ដោយ ចេង ម៉េងជូ RFA 2016-05-01
ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញ លោក លី សុផាណា នៅថ្ងៃទី១ ឧសភា ឲ្យដឹងថា ក្រុមជនសង្ស័យក្នុងសំណុំរឿងគ្រឿងញៀនដែលបានបាញ់សម្លាប់អនុសេនីយ៍ឯកមួយរូប ក្នុងការបង្ក្រាបកាលពីថ្ងៃទី២៧ មេសា ត្រូវបានតំណាងអយ្យការសាលាដំបូងរាជធានីភ្នំពេញ សម្រេចបើកការស៊ើបសួរ ដោយចោទប្រកាន់ឈ្មោះ លី វីរៈ ពីបទជួញដូរដោយខុសច្បាប់នូវសារធាតុញៀន និងបទចូលរួមក្នុងក្រុមឧក្រិដ្ឋជន តាមមាត្រា៤០ និងមាត្រា៥៩ នៃច្បាប់ស្ដីពីការត្រួតពិនិត្យគ្រឿងញៀន។
សំណុំរឿងគ្រឿងញៀននេះ តុលាការបានចោទមនុស្សជាច្រើនដែលជាប់សង្ស័យក្នុងករណីនេះ រួមមានជនសង្ស័យឈ្មោះ ទី អៀង ឈ្មោះ លី កុកហ៊ុយ ឈ្មោះ ស៊ុន ដារ៉ូ ឈ្មោះ លី ជូ និងបក្ខពួក ត្រូវបានចោទប្រកាន់ពីបទជួញដូរដោយខុសច្បាប់នូវសារធាតុញៀន បទចូលរួមក្នុងក្រុមឧក្រិដ្ឋជន និងបទកាន់កាប់អាវុធដោយខុសច្បាប់ តាមមាត្រា៤០ និងមាត្រា៥៩ នៃច្បាប់ស្ដីពីការត្រួតពិនិត្យគ្រឿងញៀន និងមាត្រា៤៩០ នៃក្រមព្រហ្មទណ្ឌ។
ដោយឡែកជនសង្ស័យឈ្មោះ ត្រាវ រិទ្ធារ៉ា ត្រូវបានចោទប្រកាន់ពីបទជួញដូរដោយខុសច្បាប់នូវសារធាតុញៀនតាមមាត្រា៤០ នៃច្បាប់ស្ដីពីការត្រួតពិនិត្យគ្រឿងញៀន។ អ្នកនាំពាក្យសាលាដំបូងរាជធានីភ្នំពេញ លោក លី សុផាណា បញ្ជាក់ថា ជនសង្ស័យទាំងនេះត្រូវបានបញ្ជូនទៅឲ្យចៅក្រមស៊ើបសួរដើម្បីបន្តនីតិវិធី៕