ដោយ សុ ជីវី RFA 2016-05-21
ប្រធានស្ដីទីគណបក្សសង្គ្រោះជាតិ លោក កឹម សុខា រួមនឹងថ្នាក់ដឹកនាំគណបក្សនេះ នឹងជួបជាមួយគណៈប្រតិភូនៃមូលនិធិ ខូហ្វី អាណាន់ (Kofi Annan Foundation) នៅថ្ងៃទី២៣ ខែឧសភា នៅម៉ោង ៤រសៀល នាទីស្នាក់ការបក្សនេះ។
សេចក្ដីប្រកាសព័ត៌មានរបស់គណបក្សសង្គ្រោះជាតិ នៅថ្ងៃទី២១ ខែឧសភា អោយដឹងថា ជំនួបនោះនឹងពិភាក្សាពីការបោះឆ្នោត លទ្ធិប្រជាធិបតេយ្យ និងសន្តិសុខ។
គណៈប្រតិភូនៃមូលនិធិ ខូហ្វី អាណាន់ ដឹកនាំដោយនាយកប្រតិបត្តិនៃអង្គការនេះ លោក អាឡាំង ដូស(Alan Doss)។
គណៈប្រតិភូនៃមូលនិធិ ខូហ្វី អាណាន់ របស់អតីតអគ្គលេខាធិការអង្គការសហប្រជាជាតិ (អ.ស.ប) លោក ខូហ្វី អាណាន់ នឹងមកធ្វើទស្សនកិច្ចស្វែងយល់ពីការបោះឆ្នោតនៅកម្ពុជា ចាប់ពីថ្ងៃទី២២ ដល់ថ្ងៃទី២៥ ខែឧសភា។
គណៈប្រតិភូនេះនឹងជួបពិភាក្សាស្វែងយល់ការងារជាមួយភាគីពាក់ព័ន្ធ មួយចំនួនដូចជា គ.ជ.ប អង្គការក្រៅរដ្ឋាភិបាលជាតិ និងអន្តរជាតិ គណបក្សនយោបាយ បណ្ដាស្ថាប័នទូត និងរដ្ឋាភិបាល។
មូលនិធិខូហ្វី អាណាន់ ត្រូវបានបង្កើតឡើងក្នុងបេសកកម្មប្រមូលផ្ដុំនូវឆន្ទៈនយោបាយ ដើម្បីលុបបំបាត់ការគំរាមកំហែងដល់សន្តិភាព លើកកម្ពស់ការអភិវឌ្ឍ និងការគោរពសិទ្ធិមនុស្ស ព្រមទាំងដោះស្រាយនូវកង្វះខាតក្នុងការដឹកនាំជាដើម៕