ដោយ អេង គីមហុង12/11/2016 rfi
គណៈកម្មាធិការជាតិរៀបចំការបោះឆ្នោត គ.ជ.ប បានប្រកាសលុបឈ្មោះស្ទួនដែលខ្លួនរកឃើញជិត២ម៉ឺននាក់ ដោយផ្អែកទៅតាមនីតិវិធីរបស់គ.ជ.ប។ ឈ្មោះស្ទួននេះក៏ត្រូវបានរាប់បញ្ចូលគ្នាជាមួយចំនួនពលរដ្ឋជិត៧លាននាក់ដែលបានមកចុះឈ្មោះបោះឆ្នោតរួចហើយដែរ។
មូលហេតុដែលនាំឲ្យមានឈ្មោះស្ទួនកើនឡើងរហូតដល់ទៅជិត២ម៉ឺននាក់គឺបណ្ដាលមកពីចន្លោះប្រហោងក្នុងពេលបំពេញការងាររបស់មន្ត្រីទទួលបន្ទុកចុះឈ្មោះបោះឆ្នោតតាមរយៈការចុះឈ្មោះសាកល្បងមុនថ្ងៃចុះឈ្មោះផ្លូវការមកដល់។
បញ្ហាអ៊ីនធើណេតរអាក់រអួលក៏ជាផ្នែកមួយនាំឲ្យមានឈ្មោះស្ទួនព្រោះថា មន្ត្រីបានបញ្ជូនឈ្មោះមក គ.ជ.ប រហូតដល់ទី២ដង៣ដង។ បន្ទាប់មកទៀតមនុស្សតែម្នាក់បានទៅចុះឈ្មោះបោះឆ្នោតនៅពីរទីតាំងការិយាល័យចុះឈ្មោះ។
ក្រៅពីនេះ គ.ជ.ប បានរកឃើញករណីអ្នកចុះឈ្មោះខ្លះមានចេតនាមកចុះឈ្មោះចំនួនពីរដង។ តែពួកគេទាំងនោះបានធ្វើការសូមទោសភ្លាមៗដើម្បីបញ្ចៀសការពិនិត្យដែលមានទឹកប្រាក់ចាប់ពី១ម៉ឺនរៀលទៅ១០ម៉ឺនរៀលចំពោះការប្រព្រឹត្តរបស់គាត់។
ឆ្លើយតបបញ្ហានេះលោក ហង្ស ពុទ្ធា អ្នកនាំពាក្យគ.ជ.ប ប្រកាសថា គ.ជ.ប នឹងលុបឈ្មោះស្ទួនដែលរកឃើញជិត២ម៉ឺននាក់នេះឲ្យនៅសល់តែឈ្មោះតែមួយនៅក្រោយការបិទផ្សាយបញ្ជីបោះឆ្នោតដំបូងនៅថ្ងៃទី0៣ ខែមករា ឆ្នាំ២០១៧ ខាងមុខ។ ហើយនៅថ្ងៃទី១៤មករា គ.ជ.ប ទុកពេលវេលាឲ្យពលរដ្ឋធ្វើការប្ដឹងតវ៉ាជុំវិញភាពមិនប្រក្រតីណាមួយ ទាក់ទងបញ្ជីឈ្មោះបោះឆ្នោតនេះ។
ក្រៅពីរកឃើញឈ្មោះស្ទួននេះហើយ គ.ជ.បបានរកឃើញឈ្មោះដែលមានកំហុសជាង២១ម៉ឺននាក់ផងដែរ។
ដោយឡែកទាក់ទងនឹងដំណើរការចុះឈ្មោះបោះឆ្នោតវិញ លោក ហង្ស ពុទ្ធា កត់សម្គាល់
ថា នៅតែស្បើយចំនួនអ្នកមកចុះឈ្មោះបោះឆ្នោត។ដោយឥលូវនេះអ្នកមកចុះឈ្មោះបោះឆ្នោតក្នុងមួយថ្ងៃមានចំនួនតែ៣ម៉ឺននាក់ទៅ៥ម៉ឺននាក់ប៉ុណ្ណោះ។ ចំនួននេះមានការស្បើយខ្លាំង បើប្រៀបធៀបកាលពីមុន អ្នកចុះឈ្មោះបោះឆ្នោតក្នុងមួយថ្ងៃមានចំនួន១សែន២ម៉ឺននាក់។ បន្ទាប់មកដំណាក់កាលទី២ មួយថ្ងៃ១សែន៧ម៉ឺននាក់។ គ.ជ.ប រំពឹងថានៅគៀកថ្ងៃចុះឈ្មោះបោះឆ្នោតជិតបញ្ចប់ពលរដ្ឋនឹងសម្រុកមកចុះឈ្មោះបោះឆ្នោត។
ខណៈពលរដ្ឋជិត៧លាននាក់បានទៅចុះឈ្មោះបោះឆ្នោតក្នុងរយៈពេលជាង២ខែនេះគ.ជ.ប ទទួលបាន៧១ពាក្យបណ្ដឹង។ជាង៦០បណ្ដឹងត្រូវបានដោះស្រាយ ១៤បណ្ដឹងបន្តដោះស្រាយ។ ភាគច្រើននៃបណ្ដឹងគឺមិនគោរពនីតិវិធីនៃការចុះឈ្មោះបោះឆ្នោត៕