Image may be NSFW.
Clik here to view.
ដោយ ហង្ស សាវយុត RFA 2016-05-20
រដូវធ្វើស្រែចម្ការសម្រាប់ដើមឆ្នាំ២០១៦ បានចាប់ផ្ដើមហើយ បន្ទាប់ពីមានភ្លៀងធ្លាក់ខ្លះៗជាបន្តបន្ទាប់មក។ ក៏ប៉ុន្តែកសិករប្រមាណជាង ២០០គ្រួសារ នៅឃុំម្លូព្រៃ២ នៃស្រុកឆែប ខេត្តព្រះវិហារ កំពុងតែមានកង្វល់ទៅលើបញ្ហាគ្មានដីធ្វើស្រែ ដោយសារតែក្រុមហ៊ុនដីសម្បទានសេដ្ឋកិច្ចរបស់ចិន បានឈូសឆាយ និងរំលោភយកដីអាស្រ័យផលរបស់ពួកគេស្ទើរតែអស់ទៅហើយ។
ប្រជាពលរដ្ឋជាង ១០០គ្រួសារ រស់នៅភូមិប្រើសក្អក ឃុំម្លូព្រៃ២ អំពាវនាវឱ្យអាជ្ញាធរខេត្តព្រះវិហារ និងអាជ្ញាធររដ្ឋាភិបាលថ្នាក់ជាតិ គួរតែចុះពិនិត្យមើលការប៉ះពាល់ទៅលើដីស្រែចម្ការរបស់ពួកគេ ហើយជួយដំណោះស្រាយឱ្យបានឆាប់រហ័ស ដើម្បីឱ្យអ្នកភូមិឆាប់បានដីស្រែចម្ការក្នុងរដូវវស្សាឆ្នាំនេះ។
ការអំពាវនាវបានធ្វើឡើងបន្ទាប់ពីអ្នកភូមិអះអាងថា ក្រុមហ៊ុនដីសម្បទានសេដ្ឋកិច្ចរបស់ចិន១ បានយកគ្រឿងចក្រទៅឈូសឆាយដីព័ទ្ធជុំវិញភូមិដែលពួកគេរស់នៅហើយរំលោភលើដីស្រែ និងដីបម្រុងទុកសម្រាប់ប្រើប្រាស់នៅក្នុងសហគមន៍រយៈពេលជាង ១ខែមកហើយ។
បុរសអ្នកភូមិប្រើសក្អក ម្នាក់ ក្នុងចំណោមអ្នកភូមិជាច្រើនទៀតដែលកំពុងរងការប៉ះពាល់ដោយសារការឈូសឆាយនោះ គឺលោក ពាន សុផាត។ លោកអះអាងកាលពីថ្ងៃព្រហស្បតិ៍ ទី១៩ ខែឧសភា ថា ក្នុងរដូវធ្វើស្រែឆ្នាំ២០១៦ នេះ រូបលោកក៏ដូចជាអ្នកភូមិជាង ១០០គ្រួសារទៀត គឺមានដីធ្វើស្រែតិចតួចដោយសារតែដីដែលធ្លាប់អាស្រ័យផល គឺក្រុមហ៊ុនចិន ឈ្មោះរួយហ្វេង (Ruoy Feng) បានឈូសរំលោភយកអស់ទៅហើយ។
បុរសដដែលបញ្ជាក់ថា ទាំងរូបលោក និងអ្នកភូមិមិនមានលទ្ធភាពប្រឆាំងនឹងការឈូសឆាយរបស់ក្រុមហ៊ុនចិន នោះទេ ពីព្រោះកម្លាំងប៉ូលិស និងប៉េអឹមខ្លះតែងមកគំរាមរកចាប់ចង ហើយប្រជាពលរដ្ឋបានត្រឹមតែនាំគ្នាសម្លឹងមើលដីបាត់បង់ និងស្រក់ទឹកភ្នែកប៉ុណ្ណោះ៖ «១ខែជាងហើយ គេឈូសជុំវិញភូមិ ហើយនៅបន្តរហូតសព្វថ្ងៃ។ ដើមឈើដែលគេឈូស គឺគេដុតចោល តើឱ្យអ្នកភូមិទៅរកអុសឯណាទៀត រកឈើពីណាធ្វើផ្ទះ និងរកដីស្រែឯណាទៀត»។
