ដោយ អ៊ុំ រង្សី RFA 2016-10-20
មន្ត្រីជំនាញក្រសួងសុខាភិបាល និងអង្គការហេឡែន ខេលល័រ អន្តរជាតិ (Helen Keller International) លើកឡើងថា កង្វះអាហារូបត្ថម្ភបានដាក់បន្ទុកផ្នែកចំណាយយ៉ាងធ្ងន់ធ្ងរទៅលើប្រព័ន្ធសុខាភិបាលនៅកម្ពុជា។ ទន្ទឹមគ្នានេះ អ្នកជំនាញឲ្យដឹងថា ក្នុងមួយឆ្នាំៗ ប្រទេសកម្ពុជា បានខាតបង់ថវិកាប្រមាណ ២៥០លានដុល្លារអាមេរិក ដោយសារបញ្ហាបណ្ដាលមកពីកង្វះអាហារូបត្ថម្ភ។
មន្ត្រីជំនាញក្រសួងសុខាភិបាល និងអង្គការហេឡែន ខេលល័រ អន្តរជាតិ អះអាងថា កង្វះអាហារូបត្ថម្ភបណ្ដាលឲ្យមានបញ្ហាសុខភាពជាច្រើននាំទៅរកមរណភាពទារក និងជំងឺរ៉ាំរ៉ៃលើកុមារ។
ការលើកឡើងនេះ ធ្វើឡើងនៅក្នុងវគ្គបណ្តុះបណ្តាលអ្នកសារព័ត៌មាន ស្ដីពីការចិញ្ចឹមទារក និងកុមារ អនុក្រឹត្យលេខ១៣៣ និងការរាយការណ៍ប្រកបដោយប្រសិទ្ធភាព ដែលបានរៀបចំឡើងនៅថ្ងៃទី២០ ខែតុលា។
នាយកប្រចាំប្រទេសអង្គការហេឡែន ខេលល័រ អន្តរជាតិ (Helen Keller International) លោក ឃីត ផតធ័រ (Keith Porter) មានប្រសាសន៍ថា កង្វះអាហារូបត្ថម្ភបានដាក់បន្ទុកផ្នែកចំណាយយ៉ាងធ្ងន់ធ្ងរទៅលើប្រព័ន្ធសុខាភិបាលនៅកម្ពុជា និងបណ្ដាលឲ្យមានអត្រាមរណភាពទារក និងជំងឺរ៉ាំរ៉ៃទៅលើកុមារបន្តដល់ពួកគេពេញវ័យ។
លោកបន្តថា មូលហេតុចម្បងដែលបណ្ដាលឲ្យកម្ពុជា ខាតបង់ថវិកាប្រមាណ ២៥០លានដុល្លារអាមេរិកក្នុងមួយឆ្នាំៗដោយសារការចិញ្ចឹមទារក និងកុមារមិនពេញលេញ រួមមាន មិនបានបំបៅកូនដោយទឹកដោះម្តាយភ្លាមអំឡុងម៉ោងដំបូងបន្ទាប់ពីសម្រាលរួច ការមិនបំបៅដោយទឹកដោះម្តាយតែមួយមុខគត់សម្រាប់រយៈពេល ៦ខែដំបូង និងការមិនបន្តបំបៅកូនដោយទឹកដោះម្តាយ ឬជំនួសប្រើប្រាស់ដោយទឹកដោះសិប្បនិម្មិត ព្រមទាំងការមិនផ្តល់អាហារបន្ថែមសមស្របរហូតដល់អាយុ ២ឆ្នាំ ឬលើសជាដើម។
ប្រធានអង្គការហេឡែន ខេលល័រ អន្តរជាតិ រូបនេះអះអាងថា ដើម្បីកុំឲ្យកម្ពុជា ជួបបញ្ហាកង្វះអាហារូបត្ថម្ភ និងបន្តខាតបង់ថវិកាដ៏ច្រើនសន្ធឹកសន្ធាប់នេះ លោកស្នើឲ្យស្ថាប័នពាក់ព័ន្ធ ប្រព័ន្ធផ្សព្វផ្សាយ បណ្ដាញសារព័ត៌មានជាតិ និងអន្តរជាតិ ត្រូវតែផ្សព្វផ្សាយជំរុញឲ្យសាធារណជនយល់ដឹងពីការចិញ្ចឹមកូនដោយទឹកដោះ។
