នៀម ឆេងភ្នំពេញ ប៉ុស្តិ៍ Mon, 23 May 2016
ភ្នំពេញៈ អ្នកវិភាគបានសម្តែងការព្រួយបារម្ភ អំពីការវិវត្ត នៃស្ថានភាពសិទ្ធិមនុស្សនៅកម្ពុជា បន្ទាប់ពីមន្ត្រីរដ្ឋាភិបាល បានព្រមានធ្វើការបង្ក្រាបការបញ្ចេញមតិសូម្បីតែយុទ្ធនាការនោះ ធ្វើឡើងតាមអនឡាញ ក៏ដោយ ជាការបង្ក្រាប ដែលសំដៅទៅលើក្រុមអង្គការសង្គមស៊ីវិល និងសកម្មជនដីធ្លី ដែលស្លៀកពាក់ខ្មៅនៅរៀងរាល់ថ្ងៃចន្ទ ហើយថតបង្ហោះតាមហ្វេសប៊ុក ដែលជាការបង្ហាញពីការខកចិត្ត ចំពោះការចាប់ឃុំខ្លួនមន្ត្រីសិទ្ធិមនុស្ស និងមន្ត្រី គជប ៥ រូប ខណៈដែលសកម្មជនដីធ្លីនៅតែប្តេជ្ញាបន្តស្លៀកពាក់ខ្មៅ ហើយគណបក្សមួយ បានប្រកាសហែរញត្តិទៅថ្វាយព្រះមហាក្សត្រទូលសុំឲ្យព្រះអង្គជួយព្រះរាជអន្តរាគមន៍ឲ្យមានការដោះលែងមន្ត្រីសិទ្ធិមនុស្ស។
ប្រធានវេទិកាអនាគត និងជាអ្នកវិភាគនយោបាយ លោក អ៊ូ វីរៈ ដែលត្រូវបានគណបក្សប្រជាជនប្តឹងពីបទបរិហារកេរ្តិ៍ បានសម្តែងការព្រួយបារម្ភចំពោះការវិវត្តនៃស្ថានភាពសិទ្ធិមនុស្សក្នុងប្រទេសកម្ពុជានាពេលបច្ចុប្បន្ន ជាពិសេសសេរីភាពក្នុងការបញ្ចេញមតិ។
លោកថ្លែងថា លោកមិនយល់ ថាតើរដ្ឋាភិបាលនឹងប្រើច្បាប់មួយណា ដើម្បីចាប់អ្នកដែលគ្រាន់តែស្លៀកពាក់ខ្មៅ ហើយបង្ហោះតាមអ៊ីនធឺណិតនោះ។
លោកថ្លែងថា៖ «ឧទាហរណ៍បើមនុស្សគ្រប់គ្នាដូរប្រូហ្វាលមកដាក់រូបស្លៀកពាក់ខ្មៅគ្រប់គ្នា តើរដ្ឋាភិបាលគាត់ធ្វើយ៉ាងម៉េច? អ្នកប្រើប្រាស់ហ្វេសប៊ុក ត្រូវសុំច្បាប់ដូរប្រូហ្វាលដែរឬយ៉ាងម៉េច? ចំពោះការជួបជុំតាមផ្ទះ ក៏មិនមានអ្វីដែលត្រូវសុំច្បាប់ដែរ បើសិនជាការជួបជុំនោះ មិនធ្វើឲ្យប៉ះពាល់ដល់អ្នកដទៃ»។
សកម្មជនដីធ្លីនៅតំបន់បឹងកក់ អ្នកស្រី បូវ សោភា បានឲ្យដឹងថា នៅថ្ងៃចន្ទនេះ សហគមន៍រងគ្រោះបញ្ហាដីធ្លីតំបន់បឹងកក់នឹងមានការជួបជុំគ្នា នៅផ្ទះសកម្មជនមួយ ក្នុងសហគមន៍ ហើយនឹងស្លៀកពាក់ខ្មៅ ដើម្បីបួងសួងសុំឲ្យរដ្ឋាភិបាលគិតពិចារណាឡើងវិញ អំពីករណីចាប់មន្ត្រីសិទ្ធិមនុស្សនិងមន្ត្រី គ.ជ.ប. ដាក់គុក។