ក្រុមអ្នកភូមិចង់ឃើញអាជ្ញាធរស្រុកឆែប ក៏ដូចអាជ្ញាធរជាតិដោះស្រាយវិវាទដីធ្លី ជួយពិនិត្យមើលការប៉ះពាល់មកលើពួកគេ ព្រមទាំងដោះស្រាយឱ្យបានសមស្រប។ ក៏ប៉ុន្តែអភិបាលស្រុកឆែប លោក សុខ សានដារ៉ា បានឆ្លើយតបថា លោកមិនទាន់បានទទួលព័ត៌មានជុំវិញរឿងក្រុមហ៊ុនចិន យកគ្រឿងចក្រទៅឈូសឆាយដីព័ទ្ធជុំវិញភូមិ និងដីស្រែប្រជាពលរដ្ឋនោះនៅឡើយ។
លោកអភិបាលស្រុកដដែលមិនជឿថា ក្រុមហ៊ុនអាចហ៊ានទៅឈូសរំលោភបំពានលើដីប្រជាពលរដ្ឋ ហើយប្រើកម្លាំងសមត្ថកិច្ចទៅគំរាមកំហែងស្រេចតែចិត្តនោះទេ៖ «បើសិនណាមានក្រុមហ៊ុនចិន ទៅឈូសឆាយអ៊ីចឹង ធម្មតាប្រជាពលរដ្ឋត្រូវប្ដឹង ឬក៏ជូនដំណឹងមកស្រុកហើយ»។
អាជ្ញាធរស្រុកឆែប ឱ្យដឹងថា ក្រុមហ៊ុនចិន ដែលទទួលបានដីសម្បទានសេដ្ឋកិច្ចនៅម្ដុំឃុំម្លូព្រៃ នោះ មាន ២ គឺក្រុមហ៊ុនរួយហ្វេង និងក្រុមហ៊ុន ហេង យូ (Heng Yu)។
ទោះយ៉ាងណាមេឃុំម្លូព្រៃ២ លោក សាប់ សាយ អះអាងថា ក្រុមហ៊ុនចិន ពិតជាបានប្រើគ្រឿងចក្រឈូសឆាយរំលោភយកដីស្រែ និងដីព្រៃបម្រុងទុករបស់សហគមន៍មែន។ លោកមេឃុំបញ្ជាក់ថា ក្រុមហ៊ុនចិន រួយហ្វេង បានចាប់ផ្ដើមឈូសឆាយពង្រីកផ្ទៃដីសម្បទានសេដ្ឋកិច្ចរបស់គេតាំងតែពីអំឡុងឆ្នាំ២០១៥ មកម្ល៉េះ ហើយបច្ចុប្បន្នកំពុងឈូសឆាយព័ទ្ធជុំវិញភូមិចំនួន២ គឺភូមិបុះ និងភូមិប្រើសក្អក៖ «ខ្ញុំទៅសម្របសម្រួលគេអត់ព្រមទេ ខ្ញុំមានកង្វល់ណាស់ ព្រោះមិនដែលឃើញថ្នាក់លើមកមើលថា ប៉ះពាល់ប្រជាពលរដ្ឋប៉ុណ្ណាគឺអត់ឃើញ»។
លោកមេឃុំម្លូព្រៃ២ ឱ្យដឹងថា នៅភូមិបុះ ដែលមានប្រជាពលរដ្ឋចំនួន ២៤៣គ្រួសារ គឺការឈូសឆាយដីរបស់ក្រុមហ៊ុនចិន បានធ្វើឱ្យប៉ះពាល់ដីស្រែចំការរបស់ប្រជាពលរដ្ឋប្រហែលពាក់កណ្ដាល។ ចំណែកនៅភូមិប្រើសក្អកវិញ ដែលមានអ្នកភូមិជាង ២២០គ្រួសារ មានអ្នកប៉ះពាល់ដោយការឈូសឆាយប្រហែលជាង ១០០គ្រួសារ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ មានប្រសាសន៍ថា លោកបានទទួលព័ត៌មានស្ដីពីក្រុមហ៊ុនចិន ឈូសឆាយរំលោភលើដីស្រែប្រជាពលរដ្ឋនៅភូមិប្រើសក្អកនោះជាច្រើនសប្ដាហ៍មកហើយ ក៏ប៉ុន្តែដោយសាររូបលោកកំពុងជាប់រវល់ការងារជាច្រើន គឺមិនទាន់បានចុះអង្កេតនៅឡើយ។
