ដោយ សូត សុខប្រាថ្នា RFA 2016-10-20
មន្ត្រីអង្គការសង្គមស៊ីវិលលើកឡើងថា ការផ្តល់ព័ត៌មានស្ដីពីការងារដល់ប្រជាពលរដ្ឋឲ្យបានច្រើន ពិសេសការងារដែលមានលក្ខខណ្ឌប្រសើរ និងប្រាក់ខែសមរម្យ គឺជាការផ្តល់ជម្រើសកាន់តែច្រើនដល់អ្នកដែលកំពុងស្វែងរកការងារធ្វើ។ បន្ថែមពីនេះ គឺអាចកាត់បន្ថយការចំណាកស្រុកទៅក្រៅប្រទេស ពិសេសការចំណាកស្រុកដោយខុសច្បាប់។
ការយល់ឃើញដូចនេះ ធ្វើឡើងនៅក្នុងវេទិកាដាក់ឲ្យប្រើប្រាស់ជាផ្លូវការនូវសេវាកម្មការងារឈ្មោះ "សេវាកម្មបងភ័ក្រ"ដែលរៀបចំឡើងដោយវិទ្យាស្ថានបើកទូលាយ សហការជាមួយអង្គការវីនរ៉ក់ (Winrock) និងទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ ហៅកាត់ថា យូ.អេស.អេ.អាយ.ឌី (USAID) នៅសណ្ឋាគារហ៊ីម៉ាវ៉ារី (Himawari) រាជធានីភ្នំពេញនៅព្រឹកថ្ងៃទី១៩ តុលា។
គម្រោងសេវាកម្មការងារថ្មី និងដំបូងគេនៅកម្ពុជា ឈ្មោះ បងភ័ក្រ គឺមានគោលបំណងផ្សព្វផ្សាយឱកាសការងារទៅដល់កម្មករគ្មានជំនាញ និងមានជំនាញ ឲ្យបានដឹងអំពីសេវាកម្មការងារដែលក្រុមហ៊ុន និងសហគ្រាសមួយចំនួនកំពុងត្រូវការ។ សេវាកម្មនេះ អាចផ្តល់ជូនពលរដ្ឋដោយពួកគាត់មិនចាំបាច់ចេះប្រើប្រាស់អ៊ីនធឺណិត ហើយកំពុងស្វែងរកការងារដំបូងៗ។
ប្រធានគម្រោងនៃអង្គការវិទ្យាស្ថានបើកទូលាយ លោក ហ្វេដេរីកូ បារេរ៉ាស (Fedrico Barreras) មានប្រសាសន៍ថា សេវាកម្មបងភ័ក្រ គឺជាសេវាកម្មតាមបែបប្រព័ន្ធបច្ចេកវិទ្យាថ្មី គឺអាចជួយកម្មករខ្មែរដើម្បីស្វែងរកការងារធ្វើដែលមានសុវត្ថិភាពក្នុងប្រទេសកម្ពុជា ហើយក៏អាចជួយកាត់បន្ថយភាពរងគ្រោះដោយសារអំពើជួញដូរមនុស្ស ជាដើម។ សេវាកម្មនេះ ត្រូវបានអភិវឌ្ឍឡើងដោយវិទ្យាស្ថានបើកទូលាយ ដែលជាផ្នែកមួយនៃកម្មវិធីប្រយុទ្ធប្រឆាំងការជួញដូរមនុស្ស៖ «គោលបំណងរបស់វិទ្យាស្ថានបើកទូលាយ គឺជួយផ្សព្វផ្សាយទាក់ទងសេវាកម្មការងារបងភ័ក្រ ដែលយើងទើបអភិវឌ្ឍ»។
សេវាកម្មការងារនេះ គឺផ្ដោតទៅលើវិស័យការងារចំនួន៤ រួមមានវិស័យសំណង់ រោងចក្រ បដិសណ្ឋារកិច្ច និងសន្តិសុខ ហើយមានក្រុមហ៊ុននៅក្នុងប្រទេសកម្ពុជា ជិត ១០០ក្រុមហ៊ុនបានចុះឈ្មោះសហការ។
