ដោយ អ៊ុំ រង្សី RFA 2016-05-29
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានណែនាំឲ្យប្រធានគ្រប់អង្គភាពក្រោមឱវាទ ឲ្យពង្រឹងតាមដានបណ្ដឹង សំណូមពរ និងកង្វល់របស់ប្រជាពលរដ្ឋដែលបង្ហោះតាមទំព័រហ្វេសប៊ុក (Facebook) របស់លោកនាយករដ្ឋមន្ត្រី ហ៊ុន សែន ពាក់ព័ន្ធនឹងវិស័យកសិកម្ម។
សេចក្ដីជូនដំណឹងរបស់លោក វេង សាខុន រដ្ឋមន្ត្រីថ្មីនៃក្រសួងកសិកម្ម អះអាងថា ការណែនាំឲ្យប្រធានគ្រប់អង្គភាពនៅពេលនេះ ក្នុងបំណងឲ្យថ្នាក់ដឹកនាំគ្រប់អង្គភាពក្រោមឱវាទ យកចិត្តទុកដាក់ឆ្លើយតប និងដោះស្រាយសំណូមពរប្រជាពលរដ្ឋតាមបណ្ដាញសង្គមហ្វេសប៊ុក។
សេចក្ដីជូនដំណឹងដដែល បានប្រកាសនៅថ្ងៃទី២៥ ខែឧសភា បានបញ្ជាក់បន្តថា កន្លងមក ក្រសួងបានសម្រេចបង្កើតក្រុមការងារផ្សព្វផ្សាយព័ត៌មានតាមបណ្ដាញសង្គមហ្វេសប៊ុក ដែលមានសមាសភាពថ្នាក់ដឹកនាំគ្រប់អង្គភាពក្រោមឱវាទ ដើម្បីផ្សព្វផ្សាយ និងផ្តល់ព័ត៌មានអំពីគោលនយោបាយសំខាន់ៗរបស់ក្រសួង និងបកស្រាយបំភ្លឺជូនសាធារណជនទូទៅ ពាក់ព័ន្ធសភាពការណ៍វិវឌ្ឍន៍វិស័យកសិកម្ម និងការងារជំនាញរបស់អង្គភាព ព្រមទាំងបានបន្ថែមភារកិច្ចឲ្យតាមដាន និងស្រង់ព័ត៌មានបណ្ដាញសង្គមហ្វេសប៊ុករបស់លោកនាយករដ្ឋមន្ត្រី ហ៊ុន សែន ដើម្បីឆ្លើយតប និងដោះស្រាយជូនប្រជាពលរដ្ឋទាន់ពេលវេលា។
រដ្ឋមន្ត្រីក្រសួងកសិកម្ម លោក វេង សាខុន យល់ថា រហូតមកដល់បច្ចុប្បន្ន ក្រសួងសង្កេតឃើញថា អង្គភាពភាគច្រើនពុំបានយកចិត្តទុកដាក់តាមដានបណ្ដាញសង្គមហ្វេសប៊ុករបស់លោកនាយករដ្ឋមន្ត្រី ហ៊ុន សែន និងរបស់ក្រសួងផ្ទាល់ ដើម្បីបកស្រាយបំភ្លឺជូនសាធារណជនឲ្យបានទាន់ពេលវេលានៅឡើយ។ ហេតុនេះ លោកស្នើឲ្យប្រធានអង្គភាពក្រោមឱវាទរបស់ខ្លួន ត្រូវតែពង្រឹងការងារនេះឡើងវិញ។
លោកនាយករដ្ឋមន្ត្រី ហ៊ុន សែន ធ្លាប់បានចេញសេចក្ដីណែនាំមួយកាលពីថ្ងៃទី៨ កុម្ភៈ ទៅឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រីប្រតិភូ រដ្ឋមន្ត្រីគ្រប់ក្រសួង ប្រធានគ្រប់ស្ថាប័ន និងអភិបាលនៃគណៈអភិបាលរាជធានី-ខេត្ត ឲ្យយកចិត្តទុកដាក់ដោះស្រាយលើបញ្ហានានា ដែលសព្វថ្ងៃលោកទទួលបានព័ត៌មានចម្រុះ រួមទាំងពាក្យបណ្ដឹង និងសំណូមពរពីប្រជាពលរដ្ឋទូទាំងប្រទេសឲ្យមានតម្លាភាព និងមានប្រសិទ្ធភាពខ្ពស់។
ជាងនេះ លោកនាយករដ្ឋមន្ត្រី ហ៊ុន សែន ក៏បានចេញសេចក្ដីណែនាំមួយឲ្យមន្ត្រីជាន់ខ្ពស់រដ្ឋាភិបាល ចាត់តាំងឲ្យមានក្រុមតាមដានស្រង់ព័ត៌មានប្រចាំថ្ងៃពីពលរដ្ឋដែលបានប្ដឹង និងសំណូមពរបញ្ហាផ្សេងៗតាមរយៈហ្វេសប៊ុករបស់លោក ដើម្បីយកមកត្រួតពិនិត្យ និងដោះស្រាយ។
ទោះបីជាយ៉ាងណាក៏ដោយ សង្គមស៊ីវិល និងអ្នកជំនាញកសិកម្ម មើលឃើញថា ការណែនាំរបស់លោក ហ៊ុន សែន ឲ្យមន្ត្រីថ្នាក់ក្រោមតាមដានសំណូមពររបស់ពលរដ្ឋលើទំព័រហ្វេសប៊ុកនៅពេលនេះ ធ្វើឡើងគ្រាន់តែដើម្បីចំណេញនយោបាយ។ ពួកគេថា វិធានការនេះមិនអាចដោះស្រាយបញ្ហាជាតិធំៗប្រកបដោយប្រសិទ្ធភាពនោះឡើយ។
ជាងនេះទៀត សង្គមស៊ីវិលដែលធ្វើការពាក់ព័ន្ធនឹងវិស័យកសិកម្ម យល់ថា ការយកព័ត៌មានតែមួយមធ្យោបាយនោះ មិនគ្រប់ និងមិនបានជោគជ័យនោះឡើយ គឺរដ្ឋាភិបាលត្រូវវិភាគ និងសិក្សាស្រាវជ្រាវបន្ថែម និងកំណត់អាទិភាពនៃបញ្ហា ហើយត្រូវឆ្លើយតបជាប្រព័ន្ធ ទើបមានប្រសិទ្ធភាព៕