ទោះយ៉ាងណាអ្នកសម្របសម្រួលសមាគមការពារសិទ្ធិមនុស្សអាដហុក ដដែលបញ្ជាក់ថា តាមលោកធ្លាប់សិក្សាមើលលើផែនទីខ្លះ គឺពិតជាដីសម្បទានសេដ្ឋកិច្ចរបស់ក្រុមហ៊ុនចិន សម្រាប់ដាំអំពៅបានគ្រប់ដណ្ដប់លើទៅលើដីកម្មសិទ្ធិរបស់ប្រជាពលរដ្ឋមែន៖ «យើងតែងតែមានការព្រួយបារម្ភយ៉ាងខ្លាំងទៅលើករណីដែលដីភូមិរបស់ប្រជាពលរដ្ឋត្រូវបានស្ថិតក្នុងប្លុករបស់ក្រុមហ៊ុនបែបហ្នឹង គឺមុននិងក្រោយក្រុមហ៊ុននឹងឈូសឆាយ»។
សមាគមការពារសិទ្ធិមនុស្សអាដហុក ខេត្តព្រះវិហារ ឱ្យដឹងថា តាមការសិក្សាឃើញថា ភូមិមួយចំនួនរបស់ប្រជាពលរដ្ឋនៅឃុំម្លូព្រៃ២ គឺស្ថិតនៅក្នុងផែនទីដីសម្បទានសេដ្ឋកិច្ចរបស់ក្រុមហ៊ុនតែម្ដង ដូចជាភូមិប្រើសក្អក និងភូមិបុះជាដើម។
បញ្ហានេះបង្កើតឱ្យសកម្មជនការពារសិទ្ធិមនុស្សក្រៅរដ្ឋាភិបាល មានការងឿងឆ្ងល់ថា តើមន្ត្រីរដ្ឋាភិបាលដែលជាអ្នកដើរគូសផែនទីកំណត់ដីសម្បទានសេដ្ឋកិច្ចទៅឱ្យក្រុមហ៊ុនចិន និងអ្នកវាយតម្លៃកន្លងមកនោះ ធ្វើការបែបណាបានជាបង្កើតឱ្យមានការប៉ះពាល់យ៉ាងដូច្នេះ៕
Clik here to view.
ដោយ ហង្ស សាវយុត RFA 2016-05-20
រដូវធ្វើស្រែចម្ការសម្រាប់ដើមឆ្នាំ២០១៦ បានចាប់ផ្ដើមហើយ បន្ទាប់ពីមានភ្លៀងធ្លាក់ខ្លះៗជាបន្តបន្ទាប់មក។ ក៏ប៉ុន្តែកសិករប្រមាណជាង ២០០គ្រួសារ នៅឃុំម្លូព្រៃ២ នៃស្រុកឆែប ខេត្តព្រះវិហារ កំពុងតែមានកង្វល់ទៅលើបញ្ហាគ្មានដីធ្វើស្រែ ដោយសារតែក្រុមហ៊ុនដីសម្បទានសេដ្ឋកិច្ចរបស់ចិន បានឈូសឆាយ និងរំលោភយកដីអាស្រ័យផលរបស់ពួកគេស្ទើរតែអស់ទៅហើយ។
ប្រជាពលរដ្ឋជាង ១០០គ្រួសារ រស់នៅភូមិប្រើសក្អក ឃុំម្លូព្រៃ២ អំពាវនាវឱ្យអាជ្ញាធរខេត្តព្រះវិហារ និងអាជ្ញាធររដ្ឋាភិបាលថ្នាក់ជាតិ គួរតែចុះពិនិត្យមើលការប៉ះពាល់ទៅលើដីស្រែចម្ការរបស់ពួកគេ ហើយជួយដំណោះស្រាយឱ្យបានឆាប់រហ័ស ដើម្បីឱ្យអ្នកភូមិឆាប់បានដីស្រែចម្ការក្នុងរដូវវស្សាឆ្នាំនេះ។
ការអំពាវនាវបានធ្វើឡើងបន្ទាប់ពីអ្នកភូមិអះអាងថា ក្រុមហ៊ុនដីសម្បទានសេដ្ឋកិច្ចរបស់ចិន១ បានយកគ្រឿងចក្រទៅឈូសឆាយដីព័ទ្ធជុំវិញភូមិដែលពួកគេរស់នៅហើយរំលោភលើដីស្រែ និងដីបម្រុងទុកសម្រាប់ប្រើប្រាស់នៅក្នុងសហគមន៍រយៈពេលជាង ១ខែមកហើយ។
