Image may be NSFW.
Clik here to view.
ដោយ រដ្ឋា វិសាល RFA 2016-06-04
ប្រជាពលរដ្ឋជនជាតិដើមភាគតិចព្នងជាង ១០០នាក់ រួមទាំងមន្ត្រីអាជ្ញាធរខេត្តមណ្ឌលគិរី និងមន្ត្រីសង្គមស៊ីវិល បានជួបជុំគ្នាដោះស្រាយបញ្ហាដីធ្លីរបស់ពលរដ្ឋ ២១១គ្រួសារ នៅភូមិចក់ចារ តាមការសន្យា។ មន្ត្រីសង្គមស៊ីវិលឃ្លាំមើលបញ្ហានេះមានមន្ទិលថា លទ្ធផលនៃការដោះស្រាយបញ្ហានេះហាក់នៅមិនទាន់ច្បាស់លាស់នៅឡើយ។
ការកំណត់ពេលវេលាចុះចង្អុលទីតាំងដីដែលពលរដ្ឋទាមទារ គឺជាលទ្ធផលបឋមដែលអាជ្ញាធរខេត្តសម្រេចក្នុងពិធីចុះដោះស្រាយការតវ៉ារបស់ពលរដ្ឋជនជាតិដើមភាគតិចព្នង កាលពីថ្ងៃទី២ ខែមិថុនា។ ការចុះដោះស្រាយបញ្ហាដីធ្លីនេះ ធ្វើឡើងតាមការសន្យារបស់អាជ្ញាធរខេត្ត ខណៈប្រជាពលរដ្ឋជាង ៦០នាក់នាំគ្នាយកញត្តិដាក់ជូនអភិបាលខេត្តកាលពីចុងខែឧសភា។
ប្រជាពលរដ្ឋភូមិចក់ចារ គឺលោក យិន សឹង បញ្ជាក់ថា ដំណោះស្រាយរបស់អាជ្ញាធរពេលនេះ គឺប្រជាពលរដ្ឋអ្នកតវ៉ាទទួលយកបាន ក៏ប៉ុន្តែអ្នកភូមិនៅបារម្ភថា តើទីតាំងដីដែលអ្នកភូមិនឹងចង្អុលបង្ហាញថា ជាតំបន់ដីចំការវិលជុំប្រជាពលរដ្ឋ នោះអាជ្ញាធរនឹងធ្វើការវាស់វែងឆ្វៀលចេញពីដីសម្បទានប្រគល់មកឲ្យអ្នកភូមិបាន ឬយ៉ាងណា។ លោកថា ប្រជាពលរដ្ឋនឹងមិនធ្វើការតវ៉ាជាមួយអាជ្ញាធរខេត្តតទៅទៀតទេ ប្រសិនដំណោះស្រាយពេលនេះមិនបានលទ្ធផលតាមការទាមទាររបស់អ្នកភូមិ៖ «បើគាត់គោរពតាមសម្ដីដែលបានពិភាក្សានៅថ្ងៃព្រហស្បតិ៍ ទី២ ហ្នឹង ពួកខ្ញុំក៏បានយល់ព្រមឯកភាពសមរម្យហើយដែលគាត់និយាយគោរពពាក្យសម្ដីពួកគាត់។ បើគាត់មិនគោរពពាក្យសម្ដីដែលនិយាយក្នុងអង្គប្រជុំទេ ពួកខ្ញុំលែងឡើងទៅខេត្តហើយ ឡើងនៅភ្នំពេញម្ដង»។