អ្នកស្រីថ្លែងថា៖ «យើងនៅតែបន្តស្លៀកពាក់ខ្មៅនៅរៀងរាល់ថ្ងៃចន្ទរហូតដល់សកម្មជនការពារសិទ្ធិមនុស្ស ត្រូវបានដោះលែង»។
ព្រះតេជព្រះគុណ ប៊ុត ប៊ុនតិញ ប្រធានបណ្ដាញព្រះសង្ឃឯករាជ្យ ដើម្បីយុត្តិធម៌សង្គម មានសង្ឃដីកាថា ដើម្បីចៀសវាងការបង្រ្កាបរបស់រដ្ឋាភិបាល យុទ្ធនាការស្លៀកពាក់ខ្មៅ នឹងធ្វើឡើងតាមអនឡាញ ដោយបន្តស្លៀកពាក់ពណ៌ខ្មៅដើម្បីបង្ហាញពីស្ថានភាពសិទ្ធិមនុស្សជាក់ស្តែង។
អ្នកនាំពាក្យក្រសួងមហាផ្ទៃ លោក ខៀវ សុភ័គ មិនអាចទាក់ទងសុំការបំភ្លឺបានទេ កាលពីម្សិលមិញ ដោយទូរស័ព្ទរបស់លោកពុំមានអ្នកទទួល។ ប៉ុន្តែ កាលពីចុងសប្តាហ៍មុន លោកបានប្រាប់សារព័ត៌មាន ឌឹ ខេមបូឌា ដេលី ថា អ្នកដែលមានបំណងធ្វើយុទ្ធនាការ «ថ្ងៃចន្ទពណ៌ខ្មៅ» សូម្បីតាមអនឡាញ (តាមប្រព័ន្ធអ៊ីនធឺណិត) ត្រូវមានការអនុញ្ញាតជាផ្លូវការ ពីអាជ្ញាធរជាមុនសិន។
លោកបញ្ជាក់ថា ការឃោសនាទាំងឡាយណា ដែលបង្កគ្រោះថ្នាក់ដល់សន្តិសុខសង្គម គឺជារឿងមិនល្អនោះឡើយ។
លោក ឃួង ស្រេង អ្នកនាំពាក្យសាលារាជធានីភ្នំពេញ បានថ្លែងពីម្សិលមិញថា ការធ្វើយុទ្ធនាការកន្លងមក មិនមានការសុំច្បាប់អនុញ្ញាតត្រឹមត្រូវពីសាលារាជធានីទេ ហើយថា សាលារាជធានី ក៏នឹងចាត់វិធានការផងដែរ ចំពោះអ្នកប្រព្រឹត្តខុស។ «យើងនឹងចាត់វិធានការតាមច្បាប់ឲ្យតែមានអ្នកប្រព្រឹត្តខុសច្បាប់។ ចំពោះយុទ្ធនាការតាមហ្វេសប៊ុក វាជាភារកិច្ចរបស់ក្រសួងព័ត៌មាន និងក្រសួងប្រៃសណីយ៍ និងទូរគមនាគមន៍ ប៉ុន្តែយើងក៏អាចចាត់វិធានការដែរបើសិនជាសកម្មភាពរបស់ពួកគាត់ខុសច្បាប់»។
មន្ត្រីអង្គការសិទ្ធិមនុស្សអាដហុក ៤ រូប និងមន្ត្រី គជប ១ រូប ត្រូវបានចាប់ឃុំខ្លួនកាលពីថ្ងៃចន្ទទី ២ ខែឧសភា ក្រោមការចោទប្រកាន់ពីបទសូកប៉ាន់សាក្សី និងរួមគំនិតសូកប៉ាន់សាក្សី ដោយផ្អែកទៅលើការចោទប្រកាន់ដ៏ចម្រូងចម្រាសរបស់នាង ស្រីមុំ ដែលត្រូវបានគេអះអាងថា ជាស្រីកំណាន់របស់លោកកឹម សុខា ប្រធានស្តីទីគណបក្សសង្គ្រោះជាតិ។
