ដោយ ឡេង ម៉ាលី RFA 2016-08-08
កម្មកររោងចក្រផលិតសម្លៀកបំពាក់ឈ្មោះ ជុងហ្វៃ នីតវៀរ អេហ្វ.ធី.វ៉ាយ (Chung Fai Knitwear FTY., Ltd.) នៅសង្កាត់ចាក់អង្រែក្រោម ខណ្ឌមានជ័យ ជាង ១០០នាក់ នាំគ្នាបន្តលើកបដានៅមុខរោងចក្រ នៅព្រឹកថ្ងៃទី៨ សីហា រកអន្តរាគមន៍ពីនាយករដ្ឋមន្ត្រី ឲ្យជួយបើកប្រាក់ឈ្នួល និងប្រាក់អតីតភាពការងាររបស់ពួកគាត់។ កម្មកររោងចក្រនេះ ត្រូវបានថៅកែរត់ចោលជិតពីរខែមកហើយ។
ក្រុមកម្មករនៅរោងចក្រ ជុងហ្វៃ នីតវៀរ អេហ្វ.ធី.វ៉ាយ ថ្លែងថា បញ្ហាប្រាក់ឈ្នួលរបស់ពួកគាត់ គ្មានសង្ឃឹមថានឹងអាចដោះស្រាយបានឆាប់ៗទេ។
ការត្អូញត្អែរបែបនេះ គឺកម្មករធ្វើបន្ទាប់ពីមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ចុះទៅជួបពួកគាត់នៅឯទីតាំងរោងចក្រ នៅព្រឹកថ្ងៃទី៨ សីហា។ តំណាងកម្មករប្រចាំរោងចក្រ ជុងហ្វៃ នីតវៀរ អេហ្វ.ធី.វ៉ាយ លោកស្រី ជឺន សុជាតិ មានប្រសាសន៍ថា ជំនួបនេះមិនមានលទ្ធផលអ្វីថ្មីទេ៖ «និយាយទៅវាគ្មានអីប្លែកផង គាត់បានតែមកជួយប្រឹក្សាយោបល់ពួកខ្ញុំ ហើយបន្តិចទៀត ពួកខ្ញុំទៅពិភាក្សាគ្នាថា យើងត្រូវធ្វើយ៉ាងម៉េច ឬត្រូវធ្វើតាមគាត់? គាត់មកតែនិយាយតែពាក្យដដែលៗអ៊ីចឹង។ ពួកខ្ញុំអាចទទួលយកបាន ដូចថា ពាក្យប្រឹក្សាពីគាត់ ខ្ញុំអាចទទួលយកទៅ ដូចថា គាត់ឲ្យដាក់ដីកាម្ដងពីរអីអ៊ីចឹង ពួកខ្ញុំអត់ចេះទេ»។
អគ្គលេខាធិការរងគណៈកម្មការដោះស្រាយកូដកម្មបាតុកម្ម នៃក្រសួងការងារ និងបណ្ដុះបណ្ដាលវិជ្ជាជីវៈ លោក វង្ស សុវណ្ណ ថ្លែងនៅពេលជួបកម្មករនៅឯទីតាំងរោងចក្រ ជុងហ្វៃ ថាករណីនេះតុលាការបានចេញដីការក្សាការពារការរឹបអូសអគារ ឃ្លាំង និងអនុវត្តដីកានេះហើយ។ ដូច្នេះ កម្មករត្រូវរង់ចាំសេចក្ដីសម្រេចពីតុលាការបន្តទៀត ព្រោះឥឡូវនេះជាដំណាក់កាលដោះស្រាយតាមផ្លូវច្បាប់ ១០០% ហើយ៖ «ជំហានបន្ទាប់ ឃើញគាត់បានសុំដាក់រឹបអូសអគារ ឃ្លាំងអីនេះ ខាងតុលាការក៏គេបានជួយសម្រួលរឿងហ្នឹងមួយជំហានទៀត។ ប៉ុន្តែអម្បាញ់មិញនេះ បានពិភាក្សាជាមួយគាត់ បងប្អូនយើងគាត់សុំរាប់សម្ភារៈអីបន្ត គឺថាខ្ញុំឲ្យដាក់លិខិតស្នាមអីហ្នឹងទៅសុំតុលាការបន្តទៀត តាមនីតិវិធីបន្តបន្ទាប់»។
បញ្ហានៅរោងចក្រ ជុងហ្វៃ នីតវៀរ អេហ្វ.ធី.វ៉ាយ ក្រុមកម្មករបានប្ដឹងទៅសាលាដំបូងរាជធានីភ្នំពេញជាបន្តបន្ទាប់ ចាប់តាំងពីថ្ងៃទី៧ ខែកក្កដា ហើយនៅថ្ងៃទី២៦ កក្កដា ចៅក្រមសាលាដំបូងរាជធានីភ្នំពេញ ចេញសេចក្ដីសម្រេចរក្សាការពារទ្រព្យសម្បត្តិដែលនៅសេសសល់ទាំងប៉ុន្មានក្នុងរោងចក្រនេះ។
កម្មករត្អូញត្អែរអំពីការខ្វះខាតជីវភាព នៅក្នុងពេលរង់ចាំការដោះស្រាយរយៈពេលជិតពីរខែមកនេះ។
ទាក់ទងនឹងការផ្ដល់យោបល់របស់លោក វង្ស សុវណ្ណ ថាគួរសុំតុលាការលក់ឡាយឡុងទ្រព្យសម្បត្តិសេសសល់ ទូទាត់ប្រាក់ឈ្នួលដើម្បីដោះស្រាយជីវភាពកម្មករសិននោះ តំណាងកម្មករ លោកស្រី ជឺន សុជាតិ ថ្លែងថា លោកស្រីនឹងប្រជុំពិភាក្សាជាមួយកម្មករសិន។លោកស្រីមិនដឹងថា កម្មករនឹងយល់ព្រមទទួលយកប្រាក់នេះសិន ឬចាំយកទាំងប្រាក់អតីតភាពការងាររបស់ពួកគាត់ទាំងអស់នោះនៅឡើយ? ពួកគាត់ភាគច្រើនធ្វើការនៅរោងចក្រនេះជាង ១០ឆ្នាំមកហើយ។ បញ្ហានៅរោងចក្រនេះចាប់ផ្ដើមតាំងពីថ្ងៃទី២៦ ខែមិថុនា មក៕