ប្រជាពលរដ្ឋភូមិចក់ចារ តវ៉ាតាំងពីឆ្នាំ២០១២ ទាមទារដី ៥០០ហិកតារ បន្ទាប់ពីក្រុមហ៊ុន ប៊ិញ ភឿក១ ទទួលបានដីសម្បទានជាង ៥ពាន់ហិកតារ នៅតំបន់ឃុំស្រែឈូក។ បន្ទាប់ពីទទទួលបានសិទ្ធិវិនិយោគដីសម្បទាននេះ ក្រុមហ៊ុនឈូសឆាយដីបង្កបង្កើនផលប៉ះពាល់ដីចំការវិលជុំអ្នកភូមិអភិរក្សសម្រាប់ធ្វើកសិកម្ម។ នៅឆ្នាំ២០១៤ អាជ្ញាធរដោះស្រាយវិវាទដីធ្លីខេត្តមណ្ឌលគិរី បានសម្របសម្រួលកាត់ចេញដី ១២៥ហិកតារដែលក្រុមហ៊ុនបានឈូសឆាយរួចហើយប្រគល់ឲ្យក្រុមហ៊ុនចំណែកដី ៣៧៥ហិកតារ ដែលក្រុមហ៊ុនមិនទាន់ឈូសឆាយប្រគល់មកឲ្យប្រជាពលរដ្ឋ ក៏ប៉ុន្តែរហូតបច្ចុប្បន្ន ប្រជាពលរដ្ឋអះអាងថា ដី ៣៧៥ហិកតារជាចំណែកពលរដ្ឋក្រុមហ៊ុនបានឈូសឆាយដាំកៅស៊ូអស់មិនព្រមប្រគល់ឲ្យអ្នកភូមិនោះទេ។
ចំណែកប្រជាពលរដ្ឋភូមិចក់ចារ ម្នាក់ទៀត គឺអ្នកស្រី ស្រួច ថែវ កត់សំគាល់ថា ក្នុងកិច្ចប្រជុំនាថ្ងៃទី២ ខែមិថុនា អាជ្ញាធរខេត្តអះអាងថា នឹងប្រគល់ដី ៣៧៥ហិកតារមកពលរដ្ឋ ក៏ប៉ុន្តែអាជ្ញាធរខេត្តទុកលទ្ធភាពឲ្យអាជ្ញាធរឃុំ និងស្រុកកំណត់ពេលវេលាជាក់លាក់ដឹកនាំប្រជាពលរដ្ឋចុះចង្អុលទីតាំងដីដែលពលរដ្ឋទាមទារ។ អ្នកស្រីបន្តថា ទីតាំងដីដែលអ្នកភូមិទាមទារគឺជាដីចំការចាស់របស់ជនជាតិដើមភាគតិចដែលអាជ្ញាធរភូមិឃុំចេញលិខិតទទួលស្គាល់ជូនអ្នកភូមិ៖ «តែដល់ថ្ងៃពួកគាត់ឲ្យចង្អុលទីតាំងពួកខ្ញុំនឹងនាំគ្នាច្រើនដើម្បីប្រកែកដីជម្លោះហ្នឹង។ បើឲ្យកន្លែងក្រៅជម្លោះពួកខ្ញុំមិនយកទេ»។
ប្រធានសហគមន៍ចក់ចារ ប្រធានភូមិ និងមេឃុំស្រែឈូក កាលពីខែមេសា ឆ្នាំ២០១៥ បានចុះហត្ថលេខាលើលិខិតបញ្ជាក់ជូនអាជ្ញាធរពាក់ព័ន្ធថា ដីដែលប្រជាពលរដ្ឋភូមិចក់ចារ មានជម្លោះជាមួយក្រុមហ៊ុន ប៊ិញ ភឿក១ គឺមានខ្ទមអ្នកតានៅកណ្ដាលដីដែលប្រជាពលរដ្ឋគោរពបូជាយូរយារមកហើយ។ ចំណែកដីនៅជុំវិញខ្ទមអ្នកតាមានភូមិស្រែត្រាវ ស្រែអិន ក្បាលអូរត្រយ៉ង់ និងត្រពាំងក្លើស ពិតជាដីចំការវិលជុំ និងដីព្រៃផលិតជ័រទឹកជនជាតិដើមភាគតិចព្នងភូមិចក់ចារ ពិតមែន។