បុរសអ្នកភូមិប្រើសក្អក ម្នាក់ ក្នុងចំណោមអ្នកភូមិជាច្រើនទៀតដែលកំពុងរងការប៉ះពាល់ដោយសារការឈូសឆាយនោះ គឺលោក ពាន សុផាត។ លោកអះអាងកាលពីថ្ងៃព្រហស្បតិ៍ ទី១៩ ខែឧសភា ថា ក្នុងរដូវធ្វើស្រែឆ្នាំ២០១៦ នេះ រូបលោកក៏ដូចជាអ្នកភូមិជាង ១០០គ្រួសារទៀត គឺមានដីធ្វើស្រែតិចតួចដោយសារតែដីដែលធ្លាប់អាស្រ័យផល គឺក្រុមហ៊ុនចិន ឈ្មោះរួយហ្វេង (Ruoy Feng) បានឈូសរំលោភយកអស់ទៅហើយ។
បុរសដដែលបញ្ជាក់ថា ទាំងរូបលោក និងអ្នកភូមិមិនមានលទ្ធភាពប្រឆាំងនឹងការឈូសឆាយរបស់ក្រុមហ៊ុនចិន នោះទេ ពីព្រោះកម្លាំងប៉ូលិស និងប៉េអឹមខ្លះតែងមកគំរាមរកចាប់ចង ហើយប្រជាពលរដ្ឋបានត្រឹមតែនាំគ្នាសម្លឹងមើលដីបាត់បង់ និងស្រក់ទឹកភ្នែកប៉ុណ្ណោះ៖ «១ខែជាងហើយ គេឈូសជុំវិញភូមិ ហើយនៅបន្តរហូតសព្វថ្ងៃ។ ដើមឈើដែលគេឈូស គឺគេដុតចោល តើឱ្យអ្នកភូមិទៅរកអុសឯណាទៀត រកឈើពីណាធ្វើផ្ទះ និងរកដីស្រែឯណាទៀត»។
ក្រុមអ្នកភូមិចង់ឃើញអាជ្ញាធរស្រុកឆែប ក៏ដូចអាជ្ញាធរជាតិដោះស្រាយវិវាទដីធ្លី ជួយពិនិត្យមើលការប៉ះពាល់មកលើពួកគេ ព្រមទាំងដោះស្រាយឱ្យបានសមស្រប។ ក៏ប៉ុន្តែអភិបាលស្រុកឆែប លោក សុខ សានដារ៉ា បានឆ្លើយតបថា លោកមិនទាន់បានទទួលព័ត៌មានជុំវិញរឿងក្រុមហ៊ុនចិន យកគ្រឿងចក្រទៅឈូសឆាយដីព័ទ្ធជុំវិញភូមិ និងដីស្រែប្រជាពលរដ្ឋនោះនៅឡើយ។
លោកអភិបាលស្រុកដដែលមិនជឿថា ក្រុមហ៊ុនអាចហ៊ានទៅឈូសរំលោភបំពានលើដីប្រជាពលរដ្ឋ ហើយប្រើកម្លាំងសមត្ថកិច្ចទៅគំរាមកំហែងស្រេចតែចិត្តនោះទេ៖ «បើសិនណាមានក្រុមហ៊ុនចិន ទៅឈូសឆាយអ៊ីចឹង ធម្មតាប្រជាពលរដ្ឋត្រូវប្ដឹង ឬក៏ជូនដំណឹងមកស្រុកហើយ»។
អាជ្ញាធរស្រុកឆែប ឱ្យដឹងថា ក្រុមហ៊ុនចិន ដែលទទួលបានដីសម្បទានសេដ្ឋកិច្ចនៅម្ដុំឃុំម្លូព្រៃ នោះ មាន ២ គឺក្រុមហ៊ុនរួយហ្វេង និងក្រុមហ៊ុន ហេង យូ (Heng Yu)។
