ដោយ សុ ជីវី RFA 2016-06-03
អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី៣ ខែមិថុនា បន្តសវនាការស្ដាប់សក្ខីកម្មសាក្សីអតីតជាអ្នកធ្វើបញ្ជីអ្នកទោសមួយរូប នៅមន្ទីរសន្តិសុខ ស-២១ ឬគុកទួលស្លែង ក្នុងរបបខ្មែរក្រហម លោក សួស ធី។
អតីតជាអ្នកធ្វើបញ្ជីឈ្មោះអ្នកទោស លោក សួស ធី ជម្រាបអង្គជំនុំជម្រះសាលាដំបូងថា លោកជាអ្នកធ្វើប្រវត្តិរូបសង្ខេបរបស់អ្នកទោស និងអ្នកធ្វើការងារនៅក្នុងក្រុមកងការពារ។ លោកថា អ្នកទោសដែលគេបញ្ជូនទៅដល់គុកនោះចាត់ទុកជាខ្មាំងរួចជាស្រេច ហើយអ្នកទោសម្នាក់ៗមានឯកសារមួយសន្លឹកម្នាក់ដែលមានបិទរូបថត៖ «ចំពោះប្រវត្តិរូបខ្ញុំចាំមិនច្បាស់ មិនដឹងរៀបតាមភូមិភាគ ឬរៀបតាមការចូលប្រចាំថ្ងៃ ប៉ុន្តែបើតាមខ្ញុំយល់ប្រហែលរៀបតាមភូមិភាគ តាមតំបន់។ បញ្ជាក់ថា សុទ្ធតែមកតាមកងពល តាមភូមិភាគទាំងអស់ អត់មានថាមិនបញ្ជាក់ទេ...។ តែចូលមកដល់ ស-២១ គេចាត់ទុកថាជាខ្មាំងទាំងអស់ហើយ»។
លោក សួស ធី បានប្រាប់អង្គជំនុំជម្រះកាលពីថ្ងៃទី២ ខែមិថុនា ថ្លែងថា អ្នកទោស ដែលត្រូវបញ្ជូនទៅដល់មន្ទីរសន្តិសុខ ស-២១ គឺជាអ្នកទោសដែលត្រូវគេសម្លាប់។
លោក សួស ធី ជាអ្នកធ្វើបញ្ជីអ្នកទោសនៅគុកទួលស្លែង ពេញមួយរបបខ្មែរក្រហម ពីឆ្នាំ១៩៧៥ ដល់ឆ្នាំ១៩៧៩។ បញ្ជីឈ្មោះអ្នកទោសនៅគុកទួលស្លែង ដែលត្រូវបានសាលាដំបូងនៃសាលាក្ដីខ្មែរក្រហម យកមកធ្វើជាភស្តុតាងកាត់ទោស លោក ឌុច ឱ្យជាប់ពន្ធនាគារអស់មួយជីវិត នៅក្នុងសំណុំរឿងលេខ ០០១ មានអ្នកទោសចំនួនជាង ១ម៉ឺន ២ពាន់នាក់ (១២.២៧២នាក់) ត្រូវបានគេយកទៅសម្លាប់។
អង្គជំនុំជម្រះសាលាដំបូងគ្រោងធ្វើសវនាការសួរដេញដោលសាក្សី សួស ធី រយៈពេល ៣ថ្ងៃ ទាក់ទងនឹងការងាររបស់លោកនៅគុកទួលស្លែងដោយចាប់ផ្ដើមពីថ្ងៃទី២ ខែមិថុនា៕