មេឃុំស្រែឈូក លោក យ៉ង ប៊ុន ទទួលស្គាល់ថា លិខិតដែលលោកបានបញ្ជាក់ជូនប្រជាពលរដ្ឋពិតជាលិខិតសំអាងរបស់អាជ្ញាធរឃុំចេញជូនអ្នកភូមិដែលកាន់កាប់ដីមុនពេលក្រុមហ៊ុនទទួលបានដីសម្បទាននៅតំបន់នោះ។ លោកថា ដី ៣៧៥ហិកតារមិនទាន់បែងចែកទៅឲ្យអ្នកណានៅឡើយ ហេតុនេះអាជ្ញាធរនឹងធ្វើការផ្ទៀងផ្ទាត់ដីនោះឡើងវិញ៖ «គណៈខេត្តគណៈស្រុកឆ្លើយឆ្លងគ្នាថាដី ៣៧៥ហិកតារមិនទាន់ច្បាស់មែន អ៊ីចឹងគេនឹងរៀបចំក្រុមការងារចុចម្ដងទៀត។ ដី ៣៧៥ហិកតារហ្នឹងមិនទាន់ចែកអ្នកណាទេឃើញដាក់ក្នុងផែនទីហ្នឹង»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តមណ្ឌលគិរី លោក សុក រដ្ឋា គាំទ្រការស្វែងរកដំណោះស្រាយរបស់អាជ្ញាធរខេត្ត ក៏ប៉ុន្តែលោកនៅបារម្ភថា ដីដែលប្រជាពលរដ្ឋកំពុងទាមទារគឺក្រុមហ៊ុនបានដាំកៅស៊ូរួចហើយ។ ករណីនេះលោកបារម្ភខ្លាចអាជ្ញាធរមិនមានលទ្ធភាពតម្រូវឲ្យក្រុមហ៊ុនកាត់ដីសងប្រជាពលរដ្ឋបាននោះទេ។ លើសពីនេះទៀត ក្រុមហ៊ុនក៏មិនទាន់បង្ហាញសញ្ញាណថា នឹងកាត់ដីប្រគល់ឲ្យប្រជាពលរដ្ឋ ឬយ៉ាងណា៖ «ព្រោះការជជែកហ្នឹងមិនទាន់មានភាពច្បាស់លាស់នៅឡើយទេ។ អាជ្ញាធរគ្រប់ជាន់ថ្នាក់គាត់គួរតែដោះស្រាយឲ្យបានឆាប់ចប់ហើយមានលក្ខណៈត្រឹមត្រូវ និងតម្លាភាព ព្រោះប្រជាជនរងគ្រោះច្រើនណាស់ អ្នកមិនទាមទារតវ៉ាទៅជាបានអ្នកតវ៉ារហូតពេលនេះនៅតែអត់ដដែល»។
វិទ្យុអាស៊ីសេរី មិនអាចទាក់ទងតំណាងក្រុមហ៊ុន ប៊ិញ ភឿក១ សុំអធិប្បាយបញ្ហានេះបានទេ នៅថ្ងៃទី៣ ខែមិថុនា។ ចំណែកអភិបាលស្រុកកែវសីមា លោក ស៊ិន វណ្ណវុឌ្ឍ និងអភិបាលរងខេត្តលោក តេង សម្បត្តិ ដែលចូលរួមដោះស្រាយបញ្ហាជាមួយអ្នកភូមិបដិសេធមិនអធិប្បាយបញ្ហានេះឡើយ។
មកទល់នឹងរសៀលថ្ងៃទី៣ ខែមិថុនា ប្រជាពលរដ្ឋភូមិចក់ចារ ឲ្យដឹងថា តំបន់ដីដែលអ្នកភូមិកំពុងទាមទារគឺក្រុមហ៊ុននៅតែភ្ជួរដីដាំកៅស៊ូបន្តទៀត។
ទោះជាយ៉ាងណាក៏ដោយ ប្រជាពលរដ្ឋភូមិចក់ចារ បញ្ជាក់ថា ពួកគាត់រង់ចាំចំណាត់ការរបស់អាជ្ញាធរស្រុកតាមលទ្ធផលកិច្ចប្រជុំថ្ងៃទី៣ ខែមិថុនា ប្រសិនបើចំណាត់ការនៅអូសបន្លាយយូរ អ្នកភូមិនឹងនាំគ្នាបន្តតវ៉ានៅថ្នាក់ជាតិជាថ្មីទៀត៕
Clik here to view.
