ទូច សុខា ភ្នំពេញ ប៉ុស្តិ៍ Fri, 26 August 2016
ភ្នំពេញ: មន្ត្រីជាន់ខ្ពស់កងកម្លាំងប្រដាប់អាវុធប្រមាណជាង ១០០ នាក់បានជួបប្រជុំគ្នានៅសាលប្រជុំក្រសួងមហាផ្ទៃកាលពីថ្ងៃម្សិលមិញដើម្បីត្រៀមរៀបចំកងកម្លាំងប្រដាប់អាវុធចន្លោះពី ៥ ពាន់នាក់រហូតដល់ ៧ ម៉ឺននាក់សម្រាប់ការពារសន្តិសុខ និងរក្សាសុវត្ថិភាពសម្រាប់ការបោះឆ្នោតឃុំ-សង្កាត់ និងបោះឆ្នោតជ្រើសតាំងតំណាងរាស្រ្តនាឆ្នាំខាងមុខ។
អគ្គស្នងការនគរបាលជាតិ និងជាប្រធានគណៈបញ្ជាការសន្តិសុខអចិន្រៃ្តយ៍សម្រាប់ការបោះឆ្នោតលោក នេត សាវឿន បានថ្លែងថាកម្លាំងនគរបាលកងរាជអាវុធហត្ថ និងកងយោធពលខេមរភូមិន្ទនឹងត្រូវដាក់ពង្រាយដើម្បីការពារសន្តិសុខក្នុងដំណាក់កាលចុះឈ្មោះបោះឆ្នោតរហូតដល់ដំណាក់កាលរាប់សន្លឹកឆ្នោត។
ប្រធានគណៈកម្មាធិការជាតិរៀបចំការបោះឆ្នោតលោក ស៊ិក ប៊ុនហុក ថ្លែងក្នុងពិធីនោះដែរថាការត្រៀមពង្រាយកម្លាំងនេះគឺបណ្ដាលមកពីបទពិសោធកាលពីការបោះឆ្នោតឆ្នាំ ២០១៣ មានករណីរារាំងអ្នកមានសិទ្ធិបោះឆ្នោតមិនឲ្យបោះឆ្នោតមានការឡោមព័ទ្ធស្នាក់ការគណៈកម្មការឃុំសង្កាត់រៀបចំការបោះឆ្នោតមិនឲ្យធ្វើការបូកសរុបលទ្ធផលបោះឆ្នោត និងមានអំពើហិង្សាបំផ្លាញរថយន្តសមត្ថកិច្ចក៏មាន។
លោកក៏ថ្លែងដែរថា៖ «នៅក្រោយការបោះឆ្នោតក៏មានភាពអនាធិបតេយ្យប្រឆាំងនឹងលទ្ធផលបោះឆ្នោតដោយប្រើពេលអស់ជិត ១ ឆ្នាំទើបចប់គណៈកម្មាធិការជាតិរៀបចំការបោះឆ្នោតនឹងមានការលំបាកក្នុងការគ្រប់គ្រងការបោះឆ្នោតប្រសិនបើអំពើនេះកើតមាននៅពេលបោះឆ្នោតខាងមុខៗ។ ដូច្នេះខ្ញុំស្នើសុំមេត្តាចាត់វិធានការតាមផ្លូវច្បាប់រក្សាឲ្យបាននូវស្ថានភាពនយោបាយស្ងប់ស្ងាត់ទាំងមុនពេលបោះឆ្នោតពេលបោះឆ្នោត និងក្រោយពេលបោះឆ្នោត»។
លោក សាវឿន ថ្លែងថា៖ «គោលបំណងរៀបចំកម្លាំងសំដៅធានានូវសន្តិសុខសណ្តាប់ធ្នាប់សាធារណៈ និងសុវត្ថិភាពសម្រាប់ដំណើរការចុះឈ្មោះបោះឆ្នោត ឬក្នុងសម័យបោះឆ្នោតតាមអាណត្តិ ឬតាមនីតិកាលនីមួយៗប្រព្រឹត្តទៅដោយរលូន និងគ្មានការភ័យខ្លាចការបំភិតបំភ័យការគំរាមកំហែង និងគ្មានអំពើហិង្សា»។
អ្នកនាំពាក្យគណបក្សសង្គ្រោះជាតិលោក យឹម សុវណ្ណ បានមានប្រសាសន៍ថាការពង្រាយកម្លាំងនៅពេលចុះឈ្មោះបោះឆ្នោតគឺគ្មានភាពចាំបាច់នោះទេដោយលោកបានបញ្ជាក់ថាកន្លងមកមិនធ្លាប់មានបញ្ហាអ្វីកើតឡើងនៅពេលចុះឈ្មោះបោះឆ្នោតនោះដែរ។
លោកបន្ថែមថា៖ «ការរាយកម្លាំងហ្នឹងអាចជារូបភាពមិនល្អជំហររបស់ខ្ញុំគឺមិនចាំបាច់ប្រទេសមានសន្តិភាពហេតុអ្វីចាំបាច់ពង្រាយកម្លាំង?»។
លោក សុវណ្ណ មិនជំទាស់ចំពោះការដាក់កម្លាំងពេលឃោសនាបោះឆ្នោត និងពេលបោះឆ្នោតនោះដែរតែបានច្រានចោលដែរចំពោះការចោទប្រកាន់ក្រោយការបោះឆ្នោតឆ្នាំ ២០១៣ មានភាពអនាធិបតេយ្យប្រឆាំងនឹងលទ្ធផលបោះឆ្នោត។ ការតវ៉ាបានធ្វើឡើងដោយសារ គជប មិនអាចរកដំណោះស្រាយបានក្រោយពេលមានជម្លោះទាក់ទងការបោះឆ្នោត។
អ្នកវិភាគពីបញ្ហាសង្គមលោក មាស នី ថ្លែងថាស្ថានភាពកម្ពុជាបច្ចុប្បន្នមិនចាំបាច់ត្រូវមានកម្លាំងសន្តិសុខរាប់ម៉ឺននាក់ត្រូវប្រចាំការសម្រាប់ពេលបោះឆ្នោតនោះទេក៏ប៉ុន្តែបើសិនជាមានកម្លាំងសន្តិសុខច្រើនអាចធ្វើឲ្យអ្នកទៅបោះឆ្នោតហាក់មានភាពមិនស្រណុកចិត្តទៅវិញ៕