ដោយ ម៉ែន សុធីរ RFA 2016-05-29
អ្នកកាសែតពីរនាក់ មិនសុខចិត្តចំពោះសាលាដំបូងខេត្តក្រចេះ សម្រេចដោះលែងជនសង្ស័យបង្ករបួសស្នាមជាកូនប្រុសបង្កើតរបស់មេបញ្ជាការរងអាវុធហត្ថស្រុកសំបូរ ឲ្យនៅក្រៅឃុំ កាលពីថ្ងៃទី២៣ ឧសភា ដែលវាយពួកគេរបួសធ្ងន់។ ពួកគេចាត់ទុកការដោះលែងអ្នកប្រើអំពើហិង្សាលើពួកគេ ឲ្យនៅក្រៅឃុំនេះ ថាជារឿងអយុត្តិធម៌។
អ្នកកាសែតអរិយធម៌ខ្មែរនៅខេត្តក្រចេះ ឲ្យដឹងនៅថ្ងៃទី២៩ ឧសភា ថា ការដោះលែងជនបង្ករបួសស្នាមលើពួកគេរបស់សាលាដំបូងខេត្តក្រចេះ ជារឿងអយុត្តិធម៌។ លោកអំពាវនាវរកយុត្តិធម៌ និងសុំឲ្យបញ្ចប់វប្បធម៌និទ្ទណ្ឌភាព ឬភាពគ្មានទោសពៃរ៍។
អ្នកកាសែតអរិយធម៌ខ្មែរ លោក គិន ប៊ុនសួន សម្ដែងការឈឺចាប់ បន្ទាប់ពីជនល្មើសដែលវាយលោក និងវាយអ្នកកាសែតបញ្ញវន្តខ្មែរ លោក នួន រាក់ ឲ្យរបួសធ្ងន់ មិនត្រូវបានតុលាការផ្ដន្ទាទោសតាមច្បាប់ឡើយ បើទោះបីពួកគេមានសាក្សីជាច្រើនដែលបានឃើញហេតុការណ៍នេះក្តី។ លោកអះអាងថា លោក និងលោក នួន រាក់ នៅតែបន្តទាមទាររកយុត្តិធម៌ករណីនេះ ទោះបីជាសាលាដំបូងខេត្តនេះ មិនផ្តល់យុត្តិធម៌ជូនពួកគេក្តី៖ «គេយោងតាមចម្លើយរបស់ជនបង្ក គេដោះលែងនៅក្រៅឃុំ។ ប៉ុន្តែអ្នកកាសែតគេមានសាក្សីជាង ១០នាក់នៅជុំវិញ គេធ្វើសាក្សីឲ្យអ្នកសារព័ត៌មាន។ ជនបង្កមកវាយគេមែន។ សូម្បីអធិការស្រុកសំបូរ គាត់និយាយថា រឿងហ្នឹងមិនសម ព្រោះគាត់អ្នកស៊ើបអង្កេតរឿងហ្នឹងផ្ទាល់ រឿងអីត្រូវដោះលែង»។
លោក គិត ប៊ុនសួន បន្ថែមទៀតថា កូនប្រុសបង្កើតរបស់មេបញ្ជាការរងអាវុធហត្ថស្រុកសំបូរ លោក អ៊ុំ មន្នីនិត ដែលវាយអ្នកកាសែតនោះ ដោយសារតែខឹងអ្នកកាសែតចុះផ្សាយពីសកម្មភាពពួកគេដេញរថយន្តទារប្រាក់ពីរថយន្តដឹកឈើ និងជន្លង់ម្រេចតាមផ្លូវ។ លោកកត់សម្គាល់ថា កាលពីថ្ងៃទី១២ ឧសភា មានករណីគ្រោះថ្នាក់ចរាចរណ៍បណ្ដាលឲ្យមនុស្សម្នាក់ស្លាប់ ដោយរថយន្តបីគ្រឿងបុកគ្នានៅផ្លូវជាលេខ៧ ស្រុកចិត្របុរី ក៏ដោយសារលោក អ៊ុំ មន្នីនិត និងបក្ខពួក បើករថយន្តដេញជំរិតទារប្រាក់ពីពលរដ្ឋដឹកក្ដារឈើ គ្រឿងផ្ទះតាមផ្លូវ៖ «ទៅយកលុយដឹកជន្លង់ម្រេច ដេញឡានឈើគ្រប់ប្រភេទ។ ខ្លួនឯងជាកូនមន្ត្រីប៉េអិមទេ កងរាជអាវុធហត្ថស្រុកសំបូរ ទេ ប៉ុន្តែយកឡានរបស់ឪពុកពាក់អាវរបស់ឪពុកដេញយកលុយគេ»។