ដោយ រដ្ឋា វិសាល RFA 2016-06-04
ប្រជាពលរដ្ឋជនជាតិដើមភាគតិចព្នងជាង ១០០នាក់ រួមទាំងមន្ត្រីអាជ្ញាធរខេត្តមណ្ឌលគិរី និងមន្ត្រីសង្គមស៊ីវិល បានជួបជុំគ្នាដោះស្រាយបញ្ហាដីធ្លីរបស់ពលរដ្ឋ ២១១គ្រួសារ នៅភូមិចក់ចារ តាមការសន្យា។ មន្ត្រីសង្គមស៊ីវិលឃ្លាំមើលបញ្ហានេះមានមន្ទិលថា លទ្ធផលនៃការដោះស្រាយបញ្ហានេះហាក់នៅមិនទាន់ច្បាស់លាស់នៅឡើយ។
ការកំណត់ពេលវេលាចុះចង្អុលទីតាំងដីដែលពលរដ្ឋទាមទារ គឺជាលទ្ធផលបឋមដែលអាជ្ញាធរខេត្តសម្រេចក្នុងពិធីចុះដោះស្រាយការតវ៉ារបស់ពលរដ្ឋជនជាតិដើមភាគតិចព្នង កាលពីថ្ងៃទី២ ខែមិថុនា។ ការចុះដោះស្រាយបញ្ហាដីធ្លីនេះ ធ្វើឡើងតាមការសន្យារបស់អាជ្ញាធរខេត្ត ខណៈប្រជាពលរដ្ឋជាង ៦០នាក់នាំគ្នាយកញត្តិដាក់ជូនអភិបាលខេត្តកាលពីចុងខែឧសភា។
ប្រជាពលរដ្ឋភូមិចក់ចារ គឺលោក យិន សឹង បញ្ជាក់ថា ដំណោះស្រាយរបស់អាជ្ញាធរពេលនេះ គឺប្រជាពលរដ្ឋអ្នកតវ៉ាទទួលយកបាន ក៏ប៉ុន្តែអ្នកភូមិនៅបារម្ភថា តើទីតាំងដីដែលអ្នកភូមិនឹងចង្អុលបង្ហាញថា ជាតំបន់ដីចំការវិលជុំប្រជាពលរដ្ឋ នោះអាជ្ញាធរនឹងធ្វើការវាស់វែងឆ្វៀលចេញពីដីសម្បទានប្រគល់មកឲ្យអ្នកភូមិបាន ឬយ៉ាងណា។ លោកថា ប្រជាពលរដ្ឋនឹងមិនធ្វើការតវ៉ាជាមួយអាជ្ញាធរខេត្តតទៅទៀតទេ ប្រសិនដំណោះស្រាយពេលនេះមិនបានលទ្ធផលតាមការទាមទាររបស់អ្នកភូមិ៖ «បើគាត់គោរពតាមសម្ដីដែលបានពិភាក្សានៅថ្ងៃព្រហស្បតិ៍ ទី២ ហ្នឹង ពួកខ្ញុំក៏បានយល់ព្រមឯកភាពសមរម្យហើយដែលគាត់និយាយគោរពពាក្យសម្ដីពួកគាត់។ បើគាត់មិនគោរពពាក្យសម្ដីដែលនិយាយក្នុងអង្គប្រជុំទេ ពួកខ្ញុំលែងឡើងទៅខេត្តហើយ ឡើងនៅភ្នំពេញម្ដង»។
