ក្រុមតិរច្ឆានសមមិត្ត ញ៉ែមដែលធ្លាប់កំទេចមាតាបិតាព្រះអង្គម្ចាស់ ស៊ីសុវត្ថិ ធម្មិកោកំពុងចាត់វិធានការលើព្រះអង្គម្ចាស់ ស៊ីសុវត្ថិ ធម្មិកោបន្ថែមទៀត? ~Reader
មាស សុខជា ភ្នំពេញ ប៉ុស្តិ៍ Mon, 15 August 2016
ភ្នំពេញៈ គណបក្សកាន់អំណាចកំពុងសិក្សាពីវិធានការផ្លូវច្បាប់ប្រឆាំងនឹងព្រះអង្គម្ចាស់ ស៊ីសុវត្ថិ ធម្មិកោ ដែលបានហៅរបបបច្ចុប្បន្នថាជា «របបតិរច្ឆាន» ប៉ុន្តែព្រះអង្គមានបន្ទូលថាព្រះអង្គបានត្រៀមខ្លួនរួចជាស្រេចដើម្បីប្រឈមមុខនឹងវិធានការផ្លូវច្បាប់។
អ្នកនាំពាក្យគណបក្សប្រជាជនកម្ពុជា (CPP) លោក សុខ ឥសាន កាលពីម្សិលមិញបានបញ្ជាក់ថាក្រុមអ្នកច្បាប់បាននិងកំពុងពិនិត្យលទ្ធភាពផ្នែកច្បាប់ និងអង្គហេតុនៃការពិតនៅលើករណីដែលព្រះអង្គម្ចាស់ ស៊ីសុវត្ថិ ធម្មិកោ ជាមន្ត្រីជាន់ខ្ពស់គណបក្សសង្គ្រោះជាតិ (CNRP) ដែលបានហៅរបបបច្ចុប្បន្នដឹកនាំដោយ CPP ថាជារបបតិរច្ឆាន។
លោកបានអះអាងថា ព្រះអង្គម្ចាស់ ស៊ីសុវត្ថិ ធម្មិកោ មិនមែនជាអ្នករាជានិយម និងមិនមែនជាអ្នកគោរពព្រះមហាក្សត្រពិតប្រាកដទេដោយលោកបានថ្លែងថាព្រះអង្គម្ចាស់កំពុងរស់នៅកម្ពុជាតែបានប្រមាថប្រទេសកម្ពុជាថាជារបបតិរច្ឆានដូច្នេះវាមានន័យថាព្រះអង្គម្ចាស់ ធម្មិកោ ដែលកំពុងរស់នៅក្នុងប្រទេសគឺមិនខុសគ្នាពីសត្វតិរច្ឆាននោះទេ។
លោកបានបន្តថា៖ «យើងកំពុងពិនិត្យមើលច្បាប់ឲ្យបានត្រឹមត្រូវ។ យើងមិនធ្វើដោយប្រថុយប្រថាននោះទេដូច្នេះយើងត្រូវតែពិនិត្យមើលឲ្យបានគ្រប់ជ្រុងជ្រោយ។ ព្រះអង្គហ៊ានប្រមាថប្រទេសជាតិថា តិរច្ឆាន ដូច្នេះទ្រង់ដែលកំពុងរស់នៅក្នុងប្រទេសកម្ពុជាដែរនោះគឺមិនខុសគ្នាពីសត្វតិរច្ឆានដែរនោះទេ»។
កាលពីសប្តាហ៍មុនអ្នកនាំពាក្យ CPP លោក ឈឹម ផលវរុណ ដែលបានបដិសេធមិនផ្តល់អត្ថាធិប្បាយដល់កាសែតភ្នំពេញប៉ុស្តិ៍បានប្រាប់ប្រព័ន្ធផ្សព្វផ្សាយក្នុងស្រុកថាព្រះអង្គម្ចាស់ ស៊ីសុវត្ថិ ធម្មិកោ អាចប្រឈមនឹងចំណាត់ការផ្លូវច្បាប់ដែលព្រះអង្គបានហៅរបបដឹកនាំដោយ CPP ថាជារបបតិរច្ឆាន។ លោក ឈឹម ផលវរុណ ថ្លែងថា៖ «ជាគោលការណ៍ច្បាប់រដ្ឋធម្មនុញ្ញធានាកិត្តិយសសេចក្តីថ្លៃថ្នូររបស់រូបវន្តបុគ្គល និងនីតិបុគ្គល។
ដូច្នេះជនណាក៏ដោយគណបក្សប្រជាជនកម្ពុជាបានប្តេជ្ញារួចហើយថាជនណាដែលប្រមាថមេដឹកនាំ [CPP] ប្រមាថប្រមុខរដ្ឋាភិបាល និងប្រមាថគណបក្សប្រជាជនគឺជននោះនឹងត្រូវទទួលខុសត្រូវចំពោះមុខច្បាប់» ។
