ដូចរឿងសរសេរសុំផែនទីពីអង្គការសហប្រជាជាតិនិងប្រទេសមហាអំណាចដែរវាគ្រាន់តែជារឿងដែលចៅហ្វាយនិងអាយ៉ងយកមកបង្អើលជានុយបង្វែងដានខ្មែរតែប៉ុណ្ណោះ? កាលណាអំណាចនៅក្នុងដៃអាយ៉ងយើងអត់ដោះស្រាយអីបានទេហេតុត្រូវតាមដានរឿងបោះឆ្នោតវិញ។ ~Reader
Image may be NSFW.
Clik here to view.
ភ្នំពេញ ប៉ុស្តិ៍ ផាក់ ស៊ាងលី Wed, 10 August 2016
រតនគិរីៈ ខណៈដែលបញ្ហាព្រំដែនជាមួយប្រទេសវៀតណាមដែលជារឿងរសើបបានស្ងប់ស្ងាត់មួយរយៈបន្ទាប់ពីមានការចាប់ខ្លួនសមាជិកសភាគណបក្សប្រឆាំងលោក អ៊ុំ សំអាន ពីរឿងផែនទីក្លែងក្លាយនោះស្រាប់តែឥឡូវនេះមន្ត្រីរដ្ឋាភិបាលកម្ពុជាគ្រោងនឹងជួបជាមួយនឹងសមភាគីវៀតណាមនៅរាជធានីភ្នំពេញនៅចុងខែសីហានេះដើម្បីជជែកគ្នាពីរឿងវៀតណាមទើបលួចសង់ប៉ុស្តិ៍នគរបាលថ្មីកាលពីខែមុននៅតំបន់សក្នុងខេត្តរតនគិរី។
អាជ្ញាធរវៀតណាមបានលួចសាងសង់ប៉ុស្តិ៍នគរបាលមួយកាលពីខែកក្កដា កន្លងមក នៅត្រង់ចំណុចព្រំដែនមិនទាន់ច្បាស់លាស់ស្ថិតក្នុងភូមិឡំ ឃុំប៉ក់ញ៉ៃ ស្រុកអូរយ៉ាដាវនោះខណៈដែលស្រះទឹកចំនួន ៩ ដែលខ្លួនបានលួចជីកកាលពីឆ្នាំ ២០១៥ កន្លងមកនោះមិនទាន់ត្រូវបានលុបវិញតាមសំណើរបស់កម្ពុជានៅឡើយនោះ។
លោក វ៉ា គឹមហុង ទេសរដ្ឋមន្រ្តីទទួលបន្ទុកកិច្ចការព្រំដែនបានថ្លែងប្រាប់ភ្នំពេញប៉ុស្តិ៍កាលពីល្ងាចម្សិលមិញថា លោកបានទទួលរបាយការណ៍ពីអាជ្ញាធរខេត្តរតនគិរី និងនគរបាលវរព្រំដែនស្តីពីការសាងសង់ប៉ុស្តិ៍ថ្មថ្មីមួយពីសំណាក់អាជ្ញាធរវៀតណាម នៅក្នុងតំបន់ព្រំដែនមិនទាន់ច្បាស់លាស់រវាងប្រទេសកម្ពុជា និងវៀតណាម។
លោកទេសរដ្ឋមន្រ្តីបានបញ្ជាក់ថា៖ «ខ្ញុំបានទទួលរបាយការណ៍ពីរឿងសង់ប៉ុស្តិ៍ថ្មមួយកាលពីសប្តាហ៍មុនតែមិនទាន់ធ្វើរួចនៅឡើយនោះទេ»។
លោកបន្តថា បន្ទាប់ពី ដឹងពីករណីសាងសង់នោះភ្លាមអាជ្ញាធរកម្ពុជាក៏បានធ្វើការតវ៉ាឲ្យបញ្ឈប់សំណង់នោះភ្លាមៗហើយភាគីវៀតណាមក៏ព្រមឈប់តាមសំណើកម្ពុជាផងដែរ។
លោកបានបន្ថែមថា កម្ពុជាគ្រោងនឹងជួបចរចាជាមួយនឹងសមភាគីវៀតណាមនៅក្នុងរាជធានីភ្នំពេញនៅចុងខែសីហានេះដើម្បីដោះស្រាយបញ្ហាព្រំដែននេះ។