ប្រធានគម្រោងដដែលបញ្ជាក់ថា រាល់ក្រុមហ៊ុនដែលបានចុះឈ្មោះជាមួយសេវាកម្មនេះ គឺជាក្រុមហ៊ុនដែលស្របច្បាប់ និងមានសុវត្ថិភាពខ្ពស់។ សេវាកម្មការងារបងភ័ក្រ គឺជាការប្រើប្រាស់បច្ចេកវិទ្យាទំនាក់ទំនងប្រកបដោយភាពច្នៃប្រឌិត ដែលអាចផ្សព្វផ្សាយឱកាសការងារដល់ប្រជាពលរដ្ឋដែលមិនធ្លាប់ចំណាកស្រុក ស្វែងរកការងារធ្វើពីមុនមក។ ជាងនេះទៀត វាបានបញ្ចូលការប្រើប្រាស់បណ្ដាញទំនាក់ទំនងសង្គមហ្វេសប៊ុក (Facebook) និងគេហទំព័រដើម្បីផ្សព្វផ្សាយឱកាសការងារទៅកាន់កម្មករដែលកំពុងមានការងារស្រាប់។
បន្ទាប់មក កម្មករទាំងនោះអាចប្រើប្រាស់មុខងារសេវាកម្មសម្រាប់ផ្ញើសារជាសំឡេង តាមរយៈការហៅទូរស័ព្ទចូលដោយស្វ័យប្រវត្តិ ទៅកាន់សាច់ញាតិរបស់ពួកគេ។ សារជាសំឡេង នឹងផ្តល់ព័ត៌មានលម្អិតស្ដីពីឱកាសការងារ និងវិធីសាមញ្ញដែលសាច់ញាតិ និងមិត្តភ័ក្ដិរបស់ពួកគេ ដើម្បីស្នើសុំធ្វើការងារនោះ។ ក្រោយមក ខាងភ្នាក់ងារក្រុមហ៊ុន នឹងភ្ជាប់ទំនាក់ទំនងទៅកាន់ពួកគាត់។
ថ្លែងក្រោយពេលបញ្ចប់សិក្ខាសាលា អគ្គលេខាធិការរងនៃគណៈកម្មាធិការជាតិប្រយុទ្ធប្រឆាំងការជួញដូរមនុស្សនៅកម្ពុជា អ្នកស្រី រ៉ន សិរីលក្ខិណា មានប្រសាសន៍ថា សេវាកម្មការងារនេះនឹងផ្តល់ប្រយោជន៍បន្ថែមទៀតដល់ប្រជាពលរដ្ឋខ្មែរ ដើម្បីជួយសម្រួលដល់កម្មករ និងអ្នកវិនិយោគទុន ឲ្យបានជួបទាក់ទងគ្នា។ អ្នកស្រីបន្តថា បច្ចុប្បន្ន រាជរដ្ឋាភិបាល និងស្ថាប័នពាក់ព័ន្ធរបស់រដ្ឋ បានខិតខំផ្សព្វផ្សាយស្ដីពីព័ត៌មានការងារដែលមានសុវត្ថិភាពនៅក្នុងស្រុក ដល់ប្រជាពលរដ្ឋ រួមមានវិទ្យុ ទូរទស្សន៍ អាជ្ញាធរមូលដ្ឋាន ឬតាមបណ្ដាញទំនាក់ទំនងសង្គមផង ធ្វើយ៉ាងណាជៀសវាងការសម្រេចចិត្តដោយប្រថុយប្រថាន ពិសេសចំណាកស្រុកដោយខុសច្បាប់ ដែលមានទម្រង់ជាការជួញដូរមនុស្ស៖ «ទាក់ទងការងារដែលយើងត្រូវតែផ្តល់ព័ត៌មានឲ្យគាត់ឲ្យបានច្បាស់ ត្រូវតែផ្តល់ព័ត៌មានទាក់ទងការចំណាកស្រុក ដែលគេហៅថាប្រកបដោយសុវត្ថិភាពឲ្យបានច្បាស់ គឺជាចំណុចសំខាន់មួយដែលអាចជួយឲ្យពួកគាត់យល់ឃើញថា ការធ្វើការដោយមិនស្របច្បាប់ គឺធ្វើឲ្យជួបបញ្ហាអ៊ីចេះៗមួយ»។
អ្នកស្រីថា ចំណាត់ថ្នាក់ស្ដីពីការជួញដូរមនុស្សសម្រាប់ប្រទេសកម្ពុជា នៅឆ្នាំ២០១៦ គឺល្អជាងកាលពីឆ្នាំ២០១៥ មួយកម្រិតទៀត ប៉ុន្តែរាជរដ្ឋាភិបាលនៅតែខិតខំធ្វើការងារនេះបន្ថែមទៀត។
នៅក្នុងទីផ្សារការងារនាពេលបច្ចុប្បន្ន មានយុវជនកម្ពុជា ប្រមាណ ២០ម៉ឺននាក់ បានចូលប្រឡូកក្នុងវិស័យការងារ ប៉ុន្តែពួកគេមួយភាគធំ ទទួលបានការបណ្តុះបណ្តាលតិចតួច។