ប្រជាពលរដ្ឋភូមិចក់ចារ តវ៉ាតាំងពីឆ្នាំ២០១២ ទាមទារដី ៥០០ហិកតារ បន្ទាប់ពីក្រុមហ៊ុន ប៊ិញ ភឿក១ ទទួលបានដីសម្បទានជាង ៥ពាន់ហិកតារ នៅតំបន់ឃុំស្រែឈូក។ បន្ទាប់ពីទទទួលបានសិទ្ធិវិនិយោគដីសម្បទាននេះ ក្រុមហ៊ុនឈូសឆាយដីបង្កបង្កើនផលប៉ះពាល់ដីចំការវិលជុំអ្នកភូមិអភិរក្សសម្រាប់ធ្វើកសិកម្ម។ នៅឆ្នាំ២០១៤ អាជ្ញាធរដោះស្រាយវិវាទដីធ្លីខេត្តមណ្ឌលគិរី បានសម្របសម្រួលកាត់ចេញដី ១២៥ហិកតារដែលក្រុមហ៊ុនបានឈូសឆាយរួចហើយប្រគល់ឲ្យក្រុមហ៊ុនចំណែកដី ៣៧៥ហិកតារ ដែលក្រុមហ៊ុនមិនទាន់ឈូសឆាយប្រគល់មកឲ្យប្រជាពលរដ្ឋ ក៏ប៉ុន្តែរហូតបច្ចុប្បន្ន ប្រជាពលរដ្ឋអះអាងថា ដី ៣៧៥ហិកតារជាចំណែកពលរដ្ឋក្រុមហ៊ុនបានឈូសឆាយដាំកៅស៊ូអស់មិនព្រមប្រគល់ឲ្យអ្នកភូមិនោះទេ។
ចំណែកប្រជាពលរដ្ឋភូមិចក់ចារ ម្នាក់ទៀត គឺអ្នកស្រី ស្រួច ថែវ កត់សំគាល់ថា ក្នុងកិច្ចប្រជុំនាថ្ងៃទី២ ខែមិថុនា អាជ្ញាធរខេត្តអះអាងថា នឹងប្រគល់ដី ៣៧៥ហិកតារមកពលរដ្ឋ ក៏ប៉ុន្តែអាជ្ញាធរខេត្តទុកលទ្ធភាពឲ្យអាជ្ញាធរឃុំ និងស្រុកកំណត់ពេលវេលាជាក់លាក់ដឹកនាំប្រជាពលរដ្ឋចុះចង្អុលទីតាំងដីដែលពលរដ្ឋទាមទារ។ អ្នកស្រីបន្តថា ទីតាំងដីដែលអ្នកភូមិទាមទារគឺជាដីចំការចាស់របស់ជនជាតិដើមភាគតិចដែលអាជ្ញាធរភូមិឃុំចេញលិខិតទទួលស្គាល់ជូនអ្នកភូមិ៖ «តែដល់ថ្ងៃពួកគាត់ឲ្យចង្អុលទីតាំងពួកខ្ញុំនឹងនាំគ្នាច្រើនដើម្បីប្រកែកដីជម្លោះហ្នឹង។ បើឲ្យកន្លែងក្រៅជម្លោះពួកខ្ញុំមិនយកទេ»។
ប្រធានសហគមន៍ចក់ចារ ប្រធានភូមិ និងមេឃុំស្រែឈូក កាលពីខែមេសា ឆ្នាំ២០១៥ បានចុះហត្ថលេខាលើលិខិតបញ្ជាក់ជូនអាជ្ញាធរពាក់ព័ន្ធថា ដីដែលប្រជាពលរដ្ឋភូមិចក់ចារ មានជម្លោះជាមួយក្រុមហ៊ុន ប៊ិញ ភឿក១ គឺមានខ្ទមអ្នកតានៅកណ្ដាលដីដែលប្រជាពលរដ្ឋគោរពបូជាយូរយារមកហើយ។ ចំណែកដីនៅជុំវិញខ្ទមអ្នកតាមានភូមិស្រែត្រាវ ស្រែអិន ក្បាលអូរត្រយ៉ង់ និងត្រពាំងក្លើស ពិតជាដីចំការវិលជុំ និងដីព្រៃផលិតជ័រទឹកជនជាតិដើមភាគតិចព្នងភូមិចក់ចារ ពិតមែន។