តំណាងអយ្យការខេត្តក្រចេះ និងជាព្រះរាជអាជ្ញារង លោក ធុច បច្ចសន្តិភាព មិនធ្វើអធិប្បាយករណីនេះទេ នៅថ្ងៃទី២៩ ឧសភា ដោយលោកប្រាប់ថាកំពុងជាប់រវល់។
សាក្សីដែលឃើញសកម្មភាពលោក អ៊ុំ មន្នីនិត វាយអ្នកកាសែតកាលពីយប់ថ្ងៃទី២១ ឧសភា គឺលោក គៀង ភារុន សម្ដែងការហួសចិត្ត បន្ទាប់ពីលោកឮព័ត៌មានថា តុលាការដោះលែងបុរសវាយអ្នកកាសែតឲ្យរួចខ្លួន ខណៈលោកបានឃើញករណីនេះជាក់ស្តែង។ លោកបញ្ជាក់ថា លោក អ៊ុំ មន្នីនិត បានកាន់កាំបិតបុ័ងតោនៅដៃ និងបានវាយលោក នួន រាក់ ពេញទំហឹងរហូតលុតជង្គង់សំពះអង្វរ ក៏បុរសនោះនៅតែបន្តវាយបណ្ដាលឲ្យរងរបួសធ្ងន់៖ «អយុត្តិធម៌ពេកហើយលែងចឹង មានពាក្យបណ្ដឹងមានអីចូលអធិការ។ ដល់លែងចឹង វាអត់ត្រឹមត្រូវដែរ។ វាយនឹងកាំបិតឡើងជង្គង់ ទាត់ ដាល់ ហើយវាយអូស អូសទៅវាយមួយកន្លែងទៀត វាយហ្នឹងជាងមួយម៉ោងជិត ២ម៉ោង»។
ប្រធានក្លឹបអ្នកកាសែតកម្ពុជា លោក ប៉ែន បូណា ឲ្យដឹងថា លោកពុំទទួលព័ត៌មាននេះផ្លូវការណាមួយ ស្ដីពីការដោះលែងជនសង្ស័យវាយអ្នកកាសែតនោះនៅឡើយទេ។ តែយ៉ាងណា លោកអំពាវនាវឲ្យតុលាការ និងស្ថាប័នពាក់ព័ន្ធ ពិនិត្យមើលឡើងវិញករណីនេះ ប្រសិនមានការដោះលែងជនសង្ស័យវាយអ្នកកាសែត ដើម្បីស្វែងរកយុត្តិធម៌ឲ្យជនរងគ្រោះមិនថាតែអ្នកកាសែត ឬក៏ពលរដ្ឋនោះទេ៖ «យើងនឹងពិនិត្យមើលថា តើអ្នកកាសែតរងគ្រោះ គាត់បានទទួលយុត្តិធម៌ហើយឬនៅ? បើអត់ទាន់បានយុត្តិធម៌ យើងនឹងតស៊ូមតិ ធ្វើម៉េចផ្តល់ការពារផ្លូវច្បាប់ឲ្យគាត់ទទួលបានយុត្តិធម៌រឿងហិង្សាហ្នឹង»។
កាលពីយប់ថ្ងៃទី២៧ ឧសភា អ្នកកាសែតពីរនាក់មកពីស្ថាប័នកាសែតបញ្ញវន្តខ្មែរ និងកាសែតអរិយធម៌ខ្មែរ ត្រូវបានកូនប្រុសបង្កើតរបស់មេបញ្ជាការរងអាវុធហត្ថស្រុកសំបូរ លោក អ៊ុំ មន្នីនិត វាយឲ្យរបួសធ្ងន់ម្នាក់ឋិតនៅជាប់ផ្លូវជាតិលេខ៧ ក្នុងភូមិស្រែត្រែង ឃុំក្បាលដំរី ស្រុកសំបូរ ខេត្តក្រចេះ។ បន្ទាប់ពីកើតហេតុប្រហែលពីរម៉ោង អធិការស្រុកសំបូរ បានឃាត់ខ្លួនលោក អ៊ុំ មន្នីនិត និងបានបញ្ជូនទៅស្នងការដ្ឋាននគរបាលខេត្តក្រចេះ នៅថ្ងៃទី២២ ឧសភា៕