ទាក់ទិននឹងករណីនេះដែរ នាយករងមជ្ឈមណ្ឌលជាតិគាំពារមាតា និងទារក អ្នកស្រីវេជ្ជបណ្ឌិត ប្រាក់ សោភ័ណនារី មានប្រសាសន៍ថា ដើម្បីដោះស្រាយបញ្ហាកង្វះអាហារូបត្ថម្ភនៅកម្ពុជា រដ្ឋាភិបាលបានដាក់ចេញនូវអនុក្រឹត្យលេខ១៣៣ ស្ដីពីការផ្សព្វផ្សាយលក់ផលិតផលសម្រាប់ចិញ្ចឹមទារក និងកុមារ បង្កើតយុទ្ធនាការពិភពលោកពីសារសំខាន់ទឹកដោះម្តាយ គោលនយោបាយពីការបំបៅដោះម្តាយ ពិសេសបណ្តុះបណ្តាលផ្ទាល់ដល់សហគមន៍ ជាដើម៖ «ដើម្បីឲ្យប្រជាពលរដ្ឋយល់ពីបញ្ហានេះ យើងបានផលិតជាស្ព័តអប់រំពីបញ្ហានេះ ផ្សព្វផ្សាយតាមវិទ្យុ និងទូរទស្សន៍។ យើងមានវគ្គបណ្តុះបណ្តាលដល់មន្ត្រីសុខាភិបាល ភ្នាក់ងារសុខភាពភូមិ និងសហគមន៍ដែលជួបបញ្ហានេះផ្ទាល់ មានទិវាជាតិអាហារូបត្ថម្ភពិភពលោក និងយុទ្ធនាការផ្សេងៗស្ដីពីការចិញ្ចឹមទារកដោយទឹកដោះម្តាយ ជាដើម»។
របាយការណ៍របស់អង្គការហេឡែន ខេលល័រ អន្តរជាតិ ក្រៅពីបង្ហាញថា ក្នុងមួយឆ្នាំៗប្រទេសកម្ពុជា បានខាតបង់ថវិកាប្រមាណ ២៥០លានដុល្លារអាមេរិក ដោយសារកង្វះអាហារូបត្ថម្ភ។ របាយការណ៍របស់អង្គការនេះ ក៏ឲ្យដឹងទៀតថា ៤៣% នៃម្តាយៗនៅរាជធានីភ្នំពេញ បានបំបៅទឹកដោះសិប្បនិម្មិត (ផលិតផលជំនួសទឹកដោះម្តាយ) ដល់ទារកអាយុ ០ ដល់ ៦ខែ។
បន្ថែមពីនេះ ការវិភាគថ្មីៗពីអង្គការយូនីសេហ្វ (UNICEF) និងអង្គការស្បៀងអាហារពិភពលោក (WFP) ក៏បានបង្ហាញដែរថា អត្រានៃការធ្លាក់ចុះការបំបៅកូនដោយទឹកដោះម្តាយ មានផលប៉ះពាល់ផ្នែកសេដ្ឋកិច្ចសម្រាប់ប្រទេសកម្ពុជា ដែលជំរុញឲ្យមានការខាតបង់សេដ្ឋកិច្ចប្រមាណ ២៤លានដុល្លារអាមេរិកទៀតក្នុងមួយឆ្នាំ ដោយសារការបំបៅកូនដោយទឹកដោះមិនបានពេញលេញ។
យ៉ាងណា មន្ត្រីជំនាញក្រសួងសុខាភិបាល បានណែនាំឲ្យស្ត្រីជាម្តាយត្រូវបំបៅកូនដោយទឹកដោះដំបូងបន្ទាប់ពីសម្រាលរួច រហូតដល់កុមារអាយុ ២ឆ្នាំ ឬលើសពីនេះ ដោយមិនត្រូវជំនួសប្រើប្រាស់ដោយទឹកដោះសិប្បនិម្មិតនោះឡើយ ដើម្បីកាត់បន្ថយជំងឺមហារីកដោះ និងមហារីកដៃស្បូនចំពោះម្តាយផ្ទាល់ ពិសេសជំរុញឲ្យកុមារគេចចេញពីជំងឺផ្សេងៗ ដោយសារកង្វះអាហារូបត្ថម្ភ ព្រមទាំងបន្ថយការចំណាយថវិកាជាតិ៕