មេឃុំស្រែឈូក លោក យ៉ង ប៊ុន ទទួលស្គាល់ថា លិខិតដែលលោកបានបញ្ជាក់ជូនប្រជាពលរដ្ឋពិតជាលិខិតសំអាងរបស់អាជ្ញាធរឃុំចេញជូនអ្នកភូមិដែលកាន់កាប់ដីមុនពេលក្រុមហ៊ុនទទួលបានដីសម្បទាននៅតំបន់នោះ។ លោកថា ដី ៣៧៥ហិកតារមិនទាន់បែងចែកទៅឲ្យអ្នកណានៅឡើយ ហេតុនេះអាជ្ញាធរនឹងធ្វើការផ្ទៀងផ្ទាត់ដីនោះឡើងវិញ៖ «គណៈខេត្តគណៈស្រុកឆ្លើយឆ្លងគ្នាថាដី ៣៧៥ហិកតារមិនទាន់ច្បាស់មែន អ៊ីចឹងគេនឹងរៀបចំក្រុមការងារចុចម្ដងទៀត។ ដី ៣៧៥ហិកតារហ្នឹងមិនទាន់ចែកអ្នកណាទេឃើញដាក់ក្នុងផែនទីហ្នឹង»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តមណ្ឌលគិរី លោក សុក រដ្ឋា គាំទ្រការស្វែងរកដំណោះស្រាយរបស់អាជ្ញាធរខេត្ត ក៏ប៉ុន្តែលោកនៅបារម្ភថា ដីដែលប្រជាពលរដ្ឋកំពុងទាមទារគឺក្រុមហ៊ុនបានដាំកៅស៊ូរួចហើយ។ ករណីនេះលោកបារម្ភខ្លាចអាជ្ញាធរមិនមានលទ្ធភាពតម្រូវឲ្យក្រុមហ៊ុនកាត់ដីសងប្រជាពលរដ្ឋបាននោះទេ។ លើសពីនេះទៀត ក្រុមហ៊ុនក៏មិនទាន់បង្ហាញសញ្ញាណថា នឹងកាត់ដីប្រគល់ឲ្យប្រជាពលរដ្ឋ ឬយ៉ាងណា៖ «ព្រោះការជជែកហ្នឹងមិនទាន់មានភាពច្បាស់លាស់នៅឡើយទេ។ អាជ្ញាធរគ្រប់ជាន់ថ្នាក់គាត់គួរតែដោះស្រាយឲ្យបានឆាប់ចប់ហើយមានលក្ខណៈត្រឹមត្រូវ និងតម្លាភាព ព្រោះប្រជាជនរងគ្រោះច្រើនណាស់ អ្នកមិនទាមទារតវ៉ាទៅជាបានអ្នកតវ៉ារហូតពេលនេះនៅតែអត់ដដែល»។
វិទ្យុអាស៊ីសេរី មិនអាចទាក់ទងតំណាងក្រុមហ៊ុន ប៊ិញ ភឿក១ សុំអធិប្បាយបញ្ហានេះបានទេ នៅថ្ងៃទី៣ ខែមិថុនា។ ចំណែកអភិបាលស្រុកកែវសីមា លោក ស៊ិន វណ្ណវុឌ្ឍ និងអភិបាលរងខេត្តលោក តេង សម្បត្តិ ដែលចូលរួមដោះស្រាយបញ្ហាជាមួយអ្នកភូមិបដិសេធមិនអធិប្បាយបញ្ហានេះឡើយ។
មកទល់នឹងរសៀលថ្ងៃទី៣ ខែមិថុនា ប្រជាពលរដ្ឋភូមិចក់ចារ ឲ្យដឹងថា តំបន់ដីដែលអ្នកភូមិកំពុងទាមទារគឺក្រុមហ៊ុននៅតែភ្ជួរដីដាំកៅស៊ូបន្តទៀត។
ទោះជាយ៉ាងណាក៏ដោយ ប្រជាពលរដ្ឋភូមិចក់ចារ បញ្ជាក់ថា ពួកគាត់រង់ចាំចំណាត់ការរបស់អាជ្ញាធរស្រុកតាមលទ្ធផលកិច្ចប្រជុំថ្ងៃទី៣ ខែមិថុនា ប្រសិនបើចំណាត់ការនៅអូសបន្លាយយូរ អ្នកភូមិនឹងនាំគ្នាបន្តតវ៉ានៅថ្នាក់ជាតិជាថ្មីទៀត៕