ដោយ អ៊ុង សេរីវុទ្ធ RFA 2016-10-26
ក្រសួងយុត្តិធម៌កំពុងពិនិត្យលើបញ្ជីទណ្ឌិតជាង៥០០នាក់ មុននឹងដាក់ទៅប្រមុខរដ្ឋាភិបាល ដើម្បីពិនិត្យសម្រេច និងស្នើព្រះមហាក្សត្រលើកលែងទោស និងបន្ធូរបន្ថយទោស នៅក្នុងឱកាសព្រះរាជពិធីបុណ្យអុំទូកខាងមុខ។
អ្នកនាំពាក្យក្រសួងយុត្តិធម៌ លោក គឹម សន្តិភាព ឲ្យអាស៊ីសេរីដឹងថា មកដល់រសៀលថ្ងៃទី២៦ តុលា នេះ គណៈកម្មការជាតិពិនិត្យបញ្ជីទណ្ឌិតស្នើសុំបន្ធូរបន្ថយទោស និងលើកលែងទោស បានពិនិត្យរួចហើយនូវបញ្ជីសំណើចំនួន១២ លើបញ្ជីទាំង១៩ ដែលគណៈកម្មការក្រសួងមហាផ្ទៃ និងគណៈកម្មការថ្នាក់រាជធានីខេត្តបានស្នើ។
លោក គឹម សន្តិភាព បន្តថា គណៈកម្មការជាតិនេះនឹងបន្តពិនិត្យលើបញ្ជីដែលនៅសល់ នៅរសៀលថ្ងៃទី២៧ តុលា ទៀត។
ចំនួនទណ្ឌិតដែលត្រូវបានស្នើលើកលែងទោស និងបន្ធូរបន្ថយទោស ក្នុងឱកាសព្រះរាជពិធីបុណ្យអុំទូកឆ្នាំនេះ មានចំនួន ៥៦០ រូប ក្នុងនោះស្ត្រីចំនួន៤៣រូប នៅពន្ធនាគាររាជធានី-ខេត្តចំនួន១៩ និងមណ្ឌលអប់រំកែប្រែចំនួន៤។
កាលពីបុណ្យវិសាខបូជាកន្លងទៅថ្មីៗនេះ មានតែទណ្ឌិត៣រូបប៉ុណ្ណោះ ត្រូវបានលើកលែងទោស និង៧៧រូប ត្រូវបានបន្ធូរបន្ថយទោស ក្នុងចំណោមទណ្ឌិតប្រមាណ៨០០នាក់ ដែលត្រូវបានស្នើសុំ។
ចំពោះការលើកលែង និងបន្ធូរបន្ថយទោសនៅឆ្នាំនេះ ត្រូវបានរឹតបន្តឹង ក្រោយពីលោកនាយករដ្ឋមន្ត្រី ហ៊ុន សែន ចេញមុខរិះគន់ការដោះលែងទណ្ឌិតថា ភាគច្រើននៃជនល្មើសដែលសមត្ថកិច្ចចាប់ខ្លួនបាន ជាមុខសញ្ញាចាស់ ហើយលោកតម្រូវឲ្យផ្ញើបញ្ជីរាយនាមអ្នកលើកលែងទោសទាំងអស់ឲ្យលោកពិនិត្យម្ដងៗមួយ មុនស្នើទៅព្រះមហាក្សត្រ។
ជាទូទៅព្រះមហាក្សត្រធ្វើការលើកលែង និងបន្ធូរបន្ថយទោសទណ្ឌិតក្នុង១ឆ្នាំចំនួន៣ដង គឺក្នុងពិធីបុណ្យចូលឆ្នាំ បុណ្យវិសាខបូជា និងព្រះរាជពិធីបុណ្យអុំទូក។ ទណ្ឌិតដែលអនុវត្តទោសបាន២ ភាគ៣នៃទោសសរុប អាចទទួលបានការលើកលែងទោស ខណៈទណ្ឌិតអនុវត្តទោសបាន១ ភាគ៣នៃទោសសរុប អាចទទួលបានការបន្ធូរបន្ថយទោស ប្រសិនបើគេរកឃើញថា ទណ្ឌិត ទាំងនោះបានកែខ្លួនពេលនៅក្នុងពន្ធនាគារ៕