ទាក់ទងទៅនឹងរឿងស្រះ លោកទេសរដ្ឋមន្រ្តីបានឲ្យដឹងថាគណៈកម្មការបច្ចេកទេសចម្រុះកម្ពុជាបានចុះទៅធ្វើការប្រមាណជា ៣ ដងរួចមកហើយ ដើម្បីឲ្យភាគីវៀតណាមលុបស្រះនោះវិញ។ ប៉ុន្តែរហូតមកទល់ពេលនេះស្រះនោះនៅមិនទាន់លុបនៅឡើយនោះទេហើយក៏គ្មានវិធានការអ្វីផ្សេងទៀតក្រៅពីជួបគ្នាចរចាគ្នាឡើយ។ លើសពីនោះកម្ពុជាក៏គ្មានបំណងយកបញ្ហាព្រំដែននេះទៅដោះស្រាយជាលក្ខណៈអន្តរជាតិដែរគឺមានតែការចរចាគ្នាដោយយោងតាមគោលការណ៍ច្បាប់ជាតិ និងអន្តរជាតិហើយនិងផ្អែកលើឯកសារដែលបន្សល់ទុកពីអាណានិគមបារាំង។
លោក វ៉ា គឹមហុង ថ្លែងដូច្នេះថា៖ «បើគេមិនទាន់លុបឥឡូវធ្វើម៉េច?...ឥឡូវមានអីទៀត? ធ្វើព្រំដែនជាមួយនឹងប្រទេសជិតខាងបើគេមិនតាមយើង ឬ បើយើងមិនតាមគេក៏គេមិនដឹងធ្វើអីយើងដែរ។ វាមានតែសុច្ឆន្ទៈក្នុងការដោះស្រាយប៉ុណ្ណោះ។ យើងមិនអាចយកកាំភ្លើងទៅបង្ខំឲ្យគេធ្វើតាមយើងកើតទេ។ មានតែបញ្ឈប់គេសិន»។
លោកបានចាត់ទុកការសាងសង់ និងជីកស្រះដែលគ្មានការអនុញ្ញាតពីកម្ពុជានោះថា៖ «ជាអំពើមួយខុសច្បាប់» ប៉ុន្តែក្រៅពីកម្ពុជាខ្លួនឯងគឺគ្មានប្រទេសណាជួយឈឺក្បាលនោះទេ។
លោក ឆាយ ធី អ្នកសម្របសម្រួលអង្គការសិទ្ធិមនុស្សអាដហុកខេត្តរតនគិរីបានឲ្យដឹងថាការសង់សំណង់ថ្មីនោះគឺត្រូវបានធ្វើជិត ១ ខែមកហើយ និងបានសម្រេចប្រមាណជា ៣០ ភាគរយហើយ។
លោក ឆាយ ធី បានសម្ដែងការយល់ឃើញថា៖ «ការសាងសង់ដែលថានៅតំបន់សនេះគឺជាយុទ្ធសាស្រ្តរបស់ប្រទេសវៀតណាមក្នុងគោលបំណងរំលោភយកដីខ្មែរបន្ថែមទៀត»។
ជនជាតិដើមភាគតិចនៅក្នុងភូមិឡំ លោក រចំ ខាំ បានឲ្យដឹងថាស្រះទឹកដែលវៀតណាមលួចជីកនោះនៅតែត្រូវបានគេប្រើប្រាស់យកទឹកស្រោចបន្លែរាល់ថ្ងៃ។
លោកបានបញ្ជាក់ដែរថា ក្រៅពីស្រះនោះខាងវៀតណាមក៏បានចាក់សសរធ្វើសំណង់ថ្មីផ្សេងទៀតនៅក្នុងតំបន់នោះផងដែរ។
លោក ម៉ា វិចិត្រ អភិបាលស្រុកអូរយ៉ាដាវសុំមិនធ្វើអត្ថាធិប្បាយទេដោយសុំឲ្យទាក់ទងទៅអ្នកនាំពាក្យសាលាខេត្តវិញ។ លោក ញ៉ែម សំអឿន អភិបាលរងខេត្ត និងជាអ្នកនាំពាក្យសាលាខេត្តមិនអាចទាក់ទងសុំអត្ថាធិប្បាយបានទេកាលពីម្សិលមិញ។
បញ្ហាព្រំដែនជាមួយវៀតណាមនេះកាលពីឆ្នាំមុនក៏ត្រូវបានគេមើលឃើញថាជាផ្នែកមួយដែលនាំឲ្យគណបក្សកាន់អំណាច និងគណបក្សប្រឆាំងមើលមុខគ្នាលែងត្រង់ហើយមានតំណាងរាស្ត្រគណបក្សសង្គ្រោះជាតិ ២ រូបបានជាប់ពន្ធនាគារគឺលោក ហុង សុខហួរ និង លោក អ៊ុំ សំអាន ពីករណីបង្ហោះផែនទីដែលរដ្ឋាភិបាលថា ជាផែនទីក្លែងក្លាយ ៕