VAYO, 08-06-2016 6:36 pm ចំនួនទស្សនា ដោយ៖ អឿន ភារ៉ា
នៅទីបំផុត គណបក្សសង្គ្រោះជាតិបានសម្រេចចិត្តស្នើសុំជួបចរចាជាមួយគណបក្សប្រជាជនកម្ពុជា ដែលជាគណបក្សកាន់អំណាច។ ការស្នើសុំផ្ទាល់មាត់ទៅកាន់រដ្ឋសភា លោកអេង ឆៃអ៊ាង បញ្ជាក់ថា ក្នុងគោលបំណងចង់ជួបចរចាជាមួយ គណបក្សប្រជាជនកម្ពុជា ដើម្បីពង្រឹងវប្បធម៌សន្ទនា តែមិនបានសុំជួបជាមួយក្រុមតំណាងរាស្ត្រ សម្លេងភាគច្រើននោះទេ។
ជាមួយគ្នានេះ លោកឡេង ប៉េងឡុង អ្នកនាំពាក្យរដ្ឋសភា បានប្រាប់វិទ្យុវាយោនៅរសៀលថ្ងៃទី៨មិថុនានេះដែរថា ខាងរដ្ឋសភាពិតជាបានទទួលសំណើរផ្ទាល់មាត់ពីគណបក្សសង្គ្រោះជាតិ ដើម្បីសុំចរចាជាមួយគណបក្សប្រជាជនកម្ពុជា។ ប៉ុន្តែលោកឡេង ប៉េងឡុង បញ្ជាក់ថា រដ្ឋ សភានៅមិនទាន់បានទទួលលិខិតជាផ្លូវការនៅឡើយទេ ជុំវិញសំណើរពីគណបក្សប្រឆាំងមួយនេះ។
លោកសុខ ឥសាន អ្នកនាំពាក្យគណបក្សប្រជាជនកម្ពុជា អះអាងថា ការចង់ជួបរបស់គណបក្សសង្គ្រោះជាតិនាពេលនេះ គឺមិនមែនជួបជាមួយក្រុមតំណាងរាស្ត្រសំឡេងភាគច្រើន និងក្រុមតំណាងរាស្ត្រសំឡេងភាគតិច ដើម្បីពង្រឹងនូវវប្បធម៌សន្ទនានោះទេ។ លោកសុខ ឥសាន ឱ្យដឹងថាបើតាមការបញ្ជាក់ពីគណបក្សសង្គ្រោះជាតិ គឺចង់ជួបចរចារវាងគណបក្ស និងគណបក្ស ដើម្បីដោះស្រាយវិបត្តិនយោបាយ។ យ៉ាងណា គណបក្សកាន់អំណាចមិនបានចាត់ទុកថា នៅកម្ពុជាមានវិបត្តិនយោបាយនោះទេ។ នេះបើតាមការបញ្ជាក់ពីលោកសុខ ឥសាន៖
ដោយឡែក លោកប៉ុល ហំម ប្រធានគណៈកម្មាធិការ នាយកគណបក្សសង្គ្រោះជាតិ ថ្លែងទៅកាន់សាធារណជននៅថ្ងៃនេះដែរថា គណបក្សសង្គ្រោះជាតិនៅតែបន្តគាំទ្រវប្បធម៌សន្ទនា ដើម្បីរកដំណោះស្រាយ រាល់វិបត្តិដែលកំពុងកើតឡើង។ លោកប៉ុល ហំម បន្តថាគណបក្សប្រឆាំងបានត្រៀមខ្លួនក្នុងការសន្ទនា ប៉ុន្តែគណបក្សកាន់អំណាចតែគេចវេសក្រោមហេតុផលមិនចង់ជួបចរចា។
ជុំវិញការលើកឡើងរបស់លោកប៉ុល ហំម ថាគណក្សកាន់អំណាចគេចវេសមិនចង់ចរចា លោកសុខ ឥសាន លើកឡើងថា មិនមែនគណបក្សគេចវេសនោះទេ ប៉ុន្តែបើការចរចានោះនិយាយពីវប្បធម៌សន្ទនា គឺគណបក្សកាន់អំណាចស្វាគមន៍ជានិច្ច។
ជាការកត់សម្គាល់ តាមរយៈការលើកឡើងរបស់មន្ត្រីគណបក្សទាំងពីរ ទោះបីជាគណបក្សប្រឆាំងបានស្នើទៅរដ្ឋសភាសុំចរចាជាមួយគណបក្សកាន់អំណាចនាពេលនេះក៏ដោយ ប៉ុន្តែបើការចរចានោះ មិនសំដៅដល់ការពង្រឹងវប្បធម៌សន្ទនា នោះគណបក្សប្រជាជនកម្ពុជា ដែលជាបក្សកាន់អំណាចនឹងមិនជួបចរចាឡើយ។ ដូច្នេះ ស្ថានភាពនេះគេអាចមើលឃើញថា ឱកាសជួបគ្នារវាងគណបក្សទាំងពីរហាក់នៅឆ្ងាយ ព្រោះតែគណបក្សទាំងពីរនៅតែប្រកាន់ជំហររៀងៗខ្លួន៕