ស្របពេលជាមួយគ្នានេះដែរ គណបក្សយុវជនកម្ពុជា ដែលទើបតែបង្កើតថ្មី ក៏បានប្រកាសហែញត្តិ ទៅថ្វាយព្រះមហាក្សត្រព្រះបាទនរោត្តម សីហមុនី ដើម្បីស្នើឲ្យព្រះអង្គជួយអន្តរាគមន៍ឲ្យមានការដោះលែងមន្ត្រីសិទ្ធិមនុស្ស ៤ នាក់ និងមន្ត្រី គ.ជ.ប.មា្នក់។
លោក ពេជ្រ ស្រស់ ប្រធានគណបក្សបានឲ្យដឹងថា លោកនឹងដាក់ពាក្យជូនដំណឹងទៅសាលារាជធានីនៅថ្ងៃចន្ទនេះ ដើម្បីហែញត្តិនៅថ្ងៃទី ៣០ ខែឧសភា ដោយមានការជួបជុំគ្នានៃសមាជិកគណបក្សចំនួន ៥០ នាក់ នៅក្បែររូបសំណាកព្រះបរមរតនកោដ្ឋ ព្រះបាទសម្ដេច ព្រះនរោត្តម សីហនុ ក្បែរវិមានឯករាជ្យ រួចហែដោយថ្មើរជើងទៅកាន់ព្រះបរមរាជវាំង។ «យើងធ្វើញត្តិក្របខ័ណ្ឌគណបក្សនយោបាយ ដោយយើងមានសកម្មជនគាំទ្រគណបក្ស ៦ ពាន់នាក់រួចទៅហើយ។ អ៊ីចឹងវាមានន័យដូចយើងមានស្នាមមេដៃ ៦ ពាន់នាក់»។
លោក ពេជ្រ ស្រស់ ថ្លែងថា ការដែលគណបក្សលោកហែញត្តិសុំព្រះរាជតម្រិះ ពីព្រះមហាក្សត្រនេះ ក៏ព្រោះតែព្រះអង្គគឺជា ប្រធានឧត្តមក្រុមប្រឹក្សា នៃអង្គចៅក្រម ដែលធានាដល់ការឯករាជភាពរបស់ស្ថាប័នតុលាការ និងយុត្តិធម៌សម្រាប់ប្រជារាស្ត្រទូទៅ។ «ក្នុងករណីចាប់ឃុំខ្លួនមន្ត្រីអាដហុក ៤ រូប និងមន្ត្រី គ.ជ.ប. លោកនីចរិយា យើងឃើញការអនុវត្តច្បាប់ គឺគំហុកតែម្តង មានន័យថា អត់មានបានធ្វើឲ្យបានចេញជាភ័ស្ដុតាងអីត្រឹមត្រូវទេ គ្រាន់តែកញ្ញាម្នាក់ គាត់សរសេរចោទប្រកាន់ ចាប់ពួកគាត់ដាក់ពន្ធនាគារតែម្តង។ អាហ្នឹងគឺការអនុវត្តច្បាប់ទាំងតក់ក្រហល់ វាមិនប្រក្រតីមួយបាត់ទៅហើយ»។
លោក ឃួង ស្រេង ថ្លែងថា លោកមិនអាចសម្រេចថា នឹងអនុញ្ញាតឲ្យមានការហែញត្តិនោះឬយ៉ាងណាទេ រហូតទាល់តែលោកបានមើលលិខិតជូនដំណឹងនោះសិន។
លោកថ្លែងថា៖ «ខ្ញុំចាំមើលចរិតនៃលិខិតស្នើសុំនោះសិន។ បន្ទាប់មកយើងនឹងពិភាក្សាជាមួយឯកឧត្តម អភិបាល និងក្រសួងមហាផ្ទៃ និងអ្នកស្នើសុំផ្ទាល់»៕