ទិន្នន័យរបស់ក្រសួងអប់រំ យុវជន និងកីឡា កាលពីឆ្នាំ២០១២ និងឆ្នាំ២០១៣ បង្ហាញថា ចំនួនសិស្សដែលបានបោះបង់ចោលការសិក្សាត្រឹមកម្រិតបឋមសិក្សា គឺមានជាង ៧៥ភាគរយ។ ចំណែកចំនួនសិស្សដែលបានរៀនបន្តរហូតដល់ថ្នាក់មហាវិទ្យាល័យ គឺមានជាង ១៥ភាគរយប៉ុណ្ណោះ។
អនុប្រធាននាយកដ្ឋានទីភ្នាក់ងារជាតិមុខរបរ និងការងារ លោក ពឹម សុភា លើកឡើងក្នុងសិក្ខាសាលាថា ទិន្នន័យនេះបញ្ជាក់ឲ្យឃើញថា យុវជនខ្មែរភាគច្រើនពិបាកក្នុងការប្រកួតប្រជែងលើទីផ្សារការងារទាំងក្នុងប្រទេស និងក្នុងតំបន់។ មិនតែប៉ុណ្ណោះ លទ្ធភាពទទួលបានព័ត៌មានស្ដីពីឱកាសការងារពេញលេញ និងតម្រូវការនៅមានកម្រិត។
ទាក់ទងបញ្ហានេះដែរ ពលការិនីចំណាកស្រុកទៅប្រទេសម៉ាឡេស៊ី ម្នាក់នៅខេត្តត្បូងឃ្មុំ ដែលសម្រេចទៅធ្វើការងារនៅក្រៅប្រទេសតាមរយៈមេខ្យល់ ឲ្យដឹងថា មូលហេតុខ្លួនសម្រេចចិត្តទៅធ្វើការងារឆ្ងាយពីផ្ទះ ដោយសារជឿលើការអូសទាញពីមេខ្យល់។ មេខ្យល់ប្រាប់កញ្ញាថា នឹងទទួលបានប្រាក់ខែ ៣០០ដុល្លារទៅ ៤០០ដុល្លារ ហើយនឹងទទួលបានប្រាក់ប្រចាំសប្ដាហ៍ចំនួន ២០ម៉ឺនរៀលទៀត ប៉ុន្តែក្រោយពេលបានទៅធ្វើការជាអ្នកបម្រើតាមផ្ទះ គឺមិនបានដូចការសន្យាឡើយ។ ប្រភពដដែលបន្តថា ការងារនៅទីនោះ គឺមិនមានពេលសម្រាកត្រឹមត្រូវឡើយ ហើយតែងរងការគំរាមកំហែងពីម្ចាស់ផ្ទះថែមទៀតផង។ មិនតែប៉ុណ្ណោះ ពេលត្រឡប់មកស្រុកខ្មែរវិញ ត្រូវតម្រួតថៃ ចាប់ខ្លួនដាក់ពន្ធនាគារចំនួនជិត ២០ថ្ងៃ ដោយសារបញ្ហាប៉ាសស្ព័រផុតកំណត់។ ស្ត្រីដែលបានទៅធ្វើការនៅប្រទេសម៉ាឡេស៊ី ចំនួនពីរខែរូបនេះ និយាយថា នឹងមិនវិលត្រឡប់ទៅប្រទេសគេម្តងទៀតឡើយ បើទោះបីជាទទួលបានប្រាក់ខែប៉ុន្មានក៏ដោយ ហើយកញ្ញាត្រូវការមានការងារធ្វើនៅក្នុងស្រុកវិញ៖ «ចា៎! ស្រេចតែថៅកែគេ គេថ្ងៃណាគេឲ្យឈប់ៗ ថ្ងៃណាគេមិនឲ្យឈប់ គេមិនឲ្យឈប់ទេ»។
ពលរដ្ឋនៅស្រុកតំបែរ ខេត្តត្បូងឃ្មុំ ម្នាក់ទៀតដែលធ្លាប់បណ្តោយកូនស្រីឲ្យទៅធ្វើការនៅប្រទេសម៉ាឡេស៊ី លោក នួន ស៊ីណាត សម្ដែងក្តីសោកស្ដាយដោយឃើញសុខភាពរបស់កូនពេលវិលត្រឡប់មកដល់ស្រុកវិញមិនសូវល្អ ចំណែកថវិកាក៏ត្រូវខាតបង់មួយចំនួនធំ។ លោកបន្ថែមទៀតថា ការបង្កើតសេវាកម្មផ្តល់ព័ត៌មានដែលមានវិជ្ជាជីវៈស្ដីពីការងារក្នុងស្រុក ជូនពលរដ្ឋឲ្យបានច្រើន គឺជួយឲ្យប្រជាជនរួចផុតពីការកេងប្រវ័ញ្ច ឬជួញដូរមនុស្ស ហើយលោកក៏ស្នើឲ្យពលរដ្ឋគ្រប់រូប ត្រូវស្វែងរកការងារធ្វើនៅក្នុងស្រុកល្អជាង៕