ដោយបានបង្ហោះលើទំព័រហ្វេសប៊ុករបស់ទ្រង់កាលពីថ្ងៃពុធសប្តាហ៍មុនអមជាមួយនឹងរូបថតទ្រង់ដែលកំពុងបង្ហាញការគោរពដល់ព្រះមហាក្សត្រនរោត្តម សីហមុនី និងមហាក្សត្រិយ៍ព្រះវររាជមាតានរោត្តម មុនិនាថ សីហនុ ជាមួយនឹងរូបថតផ្សេងទៀតដែលបង្ហាញពីការបណ្តេញប្រជារាស្ត្រចេញពីផ្ទះ និងដីធ្លីរបស់ពួកគេដោយព្រះអង្គម្ចាស់ ស៊ីសុវត្ថិ ធម្មិកោ សរសេរថា «ខ្ញុំសូមនិយាយឲ្យច្បាស់ ខ្ញុំគោរពស្រឡាញ់ព្រះមហាក្សត្រក៏ប៉ុន្តែខ្ញុំប្រឆាំងរបបតិរច្ឆានដឹកនាំដោយ CPP ជាដាច់ខាត!»។
ទោះជាយ៉ាងណានៅលើហ្វេសប៊ុករបស់ព្រះអង្គកាលពីថ្ងៃសៅរ៍ព្រះអង្គម្ទាស់ហាក់ដូចជាបានចំអកទៅលើការគំរាមកំហែងរបស់ CPP ដែលថានឹងចាត់វិធានការផ្លូវច្បាប់ប្រឆាំងនឹងព្រះអង្គដោយព្រះអង្គមានបន្ទូលថា៖ «ខ្ញុំគ្មានការភ័យព្រួយក្នុងការប្រឈមឡើយដោយសារខ្ញុំដឹងថាមានអ្នកបន្តវេនជាច្រើនដែលធ្វើដំណើរទៅរកការផ្លាស់ប្តូរក្នុងពេលឆាប់ៗនេះ។ អ្នកដែលត្រូវភ័យព្រួយគឺអ្នកដែលរកនរណាបន្តពីខ្លួនមិនបាន» ។
មានបន្ទូលប្រាប់កាសែតភ្នំពេញប៉ុស្តិ៍ពីម្សិលមិញព្រះអង្គម្ចាស់ ស៊ីសុវត្ថិ ធម្មិកោ បានច្រានចោលការចោទដែលថាព្រះអង្គម្ចាស់បានហៅប្រទេសកម្ពុជាថាជាប្រទេសតិរច្ឆានដោយទ្រង់បានបញ្ជាក់ថាព្រះអង្គមិនបានហៅប្រទេសកម្ពុជាជាប្រទេសតិរច្ឆានទេហើយទ្រង់បានសង្កត់ធ្ងន់ថាព្រះអង្គបានហៅរបបដែលដឹកនាំដោយ CPP ថាជារបបតិរច្ឆានមិនមែនសំដៅលើប្រទេសកម្ពុជាទេ។
ព្រះអង្គម្ចាស់បានបញ្ជាក់ថា៖ «ខ្ញុំចង់ឲ្យអ្នកដែលចោទប្រកាន់ខ្ញុំឲ្យអានអត្ថបទរបស់ខ្ញុំឲ្យបានត្រឹមត្រូវ។ ខ្ញុំមិនបានប្រមាថប្រទេសរបស់ខ្ញុំទេ។ ខ្ញុំបានប្រមាថការដឹកនាំប្រទេសរបស់ខ្ញុំ។ គឺវាខុសគ្នា។ ប្រទេស និងការដឹកនាំប្រទេសគឺវាខុសគ្នា។ ខ្ញុំបានមានបន្ទូលយ៉ាងច្បាស់រួចហើយគឺរបបដែលដឹកនាំដោយគណបក្សប្រជាជនកម្ពុជា។ ខ្ញុំមិនមានអ្វីដែលត្រូវប្រមាថជាតិសាសន៍កម្ពុជា ឬក្រុមគ្រួសាររាជវង្សនោះទេគឺមិនមានអ្វីដែលខ្ញុំត្រូវប្រមាថទាល់តែសោះ»។
នៅពេលសួរថា តើព្រះអង្គនឹងសុំទោសឬក៏អត់ប្រសិនបើមានការស្នើឲ្យព្រះអង្គសុំទោស ព្រះអង្គម្ចាស់ ធម្មិកោ បានអះអាងថាព្រះអង្គមិនបានធ្វើអ្វីខុស ឬមានបន្ទូលខុសនោះទេដូច្នេះមិនមានអ្វីដែលត្រូវសុំទោសឡើយ៕ NS