ទោះយ៉ាងណាមេឃុំម្លូព្រៃ២ លោក សាប់ សាយ អះអាងថា ក្រុមហ៊ុនចិន ពិតជាបានប្រើគ្រឿងចក្រឈូសឆាយរំលោភយកដីស្រែ និងដីព្រៃបម្រុងទុករបស់សហគមន៍មែន។ លោកមេឃុំបញ្ជាក់ថា ក្រុមហ៊ុនចិន រួយហ្វេង បានចាប់ផ្ដើមឈូសឆាយពង្រីកផ្ទៃដីសម្បទានសេដ្ឋកិច្ចរបស់គេតាំងតែពីអំឡុងឆ្នាំ២០១៥ មកម្ល៉េះ ហើយបច្ចុប្បន្នកំពុងឈូសឆាយព័ទ្ធជុំវិញភូមិចំនួន២ គឺភូមិបុះ និងភូមិប្រើសក្អក៖ «ខ្ញុំទៅសម្របសម្រួលគេអត់ព្រមទេ ខ្ញុំមានកង្វល់ណាស់ ព្រោះមិនដែលឃើញថ្នាក់លើមកមើលថា ប៉ះពាល់ប្រជាពលរដ្ឋប៉ុណ្ណាគឺអត់ឃើញ»។
លោកមេឃុំម្លូព្រៃ២ ឱ្យដឹងថា នៅភូមិបុះ ដែលមានប្រជាពលរដ្ឋចំនួន ២៤៣គ្រួសារ គឺការឈូសឆាយដីរបស់ក្រុមហ៊ុនចិន បានធ្វើឱ្យប៉ះពាល់ដីស្រែចំការរបស់ប្រជាពលរដ្ឋប្រហែលពាក់កណ្ដាល។ ចំណែកនៅភូមិប្រើសក្អកវិញ ដែលមានអ្នកភូមិជាង ២២០គ្រួសារ មានអ្នកប៉ះពាល់ដោយការឈូសឆាយប្រហែលជាង ១០០គ្រួសារ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ មានប្រសាសន៍ថា លោកបានទទួលព័ត៌មានស្ដីពីក្រុមហ៊ុនចិន ឈូសឆាយរំលោភលើដីស្រែប្រជាពលរដ្ឋនៅភូមិប្រើសក្អកនោះជាច្រើនសប្ដាហ៍មកហើយ ក៏ប៉ុន្តែដោយសាររូបលោកកំពុងជាប់រវល់ការងារជាច្រើន គឺមិនទាន់បានចុះអង្កេតនៅឡើយ។
ទោះយ៉ាងណាអ្នកសម្របសម្រួលសមាគមការពារសិទ្ធិមនុស្សអាដហុក ដដែលបញ្ជាក់ថា តាមលោកធ្លាប់សិក្សាមើលលើផែនទីខ្លះ គឺពិតជាដីសម្បទានសេដ្ឋកិច្ចរបស់ក្រុមហ៊ុនចិន សម្រាប់ដាំអំពៅបានគ្រប់ដណ្ដប់លើទៅលើដីកម្មសិទ្ធិរបស់ប្រជាពលរដ្ឋមែន៖ «យើងតែងតែមានការព្រួយបារម្ភយ៉ាងខ្លាំងទៅលើករណីដែលដីភូមិរបស់ប្រជាពលរដ្ឋត្រូវបានស្ថិតក្នុងប្លុករបស់ក្រុមហ៊ុនបែបហ្នឹង គឺមុននិងក្រោយក្រុមហ៊ុននឹងឈូសឆាយ»។
សមាគមការពារសិទ្ធិមនុស្សអាដហុក ខេត្តព្រះវិហារ ឱ្យដឹងថា តាមការសិក្សាឃើញថា ភូមិមួយចំនួនរបស់ប្រជាពលរដ្ឋនៅឃុំម្លូព្រៃ២ គឺស្ថិតនៅក្នុងផែនទីដីសម្បទានសេដ្ឋកិច្ចរបស់ក្រុមហ៊ុនតែម្ដង ដូចជាភូមិប្រើសក្អក និងភូមិបុះជាដើម។
បញ្ហានេះបង្កើតឱ្យសកម្មជនការពារសិទ្ធិមនុស្សក្រៅរដ្ឋាភិបាល មានការងឿងឆ្ងល់ថា តើមន្ត្រីរដ្ឋាភិបាលដែលជាអ្នកដើរគូសផែនទីកំណត់ដីសម្បទានសេដ្ឋកិច្ចទៅឱ្យក្រុមហ៊ុនចិន និងអ្នកវាយតម្លៃកន្លងមកនោះ ធ្វើការបែបណាបានជាបង្កើតឱ្យមានការប៉ះពាល់យ៉ាងដូច្នេះ៕