស់ហ្វេសប៊ុក (Facebook) ល្បីឈ្មោះម្នាក់គឺកញ្ញា ធី សុវណ្ណថា ថានឹងប្រមូលស្នាមមេដៃចំនួន ១លាននាក់ ដើម្បីទម្លាក់លោក កឹម សុខា ចេញពីអនុប្រធានគណបក្សសង្គ្រោះជាតិ។
ទាក់ទងរឿងនេះ វិទ្យុអាស៊ីសេរី មិនអាចសុំការបំភ្លឺពីកញ្ញា ធី សុវណ្ណថា បានទេ នៅថ្ងៃទី២០ ខែឧសភា។
ពលរដ្ឋរស់នៅភូមិតាមល់ ឃុំព្រែកដំបូក ស្រុកស្រីសន្ធរ ខេត្តកំពង់ចាម លោកស្រី តុន ស្រីឡូត ដែលផ្ដិតមេដៃគាំទ្រគណបក្សប្រជាជនកម្ពុជា តាមសំណើមេភូមិ ឲ្យវិទ្យុអាស៊ីសេរី ដឹងថា លោកស្រីមិនចង់ផ្ដិតមេដៃទេ ប៉ុន្តែលោកមេភូមិនិយាយម្ដងហើយម្ដងទៀតអោយលោកស្រីជួយផ្ដិតមេដៃទើបលោកស្រីយល់ព្រមតាមសំណើ៖ «គាត់ (លោកអនុប្រធានភូមិ) ប្រាប់ខ្ញុំថា ស្រីឡូត ឯងគាំទ្រគណបក្សប្រជាជនទៅ។ ចិត្តខ្ញុំរារែកដែរមិនចង់ផ្ដិតមេដៃផងហ្នឹង»។
អនុប្រធានភូមិតាមល់ មកពីគណបក្សប្រជាជនកម្ពុជា លោក គឹម ពៅ ទទួលស្គាល់ថា លោកពិតជាបានដើរប្រមូលស្នាមមេដៃពីពលរដ្ឋដើម្បីគាំទ្រគណបក្សប្រជាជនកម្ពុជា និងផ្ដិតមេដៃចង់បានទឹកស្អាត។ លោកបន្តថា ការប្រមូលស្នាមមេដៃគាំទ្រគណបក្សប្រជាជនកម្ពុជា ព្រោះលោកធ្វើតាមការបញ្ជារបស់ថ្នាក់លើនៃគណបក្សប្រជាជន ដើម្បីចងពលរដ្ឋជាក្រុមៗនៅថ្នាក់មូលដ្ឋាន៖ «ផ្ដិតមេដៃគ្រាន់ចង់ចងជាក្រុម មិនបង្ខិតបង្ខំគាត់ទេ យើងមិនយកធ្វើអីទេ គ្រាន់តែចងជាក្រុមទេ»។
លោកអនុប្រធានភូមិដដែលឲ្យដឹងទៀតថា ក្នុងមួយក្រុមមានពលរដ្ឋប្រមាណជា ៦នាក់ ហើយក្នុងមួយគ្រួសារអ្នកណានៅផ្ទះជាប់លាប់នឹងធ្វើជាប្រធានក្រុម។
ទោះជាយ៉ាងនេះក្តី អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងថា លោកមិនបានដឹងរឿងនេះទេ។ លោកបដិសេធថា គណបក្សប្រជាជនកម្ពុជា គ្មានគោលការណ៍ឲ្យថ្នាក់ក្រោមដើរប្រមូលស្នាមមេដៃដើម្បីគាំទ្រគណបក្សឡើយ។ ប៉ុន្តែលោកក៏មិនបញ្ជាក់ថា គណបក្សនឹងស្រាវជ្រាវរកការពិតលើករណីនេះទេ៖ «គណបក្សប្រជាជនកម្ពុជា មិនដែលមានគោលការណ៍អ៊ីចឹងទេ រឿងគេហៅទៅស្បថ ហៅគេទៅសច្ចា ហៅគេទៅផ្ដិតមេដៃគាំទ្រ សមាជិកមកចូលជាមួយគណបក្សលុះត្រាតែគេភ្ញាក់រលឹកមកចូលរួមជាមួយគណបក្សប្រជាជនកម្ពុជា»។
នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) លោក គល់ បញ្ញា មានប្រសាសន៍មេភូមិជាបុគ្គល អព្យាក្រឹត្យ និងអ្នកផ្ដល់សេវាសាធារណៈដល់ពលរដ្ឋ ហើយករណីមេភូមិជាអ្នកដើរប្រមូលស្នាមមេដៃដូចនេះជាការដាក់បន្ទុកដល់ពលរដ្ឋដែលមិនបានគាំទ្រគណបក្សកាន់អំណាច៕
